ارتفاع حرارة الهيلتى / الشنيور / الصاروخ

**khaledinside** · 14-09-2016 03:22 PM

انا بشتغل فى اعمال الكهرباء وشبكات الكمبيوتر - ولانى بحتاج اكسر فى الحيطة كتير فبستخدم الصاروخ ، والاجنة والمطرقة ، ولانى مبعرفش استخدم طاقة جسمى صح فى تكسير الحيطة بواسطة الاجنة والمطرقة اشتريت هيلتى (Rotary Hummer) ماركة INGCO انكو 1050w

المشكلة هى فى حرارة الاجهزة اثناء تشغيها - يعنى طول ما انا شغال بالصاروخ بعد اقل من 10 دقائق الجزء المعدنى تحت اسطوانة الصاروخ بتسخن جامد ومبقدرش المسها من شدة الحرارة

قررت افك الصاروخ علشان اعرف الجزء اللى بيسخن دة اية ، طلع صندوق تروس فقط - اما الموتور مكنش بيسخن بشكل ملحوظ
نفس الموضوع لاقيتة بيحصل فى الهيلتى والشنيور - الموتور مش بيسخن ، لكن صندوق التروس بيسخن

عملت تجربة بترموميتر IR - علشان اشوف حرارة التروس وكانت النتيجة

الصاروخ شغلتة لمدة 5 دقائق بدون حمل - درجة حرارة التروس وصلت 52 درجة -فى حين ان الموتور وصل ل 39 درجة
الشنيور شغلتة لمدة 5 دقائق بدون حمل - درجة حرارة التروس وصلت 47 درجة فى حين ان الموتور وصل 35 درجة
الهيلتى شغلتة لمدة 8 دقائق بدون حمل - درجة حرارة التروس وصلت 57 درجة فى حين ان الموتور وصل ل 40 درجة

طبعاً لان جسم الهيلتى معدن كنت بحس بالحرارة بشكل اعلى - السؤال هو - هل درجة الحرارة دى طبيعية - وبما انى عملت التجربة فى اقل من 10 دقائق - هل لما اشتغل بالهيلتى فى تكسير الحيطة لمدة اكبر - ساعة مثلا - هل درجة الحرارة هتزيد عن كدة وهل دة هيأثر على حاجة فى الهيلتى

اللى استنتجتة من التجربة ان الحرارة العالية مصدرها صندوق التروس وليس الموتور

ما هو الحد الاقصى لحرارة صندوق التروس خاصة فى الهيلتى اللى المفروض اوقف تشغل المعدة عندها
حتى الان لم يتم العمل بالهيلتى فى اى مشروع - انا استخدمتة فقط فى البيت فتحت بية مكان 3 علب كهرباء صغيرة (تكسير)

**rotanamasoud** · 14-09-2016 08:05 PM

فى عامل اضافى هو درجه الحراره الان مرتفعه وده بياثر كتير يعنى ممكن متحسش بالمشكله دى بعد شهر او اتنين لاعتدال وانخفاض درجات الحراره
تانيا راجع على الكتالوج واعرف اقصى تحمل لصندوق التروس
شخصيا اعتقد انه مصمم لتحمل 150 درجه وطبعا لو اصلى التحمل حيكون حقيقى
ثالثا اعمل حاجتين للمحافظه عليه
تاكد من استخدام الشحم او الزيت المناسب وانه كافى باسمرار وغيره كل فترات معقوله للحفاظ على صندوق التروس
خليك متوازن بالشغل عليه التتحميل الزائد يسخن التروس والمحرك ولما تشعر انه سخن ريحه 5 دقائق وكمل

**khaledinside** · 14-09-2016 10:37 PM

تانيا راجع على الكتالوج واعرف اقصى تحمل لصندوق التروس
شخصيا اعتقد انه مصمم لتحمل 150 درجه وطبعا لو اصلى التحمل حيكون حقيقى

علشان برضو تبقى الصورة واضحة

انا طبعاً معرفش ان فية اصلى ومضروب من النوعية دى - انا سمعت ان النوعية دى كويسة - والصور ممكن تشوفها وتقولى ان كان دة اصلى ولا لا ؟
انا قريت الكاتلوج كاملاً لا يوجد اى اشارة لموضوع الحرارة - عبارة عن الاحتياطات الامنية العادية وصفحة المكونات التفصيلية واسماء ومقاسات قطع الغيار فقط
دى صورة للنوعية اللى معاية

درجة حرارة الغرفة كانت فى حدود 30 درجة

تاكد من استخدام الشحم او الزيت المناسب وانه كافى باسمرار وغيره كل فترات معقوله للحفاظ على صندوق التروس

اما بخصوص الشحم - انا معرفش ازاى اعرف النوع المناسب - بالاضافة ان فية علبة شحم صغيرة جاية معاة ولكن لونها مختلف تماماً عن اللى متشحم بية - اعتقد ان دة شحم للبنط اثناء تركيبها فى الظرف لتقليل الاحتكاك والله اعلم - ياريت لو تفيدنى فى موضوع الشحم دة لان فعلاً عايز اجيب شحم ومش عارف اجيب نوع اية - وهل الشحم فى الهيلتى مناسب ولا محتاج زيادة - لانى معرفش المفروض حدودة تبقى اد اية ؟

انا رسمت رسم بيانى على 6 دقائق من ارتفاع الحرارة - لو حضرتك مهندس - هل الارتفاع فى الحرارة بالنسبة للزمن دة طبيعى

خليك متوازن بالشغل عليه التتحميل الزائد يسخن التروس والمحرك ولما تشعر انه سخن ريحه 5 دقائق وكمل

اكيد هعمل كدة - بس عايز اعرف المفروض اريحة لما حرارتة توصل كام - لان احساس جلد الانسان مختلف من شخص للتانى - انا بالنسبة لية اى حاجة دافية بتبقى سخنة.- وخصوصاً ان جسم الهيلتى معدن

**bluemail** · 14-09-2016 10:57 PM

انا بقابل مشكلة السخونه دي فعلا في الصاروخ والشنيور
هما نوعهم apt crown
انا استخدامي منزلي خفيف
لما بلاقي الشنيور او الصاروخ سخن بستنى شويه وبعدين اكمل
بصراحة حاجه مش ظريفة وبتعطل لكن مش عارف هل في حل ؟

**khaledinside** · 14-09-2016 11:17 PM

المشاركة الأصلية كتبت بواسطة bluemail

انا بقابل مشكلة السخونه دي فعلا في الصاروخ والشنيور
هما نوعهم apt crown
انا استخدامي منزلي خفيف
لما بلاقي الشنيور او الصاروخ سخن بستنى شويه وبعدين اكمل
بصراحة حاجه مش ظريفة وبتعطل لكن مش عارف هل في حل ؟

الشنيور والصاروخ اللى معاية برضو Apt crown 600 watt - موضوع الحرارة فى كل الاجهزة الحركية - حتى مراوح البيت العادية - لكن عند انهى حد المفروض يعتبر خطر - هو دة اللى بتمنى انى اوصلو - علشان اعرف امتى اريحة

**rotanamasoud** · 15-09-2016 12:04 AM

انا غير متخصص انا غاوى وبحب التكنولوجيا والميكانيكا فا مش حعرف اقولك اجابات دقيقه
الشحم حتسئل عن شحم للتروس وتجيبه نوع جيد
الحراره والترييح ده موضوع نسبى لما يسخن ريحه
اعتقد انك بتبالغ قليلا يعنى متقلقش لو الشحم مالى الجيربوكس ووصلت الحراره ل100 موصلناش للخطر الكامل عكس الموتور اللى لو سخن فعلا يتحرق (لاحظ ان 100 جلدك مش حيتحملها)
كلها شهر ودرجات الحراره تنخفض والحراره حتكون عاديه

**khaledinside** · 15-09-2016 12:11 AM

المشاركة الأصلية كتبت بواسطة rotanamasoud

انا غير متخصص انا غاوى وبحب التكنولوجيا والميكانيكا فا مش حعرف اقولك اجابات دقيقه
الشحم حتسئل عن شحم للتروس وتجيبه نوع جيد
الحراره والترييح ده موضوع نسبى لما يسخن ريحه
اعتقد انك بتبالغ قليلا يعنى متقلقش لو الشحم مالى الجيربوكس ووصلت الحراره ل100 موصلناش للخطر الكامل عكس الموتور اللى لو سخن فعلا يتحرق (لاحظ ان 100 جلدك مش حيتحملها)
كلها شهر ودرجات الحراره تنخفض والحراره حتكون عاديه

شكراً لحضرتك

انا مش ببالغ

انا بس بحب اعرف التفاصيل - واكيد درجة حرارة 100 مش هقدر حتى المسها ولا حتى 70 - بس فى كلا الاحوال انا بشتغل وانا ماسك الجسم البلاستيك

الشحم انا مش ببالغ فى موضوع الشحم - بس هل الشحم زى ما هو فى الصورة كدة كافى ولا محتاج شحم - لانى اشتريتة جديد مشحمتوش - شغال بالشحم اللى فية - فهل لو جبت شحم ومليت الجير بوكس - يكون افضل ؟

**rotanamasoud** · 15-09-2016 01:28 AM

اوك الاهتمام بالتفاصيل للناس المميزه
تشحيم الجيربوكس بيتم بكبسه بالشحم وفى كل الحالات زياده كتله الشحم تؤدى الى تبريد افضل(من روئيتى لصاحبى فى ورشته بيصنع جيربوكسات لماكينات الغزل والنسيج)
بس افضل انك تشوف نوع غالى ومعتمد من الشحم وزودله

**khaledinside** · 15-09-2016 01:57 AM

المشاركة الأصلية كتبت بواسطة rotanamasoud

اوك الاهتمام بالتفاصيل للناس المميزه
تشحيم الجيربوكس بيتم بكبسه بالشحم وفى كل الحالات زياده كتله الشحم تؤدى الى تبريد افضل(من روئيتى لصاحبى فى ورشته بيصنع جيربوكسات لماكينات الغزل والنسيج)
بس افضل انك تشوف نوع غالى ومعتمد من الشحم وزودله

شكراً للنصيحة - هعمل كدة قريب ان شاء الله - هى اماكن متخصصة فى القاهرة ممكن اشترى منها الشحم