يارجالة الفورد قدامى فورد اسكورت مو٩٩فبريكة جوه عامله ٥٥٠٠٠ك فاضية مفيهاش أى أوبشن العربية بصراحة حلوة بس سمعت كلام كتير بخصوص قطع الغيار وأسعاره غاليه شوية محتاج النصيحه أشترى ولا لأ؟
عرض للطباعة
يارجالة الفورد قدامى فورد اسكورت مو٩٩فبريكة جوه عامله ٥٥٠٠٠ك فاضية مفيهاش أى أوبشن العربية بصراحة حلوة بس سمعت كلام كتير بخصوص قطع الغيار وأسعاره غاليه شوية محتاج النصيحه أشترى ولا لأ؟
قطع غيار الموتور متوفره لاننا فى قسم الشيرى a11وa15 بنركب قطع غيار الفورد اسكورت 99 كربراتير احنا بنركب حجات الموتور فقط لان قطع غيار الفورد احسن من الصينى اللى فى السوق وفى حجات تركى والمانى للفورد بس طبعا غاليه لانها المانى والتركى شغال كويس دى المعلومه اللى عندى عن الموتور بس لو العربيه حلوه وسليمه وسعر كويس توكل على الله ومفيش حاجه هتتعبك هتلاقى قطع غيار ليها حتى لو صينى وربنا يوفقك ؟
بص انا لسه شداد عربيتي عمره ماتور كلفتني 7000 جنيه بالمصنعيات و نقل للخراط بس الاسعار الي افتكرها جوز مساعدين وراني 900 قربه مليه 170 طقم سلك 200 صباع حراره انجليزي 100 الماني 90 وخرطوم ردياتير علوي 90 الاكصدام عامل 400 و الي ورا 750 مش عارف اغلي ليه وو دي حاجات سألت عليها طقم فرش الباب 4 ابواب 600 كربايتر استيراد 500 الفبره البلاستيك الي حوالين الفتيس و راكب فيها زارير الازاز ب350 و جبت عندك مارش استيراد 250 حاجات الماتور طقم البساتن 950 طقم صباب 450 كده لو عايز بقيت الاسعار عندي ابقي انزلها بس كتير لانها شوحتني فلوس مره واحده بس الميزه انها عربيه اصيله الحاجه بحطها و انسها و مش بتقل مني في السفر
اه و طقم الدبرياج 800 و الكوبلن 300 بس الدبرياج مليته و الكوبلن غيرت جلده و مليته برده
متشكر جدا ياباشا على الاسعار دى وفرت عليا أسئلة كتير وأنا ملاحظ أن فى حاجات أسعارها معقولة وفى حاجات غالية شوية بس مادام بتركب القطعة وتنساها يبقى مفيش مشكله
إن شاء الاه قدامى عربية اسكورت مو٩٩فبريكة ١٣٠٠ هاخلص فيها أخر الاسبوع وربنا يكرم ونتبادل الاراء والمعلومات مع بعض
الاسكورت عربيه محترمه جدا لانها انتاج فورد الانجليزى والعربيه موجوده وليها قطع غيار المانى وده اكبر دليل ان الاسكورت عربيه ناجحه فى اوربا مشكلتها هنا قطع الغيار غاليا وده طبيعى لانها مستورده من المانيا او تركيا وقطع الغيار الاصلى الالمانى معمره والعيب التانى الميكانيكيه فى مصر اغلبهم بقر مش عايز يطور نفسه للتكنولوجيا الحديثه للسيارات وكل يوم العالم بيتقدم واحنا محلك سر ؟؟؟؟؟؟ الاسكورت عربيه فعلا اصيله ؟
بس اهم شئ متخليش اي حمار يلعب فيها لانها لما حد مش فاهم فيها يحط ايده بتخرب الدنيا يعني كنت مع ميكانيكي صنايعي محترم جدا بس مشكلته انه بيحب يجيب قطع الغيار بنفسه و غاوي الاستيراد و ساعات يحط استيراد عل انه جديد كنت بطفش منه مع انه لو العربيه معديه من جنبه و يسمع صوتها يقولك فيها اي اول ما يفتح الكبوت يقولي حد لعب فيها المهم رحت لواحد تاني يعملي حاجات بسيطه و بعيد عنه لما فتح الماتور قالي ان الي اتعملها ده طقم شنبر مش عمره فقررت ابعد عنه بس هو كان صنايعي جاحد بعكس التاني بس مشكلته انه مش امين زي التاني و التاني ودي العربيه لكهربائي حمار خرب الدنيا و خلها مكرونه و رحت بيها قطاعه مارش لواحد جنبي ظبطها لانه بيشتغل في الفولكس و المرسيديس المهم يكون فاهم و مش بتاع ال 128 هيفهم في الفورد بين يوم و ليله
السلام عليكم ورحمة الله وبركاته كلامك مظبوط وزى ما قولت عيب الاسكورت فى الحرفى المصرى اللى بيدور على السهل ؟ انا روحت قبل كده لكهربائى علشان يشوف كتاوت النور ؟ بصلى بقلاطه وقالى مش بشتغل فى صينى وحتى اللى اشتغل فيها بوظ الكتاوت ودوخنى انى اشترى واحد جديد وكل محلات قطع الغيار مش عارفين الكتاوت ده بتاع عربيه نوعها ايه شوية بهايم ؟ وتخيل اللى صلح الكهرباء واحد كهربائى سورى اول ماشاف الكتاوت قالى ده زى كتاوت البولو والجولف 3 والاودى 2002 وبعد ماشاف الكتاوت قالى ده شغال مفيش فيه حاجه ؟ راح ظابط الريشه وشغله زى الفل ورجع النور مظبوط زى ما كان ؟ من التجربه دى تسبت ان الصنيعى فى مصر بيدور على السهل حتى لو كانت عربيه حديثه بيمد ايده وهو وحظه اتصلحت او لا بيتعلم فى عربيات الناس وده اللى مودى البلد كلها فى داهيا ؟ الفهلوه والسرقه لكن صنايعى يطور نفسه لا والف لا ؟؟؟؟؟؟؟؟ اهم حاجه الفلوس علشان الكيف غالى ومحتاج سرقه حتى كان الزمان الورش كلها بتفتح الصبح بدرى الواد الصبى يفتح الورشه الساعه 9 ويكنس وينظف العده والساعه 10 بلكتير الاسطى يكون موجود وبسم الله يشتغل لحد المغرب ؟ ده كان زمان واتربينا عليه لكن دلوقتى الصنيعى لو شاطر بيفتح بعد الظهر 2 او 3 وعينه العماص فيها كيلو وريحة بقه زى الطرنش وفين لما يبدء يشتغل يكون الليل دخل هما دول الحرفيين دلوقتى الكل بيشتكى من الغلاء وهو احنا بنشتغل اصلا او بنراعى ربنا كله بيمد ايده فى جيب التانى تفتكر بلوضع اللى احنا عايشين فيه ده هنتقدم لا احنا عايشين وخلاص حتى البركه ربنا اخدها من الشعب المصرى ؟
يعني شوف نفس الموقف حصلي الكهربائي بتاع الدقي الي اسمه عمرو ده يدوب فك المارش قالي الاتوماتك محروق لو ملقتوش هات مرسيديس اي نعم هو اليط جدا بس تحس انه دكتور ياجدع ده الناس عليه بالحجز عشان اخد صنايعي من عنده عشان يركب المارش في العربيه قعدت ساعتين مستني :eee: بس يا ريت الاقي ميكانيكي امريكاني زي دول من البصه يفهم
ياترى العربية لو بتسخن بس مش على طول يعنى المؤشر بيعدى النص وشويه ويرجع تانى ممكن ده يكون من الريداتير ولا حاجه تانيه
لا كده عادي انا عندي بيعدي و كان بيقرب للاحمر و طلع وش سلندر
كل العربيات دى الريداتير المونيوم ولازم المياه تكون ملونه مانعه للصداء وبتبرد الموتور وكمان المياه دى زيتيه بتحافظ على طلمبة المياه من الصداء وكل مشاكل التبريد عندنا فى مصر مياه الحنفيه كارثه على صحة الموتور ؟ فما بالك من المواطن المصرى اللى تحول الى صيدليه متحركه من كتر الامراض ؟ علشان كده لكل ملاك الاسكورت لازم مياه ملونه وترموستات الكوعه يكون شغال كويس بلاش حد يلغى ترموستات الكوعه خالص ؟ولازم ناخد بالنا ان طلمبة الميه للفورد شغاله مع سير الكاتينه فلو لاقدر الله الطلمبه باظط سير الكاتينه بيفلت من مكانه وده بيخرب الموتور وممكن يضيع وش السلندر ؟
افضل نوع انا جربته موبيل الازرق كان الجيركن 4 لتر 80 ج من الصيف ؟ يمكن يكون زاد شويه ؟ بس انتى دلوقتى عندك مشكله الموتور متعود على مياه الحنفيه وده مع الزمن عمل كتل من الصداء داخل المحرك ولو حطيت مياه ملونه هتاكل الصداء وهتعمل مشكله اكبر كل الاخرام الديقه فى المحرك هتتسد من تاكل الصداء وتتحرك وتسد الريداتير ؟ هيا دى المشكله الكبيره من استخدام مياه الحنفيه ؟ للاسف مش هقدر اقولك حط مياه ملونه اللى لما يكون الموتور جديد او متعمر والريداتير متنظف كويس ؟ بعدها ممكن تستخدم مياه ملونه وخلى بالك اترموستات الكوعه مش هيدى اداء كويس ابدا مع مياه الحنفيه لانه بيصدى من الاملاح وربنا يستر ويقفش وهو مفتوح لانه مصمم على المياه الملونه الزيتيه اللى اخترع الموتور عملها كده ؟ وطبعا فهلوة الميكانيكى المصرى اول حاجه يلغى الترموستات ويستخدم مياه الحنفيه ومشى حالك وهو طبعا مش عارف قيمة الترموستات او المياه الملونه ؟ علشان كده انا محتار انصحك بلمياه الملونه او اقولك خليك فى مياه الحنفيه لانى متاكد انها غلط انا محتار زيك سامحنى ؟:120146b