ماركة واسم موديل أول سيارة مصرية 100%

**pharonicking** · 03-12-2008 02:42 AM

سوزان الجميلة 1500 تيربو""

**mahamedaraby** · 03-12-2008 02:52 AM

لو شركه نصر هى اللى صناعتها

هتبقى مبارك موتوز

السلام 1

السلام 2

دى فئه الفئه التانيه

هتيكون عدى وقت وهتنقل الحكم لجمال موتوز

وهتكون الشباب 1

الشباب 2

ومش عارف بعد كده المصنع هيحصله ايه

**mohamed_prog** · 03-12-2008 02:56 AM

maker name:EVC(Egyptian Vehicle Company)
model:Transy

**TICOXX** · 03-12-2008 09:18 AM

اسمها هيبقى:
ام سيد....وراكب عليها موتور ابو سيد 1300 سي سي "و سي سي تعني اختصار سعة صدر- سيد"
و بتنزل بكذا موديل 3 كربراتير و 2 انجيكشن فخر تجميع الشركة المتحدة لتجميع مخلفات المصانع الحربية (ش م ذ ذ و) = شركة مصرية ذات ذمة واسعة

موديلات الكربراتير:

الموديل الأول: ام سيد "نص عادة" 2 غيار...قدام و ورا بس و بجادون مش دريكسيون 1300 سي سي

الموديل التاني: ام سيد "اول العادة" و بيتاح فيها 4 غيار و دريكسيون و كلاكس و برضه سعة صدر سيد 1300

الموديل الثالت : ام سيد توماتيكي 18 بروجرام "نظام ناقل الحركة مستورد من شركة زانوسي الإيطالية صانعي الغسالات رقم واحد"
برضه 1300 سي سي

الموديلين الانجكشن:

الموديل الأول:ام سيد اس ار دي "اختصار ل سيد ريسنج ديناميكس" استمرار للتقليد الفرعوني ريسنج دينامكس اللي بتتكتب على كل عربيات الجمهورية ايا كان نوعها
مزودة بطقم رشاشات لانوس ما قبل 2001 علشان النوع ده معروف بطول عمره و انه بيلييك بعد فترة محددة
الكماليات: بعيد عنك تكييف و باور و بعيد عنك برضه ازاز كهربا و كاسيت مولينيكس تجميع المصانع الحربية و كاوتش نسر فاخر

الموديل التاني: ام سيد اس اي ار دي "اختصار ل سيد انجكشن رايح دمياط" او ريسنج دينامكس برضه
و ان كانت الشركة اعلنت انها تميل اكثر ل"رايح دمياط" لتبين انها سيارة خدمة شاقة و تقدر تسافر دمياط بسهولة
و طبعا فيها كل الكماليات السابقة بالاضافة الي لمبة استوب خلفي و الوان متعددة و مرايتين "يمين و شمال" و ساعة حيطة و حزام امان و استبن بنفس الكاوتش النسر الفاخر و استيكر "يا ناس يا شر كفاية قر"

**mohamedmostafa** · 03-12-2008 11:02 AM

المشاركة الأصلية كتبت بواسطة mrbond88

احنا نعمل زي الصين ونقلد الماركات الكبيرة

يعني ممكن
EGW
EG BENZ
EGYOTA
EG ROYS
المهم الEG :k46:

يبقى ممكن يكون اسم الشركة مثلا GM وهيكون المقصود بيها طبعا جمال موتورز وخد عندك بقى موديلات على قفى من يشيل .......................

**mohamedmostafa** · 03-12-2008 11:06 AM

المشاركة الأصلية كتبت بواسطة yehia

ماركة السيارة : حلمنا
الموديل : اوليمبياد 2500
نوع الوقود : سولار

هههههههههههههههههههههه دا زى سجاير مونديال كدة

**badblood** · 03-12-2008 11:46 AM

الشركة 6 اكتوبر لصناعة السيارات
واسم العربيه طبعا مبارك se ex ls اي حاجة المهم ان اسمه اتحط

**محمد ابراهيم 1** · 03-12-2008 01:14 PM

لأ ممكن نقلد الأسماء زى الصين ما عملت
بحيث يبقى إسمها بروتا فراويلا على وزن تويوتا كورولا
وممكن نقول تيتوواى ( زى هيونداى بالنسبه لهوندا كإسم فقط)
ميتسوشيشه (مقتبس من سبعاوى) بدل ميتسوبيشى
سيب وأنا أسيب كتقليد لشركة ساب
شنكوتى على غرار شنكو شنتو
أوضه على وزن أودى
نسيان على وزن نيسان
نيترون أو إليكترون على غرار بروتون وأهو كله فى الذره
أبو لمعه على غرار بيجو