| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
صفحة 1 من 4 1 2 3 4 الأخيرةالأخيرة
النتائج 1 إلى 10 من 32

  1. #1

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,841

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    Lightbulb مستوى الزيت في المحرك .. إيه أسباب نقص الزيت؟؟؟ - Facebook Twitter whatsapp انشر الموضوع فى :

    hasad">

    الموضوع ده جزء من الموضوع الأكبر لزيوت المحركات...
    http://www.nilemotors.net/Nile/341680-a.html

    تقدر ترجعله لو عايز معلومات أكتر..



    مستوى الزيت مهم جدا يكون في المستوى الطبيعي... لإن نقص الزيت غلط على الموتور... وكمان زيادة الزيت عن المستوى الطبيعي غلط...


    خلينا الأول نعرف إيه هو المستوى الطبيعي للزيت في الموتور؟؟


    المستوى الطبيعي للزيت هو بين علامتين الـMin والـMax اللي في عصاية مقاس الزيت.

    يعني مش شرط إن الزيت يكون عند علامة الـMax... المهم إنه ما ينزلش تحت علامة الـMin.. وساعتها لازم لازم تزود زيت..





    في أغلب الأحوال.. الفرق بين علامة الـMin والـMax بيكون حوالي 1 لتر... فلو لقيت الزيت في النص بين العلامتين يبقى تزود نص لتر... لو حبيت..



    من الآخر... طول ما الزيت بين العلامتين (Min - Max) يبقى مفيش مشكلة.. المهم ما يزيدش ولا ينقص عن كده.


    طيب لو الزيت نقص عن علامة الـMin.. إيه الخطر اللي ممكن يحصل؟

    لما الزيت ينقص كده بيبقى عندك احتمال كبير إن طلمبة الزيت تسحب هوا للحظات.. خصوصا مع حركة العربية وحركة الزيت جوه الكارتيرة...

    والطلمبة لو سحبت هوا معناه إن المعدن الداخلي مش هيبقى محمي بطبقة الزيت في اللحظات دي.... ده غير احتمال وقف عمل طلمبة الزيت بسبب وجود الهوا في بعض أنواع الطلمبات.


    بعض العربيات فيها مؤشرات لمستوى الزيت في الكارتيرة (زي رينو فلوانس/ميجان)... بس أغلب صانعي السيارات بتفضل إنك انت بنفسك اللي تراقب المستوى لإن الخلل في الزيت معناه خلل في الموتور بالكامل.


    على فكرة... ما تستناش لحد ما لمبة الزيت تنور.. لإنها لو نورت ده معناه إن الموتور مفيهوش زيت!!!!



    ولو حصل... لازم توقف الموتور فورا.


    طيب.. إيه اللي ممكن يحصل لو مستوى الزيت علي عن الـMax؟؟؟؟


    مشكلة مستوى الزيت العالي إن الزيت ممكن يوصل لحد عمود الكرنك..

    وعمود الكرنك للي مش عارف هو العمود الأساسي للموتور اللي متركب عليه كل البساتم..




    طيب وإيه المشكلة؟؟؟

    كذا مشكلة..

    1- لما الزيت يوصل لعمود الكرنك.. العمود هيخبط في الزيت بسرعة جدا ويعمل طبقة رغاوي في الزيت.. والرغاوي دي بتخلي الزيت زي قلته لإن التزييت معتمد على طبقة الزيت الكاملة.. والرغاوي كده بقت عبارة عن هوا مع زيت.


    https://www.youtube.com/watch?v=24AbjTx5x7E


    2- لو الزيت مستوى علي جدا.. فده بيعمل مقاومة لحركة البساتم وممكن تسبب في كسر البييلات (connecting rods)... يعني دمار شامل ومفاجئ للموتور.




    بس المؤكد إن مش أي زيادة عن مستوى الـMax هتسبب المشكلة دي...

    لو مستوى الزيت كان أعلى من علامة الـMax بنسبة بسيطة (10% من إجمالي المسافة بين العلامتين).. يبقى إن شاء الله مفيش مشاكل..

    بس أكتر من كده.. لازم تنزل الزيادة.


    ______


    اتكلمنا عن نقص الزيت.. وعرفنا إنه أحد المشاكل اللي بتواجه ناس كتير..

    ونقص مستوى الزيت يعتبر من أهم المؤشرات على حالة الموتور.. والموضوع ده ممكن يكون مؤشر لمشكلة كبيرة أو ممكن لأ...

    ده غير إن ناس كتير بتخلط بين النقص الطبيعي للزيت والنقص غير الطبيعي...



    إيه ده؟؟ هو في نقص طبيعي للزيت؟؟؟


    أيوه... وأكتر الناس بتسميه بخر الزيوت... وبنسمع ناس كتير بتتكلم على إن في زيوت معدل بخرها أعلى من غيرها، عشان كده الزيت بينقص في المواتير... حتى وهي جديدة بحالتها!!!

    في الحقيقة الكلام ده "غير دقيق"

    اللي احنا بنوصفه ده إسمه "استهلاك الزيت"


    كل مواتير العالم بتستهلك زيت مع التشغيل... بمعنى إن الزيت بيتحرق مع البنزين أو السولار

    وده بسبب طبيعة عمل الموتور .. لإن الزيت لازم يزيت أي جزء متحرك علشان تبقى حركته سهلة وما يولدش حرارة عالية



    السلندر من جوه لازم يبقى عليه طبقة من الزيت عشان البستم يمشي كويس... والبستم بيبقى فيه حلقات بتمنع اختلاط غرفة الحريق عن الأجزاء التانية المتحركة، ودي اللي معروفة بإسم "الشنابر"، ومن ضمن الشنابر دي فيه واحد أو اتنين مخصصين لمسح الزيت من على السلندر...



    بس المسح عادة مش بيتم بصورة كاملة، وبتفضل فيه طبقة رقيقة على السلندر بتتحرق مع البنزين.


    الحاجة التانية اللي بتزود استهلاك الزيت هو وجود فتحة النفس أو "بلف الـPCV"...



    المعروف إن فيه أجزاء كتير في الموتور بتتزيت بـ"الطرطشة" .. وبالتالي رذاذ الزيت ده بيخرج أثناء تزييت وش السلندر بالذات، وبيطلع من جوه البلوك من بلف الـ"pcv" ويرجع يدخل تاني مع خليط الوقود والهوا ويتحرق في السلندر..



    صمام الـPCV هي فتحة موجودة غالبا في غطا التاكيهات من فوق عشان تسمح بخروج الضغط الزيادة اللي ممكن يكون موجود جوه البلوك بسبب تسرب غازات العادم من السلندرات إلى البلوك، وغالبا الفتحة دي بيبقى عليها محبس بسيط عشان يفتح بس لما الضغط يزيد عن حد معين.


    واللي بيحصل فعليا إن نسبة الغازات اللي بتتسرب من السلندرات بتبقى قليلة جدا لما الموتور يكون سخن... وبتزيد بشكل واضح لما الموتور يكون بارد أو ما وصلش لدرجة حرارة التشغيل الصحيحة...

    معنى كده إن الموضوع ده لا يمكن نتفاداه؟؟؟

    أيوه... بس ممكن نقلل منه

    لو عايز معلومات أكتر .. تقدر ترجع للموضوع ده:
    http://www.nilemotors.net/Nile/418186-a.html



    طيب لما الزيت ينقص كده... أعمل إيه؟؟

    ممكن تزود زيت... بس على شرط..

    إنه يكون من نفس نوع الزيت الموجود في الموتور... بمعنى إنه يكون من نفس الماركة وله نفس المواصفات .. أو بمعنى أصح.. من نفس العبوة

    المشكلة إنك لو خلطت نوعين زيت أو ماركتين زيت... إحنا ما نضمنش محسنات اللزوجة والإضافات اللي محطوطة في الزيت الأولاني تتفاعل مع اللي في الزيت التاني ولا لأ

    ... فيه تفاصيل أكتر عن موضوع الإضافات ده في الموضوع ده ...

    http://www.nilemotors.net/Nile/492072-a.html



    عشان تريح دماغك.... يفضل وانت بتشتري جالون الزيت تشتري عبوة صغيرة من نفس الزيت عشان تزود بعد كده.



    طيب إيه هو النقص غير الطبيعي للزيت؟؟؟


    النقص غير الطبيعي معناه إن الزيت بينقص بسبب وجود عيب في الموتور... يعني الموتور مش في حالة كويسة

    والنقص غير الطبيعي له سببين...


    أولا.. وجود تسريب من جوانات وأويلسيلات الموتور...





    والجوانات والأورنجات والأويلسيلات في الموتور هدفها هو منع تسريب الزيوت والسوائل..

    وأغلب المواتير بتبقى فيها الجوانات أو الأويلسيلات زي الصورتين دول..



    علشان تعرف إذا كان عندك تسريب من الموتور.. فده المفترض يكون واضح بالنظر للموتور أو تحت العربية..

    بمعنى إنك لازم تشوف حاجة من دول:

    1- بقع زيت وتراب على جسم الموتور (ممكن تبقى عاملة زي الطين لو التسريب قوي) .. خاصة عند السير الأساسي في الموتور اللي متركب عليه الدينامو وطلمبة المية والكمبريسور.




    2- بقعة زيت على الأرض تحت العربية لو التسريب كان قوي أو لو كانت طبة الزيت مش مربوطة كويس مثلا...





    ثانيا... تسريب داخلي للزيت داخل حجرة الاحتراق

    وده له أكتر من مصدر..

    ممكن تكون حلقات المكبس (الشنابر) متآكلة أو مكسورة .. وبالتالي طبقة الزيت اللي على جدران السلندر مش بتتمسح بما فيه الكفاية وتتحرق مع البنزين..



    وممكن كمان تكون جوانات الصبابات في وش السلندر متآكلة وتسرب زيت جوه السلندر..



    وممكن في بعض الأحيان يكون جوان وش السلندر فيه جزء مكسور بين واحد من مجاري الزيوت (بين البلوك ووش السلندر) وواحد من السلندرات أو أكتر..

    دي صورة بيبين احتمالات بوظان وش السلندر كلها وإيه اللي ممكن يحصل..




    التسريب الداخلي ده عادة بيبان لو حضرتك دوست بنزين بشدة وفجأة... وبيظهر في شكل دخان أبيض مزرق..



    خلي بالك.. لو التسريب بسيط ممكن الدخان ما يبانش إلا في لحظات معينة.. علشان كده يستحسن تخلي حد واقف عند فتحة الشكمان عشان يشوف إمتى الدخان بيطلع بالضبط..

    إنما لو التسريب كبير.. هتلاقي الزيت بيطلع باستمرار.. وساعتها يبقى الموتور محتاج عمرة أو نص عمرة..





    طبعا... في الحالة دي هتلاقي فتاوي طلعت وتقوللك "حط زيت شنبر"..

    لو عايز تعرف إيه حكاية زيت الشنبر وإضافات الزيوت التانية.. ادخل على الموضوع ده في المشاركة التانية:
    http://www.nilemotors.net/Nile/492072-a.html


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  2. #2

    الصورة الرمزية Mohamed Desoky

    رقم العضوية : 179850

    تاريخ التسجيل : 24Sep2015

    المشاركات : 1,478

    النوع : ذكر

    الاقامة : الشيخ زايد

    السيارة: شيرى a15

    السيارة[2]: سيينا

    الحالة : Mohamed Desoky غير متواجد حالياً

    افتراضي -

    السلام عليكم ورحمة الله وبركاته الله اكبر عليك الف مره موضوع جميل جميل وتستحق وسام جديد انا لي سؤال احنا كنا زمان بنشيل خرطوم بخر الزيت من العمه علشان كان بيوسخ الكربراتير وبيسد البيكات انا اصلى سبت الميكانيكا قبل ظهور عصر الانجكشن ياريت توضحلى هلى بخر الزيت لو رجع تانى للموتور له فايده للمحرك او تحويله للخارج افضل محتاج رايك لانى احب اهل العلم والخبره وربنا يبارك فيك ياهندسه ؟


  3. #3

    الصورة الرمزية tasaka

    رقم العضوية : 173494

    تاريخ التسجيل : 24Mar2015

    المشاركات : 2,674

    النوع : ذكر

    الاقامة : egypt

    السيارة: none

    السيارة[2]: Speranza a620 2010

    الحالة : tasaka غير متواجد حالياً

    افتراضي -

    +1

    thnx


  4. #4

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,841

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    افتراضي -

    اقتباس المشاركة الأصلية كتبت بواسطة mohamed desoky مشاهدة المشاركة
    السلام عليكم ورحمة الله وبركاته الله اكبر عليك الف مره موضوع جميل جميل وتستحق وسام جديد انا لي سؤال احنا كنا زمان بنشيل خرطوم بخر الزيت من العمه علشان كان بيوسخ الكربراتير وبيسد البيكات انا اصلى سبت الميكانيكا قبل ظهور عصر الانجكشن ياريت توضحلى هلى بخر الزيت لو رجع تانى للموتور له فايده للمحرك او تحويله للخارج افضل محتاج رايك لانى احب اهل العلم والخبره وربنا يبارك فيك ياهندسه ؟

    العفو يا أستاذ محمد... والله أنا ما استاهلش كل ده.. ومفيش حد عارف كل حاجة.


    عموما.. كل حاجة ليها عيوب ومزايا...

    لو خليت الخرطوم راكب.. أكيد ده هيعمل سدد وترسبات على كامل مجموعة السحب... والمشكلة هنا كمان إن الإنجكشن بقى شغال بحساسات.. ودخول الزيت عليها هيعطلها

    ده غير ترسبات الزيت داخل السلندر وعلى البستم.
    وكمان سدد في علبة البيئة.

    في المقابل.. فايدته الوحيدة من وجهة نظري هي تقليل الدخان اللي طالع من الشكمان..


    لو شلته فأكيد هنعكس السلبيات والإيجابيات..


    بس أنا شايف إن في الحالتين.. حل المشكلة من جدرها هو الحل الأصح..

    معاك إنه مكلف بالنسبة للناس في مصر... بس في الآخر لا يصح إلا الصحيح..


    طبعا إحنا بنتكلم هنا عن الحالات غير الطبيعية.. لإن في الطبيعي المفروض الخرطوم يفضل واصل.

    ومع ذلك.. فحتى في الحالات الطبيعية لازم بنعمل صيانة لمجموعة السحب بالكامل عن طريق إضافة منظف دورة الوقود والبخاخات للبنزين كل فترة (كل غيار زيت أو 5000 كم) علشان تشيل آثار الزيت ده.


    وأعتقد إن المشاكل دي كلها ممكن نتلافاها أصلا لو مشينا بالأصول من الأول... من أول اختيار الزيت الصح... لتموين البنزين الصح.. للسواقة ونقل السرعات بالأصول .. لحد الصيانة في مواعيدها.

    المسألة مسألة ثقافة عامة نفتقدها بشدة في مصر.


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  5. #5

    الصورة الرمزية محمود السيد

    رقم العضوية : 136814

    تاريخ التسجيل : 19Mar2013

    المشاركات : 416

    النوع : ذكر

    الاقامة : الجيزة

    السيارة: مرسيدس 200

    السيارة[2]: فيات 125/127/131

    دراجة بخارية: لا يوجد

    الحالة : محمود السيد غير متواجد حالياً

    افتراضي -

    الله ينور عليك

    محمود السيد
    ابو ادم


  6. #6

    الصورة الرمزية Mohamed Desoky

    رقم العضوية : 179850

    تاريخ التسجيل : 24Sep2015

    المشاركات : 1,478

    النوع : ذكر

    الاقامة : الشيخ زايد

    السيارة: شيرى a15

    السيارة[2]: سيينا

    الحالة : Mohamed Desoky غير متواجد حالياً

    افتراضي -

    تسلم يا هندسه على الاجابه الواضحه والشامله ؟ انا ريحت دماغى لانى مش مقتنع ببخر الزيت انه يرجع للموتور تانى وده كان مدايقنى لان البخر كله بيرجع على فلتر الهواء وكل فتره بسيطه بلاحظ ان الفلتر اتوسخ تراب بطين من البخر علشان كده انا عدلت وعملت تغير فى الخراطيم والبخر حولته خارج الموتور وريحة دماغى رغم ان العربيه ماعملتشى 60 الف والموتور بحاله جيده جدا وانا عملت التجربه دى من مده وشايف ان كل شئ طبيعى والموتور مرتاح وربنا يصلح حالنا كلنا ؟


  7. #7

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,841

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    افتراضي -

    اقتباس المشاركة الأصلية كتبت بواسطة mohamed desoky مشاهدة المشاركة
    تسلم يا هندسه على الاجابه الواضحه والشامله ؟ انا ريحت دماغى لانى مش مقتنع ببخر الزيت انه يرجع للموتور تانى وده كان مدايقنى لان البخر كله بيرجع على فلتر الهواء وكل فتره بسيطه بلاحظ ان الفلتر اتوسخ تراب بطين من البخر علشان كده انا عدلت وعملت تغير فى الخراطيم والبخر حولته خارج الموتور وريحة دماغى رغم ان العربيه ماعملتشى 60 الف والموتور بحاله جيده جدا وانا عملت التجربه دى من مده وشايف ان كل شئ طبيعى والموتور مرتاح وربنا يصلح حالنا كلنا ؟

    بس كده فيه حاجة غلط...

    المفروض إن خرطوم الفايظ يرجع بعد الفلتر.. مش قبله.. وبالتالي المفروض الفلتر ما يتوسخش أصلا..

    ده من أيام الكاربيراتير والموضوع كده!!!!


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  8. #8

    الصورة الرمزية Mohamed Desoky

    رقم العضوية : 179850

    تاريخ التسجيل : 24Sep2015

    المشاركات : 1,478

    النوع : ذكر

    الاقامة : الشيخ زايد

    السيارة: شيرى a15

    السيارة[2]: سيينا

    الحالة : Mohamed Desoky غير متواجد حالياً

    افتراضي -

    اقتباس المشاركة الأصلية كتبت بواسطة borio1704 مشاهدة المشاركة

    بس كده فيه حاجة غلط...

    المفروض إن خرطوم الفايظ يرجع بعد الفلتر.. مش قبله.. وبالتالي المفروض الفلتر ما يتوسخش أصلا..

    ده من أيام الكاربيراتير والموضوع كده!!!!


    ...
    كل الكربراتيرات خرطوم البخر راكب على العمه مباشر علشان تلوث البيئه ده بلنسبه للقديم اما الانجكشن زى الفيرنا والانوس خرطوم البخر بيرجع على المنفول خلف البوابه وعندى فى علبه صغيره بتجمع خرطوم البخر على العمه المهم هيا لفه كده بس انا عملتها والعربيه كويسه والفلتر الجديد كويس لان مفيش فلوس لنظافة البيئه لان جيوبى مصر نظفتها على الاخر شكرا لردك ياهندسه ؟


  9. #9

    الصورة الرمزية sherif_mahalla

    رقم العضوية : 150665

    تاريخ التسجيل : 27Oct2013

    المشاركات : 325

    النوع : ذكر

    الاقامة : المحلة

    السيارة: تويوتا كورولا عيون

    السيارة[2]: فيات ريجاتا

    الحالة : sherif_mahalla غير متواجد حالياً

    افتراضي -

    اقتباس المشاركة الأصلية كتبت بواسطة borio1704 مشاهدة المشاركة

    بس كده فيه حاجة غلط...

    المفروض إن خرطوم الفايظ يرجع بعد الفلتر.. مش قبله.. وبالتالي المفروض الفلتر ما يتوسخش أصلا..

    ده من أيام الكاربيراتير والموضوع كده!!!!


    ...
    فعلا
    عندي كاربراتير و الفايظ داخل عالهوا اللي خارج من الفلتر


  10. #10

    الصورة الرمزية Mohamed Desoky

    رقم العضوية : 179850

    تاريخ التسجيل : 24Sep2015

    المشاركات : 1,478

    النوع : ذكر

    الاقامة : الشيخ زايد

    السيارة: شيرى a15

    السيارة[2]: سيينا

    الحالة : Mohamed Desoky غير متواجد حالياً

    افتراضي -

    hasad">

    اقتباس المشاركة الأصلية كتبت بواسطة sherif_mahalla مشاهدة المشاركة
    فعلا
    عندي كاربراتير و الفايظ داخل عالهوا اللي خارج من الفلتر
    حضرتك تقصد خرطوم الفايز او بخر الزيت داخل على العمه واكيد هيدخل على الفلترويوسخه و مع التراب هيعمل عجينه نصيحه شيل الخرطوم من العمه وحوله اسفل الموتور لانك لو سبت الخرطوم راكب فى العمه التراب مع الزيت هيدمر الفلتر وكده الفلتر مش هينقى الهواء خالص والتراب الملوث بلزيت هيدخل على غرفة الحريق والتراب هيتحرق ويتحول لصنفره ناعمه جدا هتاكل الشميز والشنابر مع الوقت ؟ خد بالك مع الوقت وربنا يسترها علينا كلنا ؟



 
صفحة 1 من 4 1 2 3 4 الأخيرةالأخيرة

المواضيع المتشابهه

  1. مستوى الزيت
    بواسطة MohammedAladel في المنتدى ريــــنو
    مشاركات: 2
    آخر مشاركة: 16-05-2012, 10:54 AM
  2. مستوى الزيت فى الالنترا؟؟!!
    بواسطة aymanshebl في المنتدى المحركات
    مشاركات: 5
    آخر مشاركة: 16-07-2011, 12:34 AM
  3. مستوى الزيت فى الالنترا؟؟!!
    بواسطة aymanshebl في المنتدى هيــونــداى
    مشاركات: 6
    آخر مشاركة: 12-07-2011, 04:59 PM
  4. سؤال فى مستوى الزيت
    بواسطة mohamed_magdi في المنتدى هيــونــداى
    مشاركات: 3
    آخر مشاركة: 17-04-2010, 10:45 AM
  5. مستوى الزيت
    بواسطة A.samy في المنتدى دايــو+شيفرولية لانوس
    مشاركات: 39
    آخر مشاركة: 02-03-2009, 12:36 PM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2