هعمل كهربة اوضه فوق السطح و هعزله ايه رايكم ؟

بنعمل اوضه فى السطح كدة عشان تبقى ملجأ للى مخنوق من شقته و عايز يغير جو فى الهواء الطلق و بما انى تعبت من الصنايعيه قولت هعمل الكهربا بتاعتها بنفسى و الحمد لله بعد ماشوفت شغلهم فى الخراطيم و المواسير الفليكسيبل لقيته عك و بقيت اعرف اعملها احسن منهم فهمت طريقه مد الخراطيم كويس جدا سواء بالايد قبل التركيب او بالسوسته بعد المحارة و بقيت بعرف اركب العلب الماجيك و اثبتها بالاسمنت كمان المهم الشغل ده خلانى مصمم انى اعمل كهربة الاوضه دى بمزاج اوى

هتبقى كهربتها عبارة عن
1- نور فى السقف عادى جدا
2- نور لاربع اباليج اتنين بيبصوا على السطح و اتنين على الشارع العمومى
3- فيش لتشغيل نور السقف و فيشه للاربع اباليج
4- اماكن برايز كهرباء
5- علبه للدش
6- مفتاح البتشينو امبيره عالى عشان يبقى كأنه فيوز او مفتاح تشغيل و قفل عمومى



بالنسبه لعلبه الدش امرها سهل جدا خراطيم و علبه ماجيك
بالنسبه للبرايز الكهربا سهله لانها من طرفين الكهربا العمومى



بالنسبه للنور بقى بعرف اعمله و بتنور و زى الفل بس عايز اعرف الطريقة دى صح ولا غلط
اولا بجيب من الصاعد الى بيكون طرفين طرف بيوصل للمبه على طول
ثانيا الطرف التانى بيبقى من الصاعد بوصله فى العلبه الماجيك بقطعه و بركب الفيشه فى النص من الطرفين هينتج طرف بوصله للمبه و بيكون التانى هل كدة صح ؟




ثانيا السؤال الاهم
السطح الافضل انه يتعزل خيش مقطرن يتفرد و فوقه بيتومين و فى الاخر سيراميك
ولا الواح فل و فوقها بيتومين و بعد كدة سيراميك ولا ممكن الواح الفل تتكسر تحت ؟
و البيتومين السكيب افضل ولا الجى ام ولا مش هيفرق الانواع ؟
مع العلم اننا من اسكندرية يعنى صيف نار و شتا غرقان

الطريقه صح. الطرف السالب بتوصله باللمبه. والطرف الموجب بتوصله باللقمه البتشينو ومن اللقمه البتشينو للمبه.

المفتاح البتشينو اللى حضرتك هتركبة على اساسة انة يبقى عمومى - انك تختار قيمة امبير عالى دة غلط - كل ما تزود الامبير كل ما بتسمح بكمية طاقة اعلى تعدى فى الكابلات - خاصة ولو انت واخد من الكابل العمومى بدون قاطع - دة لا قدر الله ممكن يتسبب فى حرائق لو حصل اى تماس من الكابلات لاى سبب - واسف ان اقولك حتى الكهربائى مش بيعتمد على اى اساس فى الموضوع دة وبيمشى بالبركة .

بص - ركب مفتاح اشنايدر - قيمة الامبير فية تزيد قليلا عن قيمة الاستهلاك الكلية للسطح
وبيتم تحديد قيمة الامبير بناء على الاحمال اللى انت هتشغلها

اولا لازم تحدد الاحمال اللى هتشغلها فى السطح اد اية وطول الكابلات هيبقى اد اية علشان تعرف هتجيب سلك كم ملى

الاحمال =
اضاة السقف على اعتبارها 4 لمبات 40 وات او اقل = 160 وات
الاباليج = على فرض انها كبيرة 4 لمبات 80 وات او اقل = 320 وات

مساحة استهلاك حرة = وهى قيمة الاحمال اللى ممكن توصلها على الفيش =
مثلا : كاتل (غلاية مياة) = 1200 وات
شواحن لابتوب وموبايلات *4 = 300 وات
مساحة احتياطية = 1000 وات

يتم جم جميع الاحمال = 3000 وات 3 كيلو وات تقريباً

يتم حساب حجم مقطع السلك (سماكة السلك بالمليمتر المربع) بالمعادلات الرياضية التالية بناء على الطول
هنفترض ان اطول مسافة بين مصدر الكهرباء والاوضة هى 12 متر - طبعا الكهرباء طرفين يبقى طول السلك 24 متر

VD فقد الجهد / VL جهد الحمل / I التيار / R المقاومة /A مساحة مقطع السلك

اولا بتحسب اقل جهد ممكن يشتغل علية الاجهزة = 2% من قيمة جهد المصدر 220 فولت
VD = 220 * 2% = 4.4V

ثانياً الجهد على الاحمال فى اقل قيمة ممكنة (الفرق بين جهد المصدر وجهد الحمل)
VL=220-4.4= 215.6V

ثالثاً : التيار اللى هتحتاج الاحمال كلها لو اشتغلت فى نفس الوقت ودة بيساوى القدرة الكلية 3000 وات على جهد الاحمال والناتج بالامبير
I=3000/215.6=13.9A

رابعاً مقاومة السلك للكهرباء = الجهد المفقود على التيار تقاس بوحدة تسمى "اوم"
R=4.4/13.9=0.3 OHM

خامساً مساحة مقطع السلك بالمليمتر (سمك السلك) = المقاومة النوعية للنحاس (اذا كان السلك نحاس) فى طول السلك والناتج يقسم على المقاومة
المقاومة النوعية للنحاس هى 0.0178 Ohm/mm اوم لكل مليمتر - ولان الغش التجارى موجود فى مصر ما شاء الله - فالنحاس سيكون مخلوط بمواد اخرى فنعتبر ان المقاومة النوعية للنحاس هى 0.02 اوم
A=(0.02*24)/0.3=1.6mm

السلك المطلوب هو 1.6 مم - ولحدود الامان تنتقل الى الفئة الاعلى الموجودة بالاسواق وهى 2 مم

اختيار القاطع (مفتاح الاتوماتيك) بتشترى مفتاح يفصل عند التيار الاقى المسموح به فى المعادلات السابقة وهو 13.9A - وكما فعلت فى السلك - ستختار القيمة التجارية الاعلى لانة لايوجد مفتاح بهذه القيمة فى الاسواق - اذن ستشترى مفتاح 16A

ويفضل شراء قاطع مذدوج لفصل طرفة الكهرباء نهائياً عن الغرفة