الدنيا واقفة النهاردة كده ليه في القاهرة؟

**OlaOsman** · 01-12-2008 08:36 PM

النهاردة الطريق آخد مني ساعة و نص للرجوع للبيت، و هو أصلا آخره نص ساعة.. الدنيا واقفة بشكل مزعج من أول شارع 26 يوليو في ميدان لبنان، مرورا بجامعة الدول العربية و ميدان سفنكس و شارع النيل في العجوزة لحد ميدان الكيت الكيت كات.. أما بأه كوبري الساحل فحدث و لا حرج.. واقف من أوله لآخره و حاجة كانت خننننننننننقة الصرحة.. الحمد لله مش انا اللي كنت سايقة النهاردة.. أخويا هو اللي كان سايق و كان عايز يطلع من هدومه ياعيني من وقفة الطريق.

دي على فكرة أول مرة الطريق يقف بهذا الشكل الغريب.. مع ان امبارح الدنيا كانت بييييييييييس جدا في طريق الرجوع من الشغل.. انما فيه ايه؟ محدش يعرف.. يمكن عشان قرب دخول العيد؟؟ الله أعلم :k15:

**د.أبونضال** · 01-12-2008 09:23 PM

العيد بقة يا أستاذة علا كل سنة وانت طيبة ، وأكيد فيه حركة زيادة وبيع وشرا وطلبات
كل سنة والجميع بخير .
عندنا المنصورة هادية جدا بالنهار ولما الطريق بيقف دقيقتين ثلاثة بنقول ياه دي المنصورة بقت زحمة ولا القاهرة .. النهاردة العسكري قفل إشارة من الإشارتين اليتام اللي في المنصورة وطِّول شوية يعني دقيقتين كده ، رحت مكلكسله .. قام فاتح الإشارة على طول..
القاهرة كبلد ممكن تسوق أو تركب مواصلات فيها فعلا لا تحتمل ، ربنا معاكو جميعا يا أهل المحروسه

**badblood** · 01-12-2008 10:52 PM

يعني هي جت ع النهاردة مصر طول عمرها واقفة لغاية ماتشلت

**Dr.A.Nabil** · 01-12-2008 11:28 PM

والله انا بقالي فتره مش طايق اركب العربيه
المفروض من شقتي في المريوطيه الى الصيدليه في المهندسين 20 دقيقه بالدائري
...
المشكله ان المنزل بتاع ميدان لبنان بيكون واقف من قبليه ب 3 كيلو وبيحصل شلل في الدائري كله بسبب النزله دي
لدرجه ان احيانا باخد شارع الهرم كله ثم السودان كله عشان ارتاح من وقفة الدائري...

-------------------
المصيبه الاكبر بأه ان كل الحلول المروريه مشلوله من اي اتجاه لأي مكان
تيجي تاخد الدائري او الاتوتستراد او كوبري اكتوبر او 15 مايو او من وسط البلد مصيرك هو الشلل التام

**OlaOsman** · 02-12-2008 06:58 AM

لأ هو امبارح فعلا كان شئ غير عادي.. أنا أول مرة في حياتي أشوف كوبري الساحل عامل كده من أوله لآخره، مع انه طريقي للبيت بقالي حوالي 6 أو 7 سنين، انما الشكل ده عمري ما شفته قبل كده.

انا خايفة آخد العربية النهاردة يحصل نفس اللي حصل النهاردة و شكلي هاقضيها تاكسي لحد العيييييييييييييييد :K_crying[1]:

**OlaOsman** · 02-12-2008 06:59 AM

المشاركة الأصلية كتبت بواسطة ahmadkeshta

القاهرة كبلد ممكن تسوق أو تركب مواصلات فيها فعلا لا تحتمل ، ربنا معاكو جميعا يا أهل المحروسه

:K_crying[1]: :K_crying[1]: :K_crying[1]:

**kh_talaat** · 02-12-2008 10:00 AM

والله الطرق في مصر بقت زحمه على طول ماعدا يوم الجمعه ويوم السبت بتبقى الزحمه على خفيف

والواحد بقى حاسس انه مفيش فايدة خلاص لانافع محور ولا دائري ولا اوتوستراد كله زحمه لا تطاق

أنا عن نفسي بحاول اتكيف مع الموضوع دة بأني بسيب العربية وأروح بأتوبيس الشغل كل يوم ومن البيت للغشل ومن الشغل للبيت وبس ، ويوم الخميس بتفق مع اصحابي لو خارجين نخرج متأخر قوي ونسهر للصبح عشان لا نشوف زحمه ولا نتلحوس فيها