الموضوع: مستوى الزيت في المحرك .. إيه أسباب نقص الزيت؟؟؟

الموضوع ده جزء من الموضوع الأكبر لزيوت المحركات...
http://www.nilemotors.net/Nile/341680-a.html

تقدر ترجعله لو عايز معلومات أكتر..



مستوى الزيت مهم جدا يكون في المستوى الطبيعي... لإن نقص الزيت غلط على الموتور... وكمان زيادة الزيت عن المستوى الطبيعي غلط...


خلينا الأول نعرف إيه هو المستوى الطبيعي للزيت في الموتور؟؟


المستوى الطبيعي للزيت هو بين علامتين الـMin والـMax اللي في عصاية مقاس الزيت.

يعني مش شرط إن الزيت يكون عند علامة الـMax... المهم إنه ما ينزلش تحت علامة الـMin.. وساعتها لازم لازم تزود زيت..





في أغلب الأحوال.. الفرق بين علامة الـMin والـMax بيكون حوالي 1 لتر... فلو لقيت الزيت في النص بين العلامتين يبقى تزود نص لتر... لو حبيت..



من الآخر... طول ما الزيت بين العلامتين (Min - Max) يبقى مفيش مشكلة.. المهم ما يزيدش ولا ينقص عن كده.


طيب لو الزيت نقص عن علامة الـMin.. إيه الخطر اللي ممكن يحصل؟

لما الزيت ينقص كده بيبقى عندك احتمال كبير إن طلمبة الزيت تسحب هوا للحظات.. خصوصا مع حركة العربية وحركة الزيت جوه الكارتيرة...

والطلمبة لو سحبت هوا معناه إن المعدن الداخلي مش هيبقى محمي بطبقة الزيت في اللحظات دي.... ده غير احتمال وقف عمل طلمبة الزيت بسبب وجود الهوا في بعض أنواع الطلمبات.


بعض العربيات فيها مؤشرات لمستوى الزيت في الكارتيرة (زي رينو فلوانس/ميجان)... بس أغلب صانعي السيارات بتفضل إنك انت بنفسك اللي تراقب المستوى لإن الخلل في الزيت معناه خلل في الموتور بالكامل.


على فكرة... ما تستناش لحد ما لمبة الزيت تنور.. لإنها لو نورت ده معناه إن الموتور مفيهوش زيت!!!!



ولو حصل... لازم توقف الموتور فورا.


طيب.. إيه اللي ممكن يحصل لو مستوى الزيت علي عن الـMax؟؟؟؟


مشكلة مستوى الزيت العالي إن الزيت ممكن يوصل لحد عمود الكرنك..

وعمود الكرنك للي مش عارف هو العمود الأساسي للموتور اللي متركب عليه كل البساتم..




طيب وإيه المشكلة؟؟؟

كذا مشكلة..

1- لما الزيت يوصل لعمود الكرنك.. العمود هيخبط في الزيت بسرعة جدا ويعمل طبقة رغاوي في الزيت.. والرغاوي دي بتخلي الزيت زي قلته لإن التزييت معتمد على طبقة الزيت الكاملة.. والرغاوي كده بقت عبارة عن هوا مع زيت.


https://www.youtube.com/watch?v=24AbjTx5x7E


2- لو الزيت مستوى علي جدا.. فده بيعمل مقاومة لحركة البساتم وممكن تسبب في كسر البييلات (connecting rods)... يعني دمار شامل ومفاجئ للموتور.




بس المؤكد إن مش أي زيادة عن مستوى الـMax هتسبب المشكلة دي...

لو مستوى الزيت كان أعلى من علامة الـMax بنسبة بسيطة (10% من إجمالي المسافة بين العلامتين).. يبقى إن شاء الله مفيش مشاكل..

بس أكتر من كده.. لازم تنزل الزيادة.


______


اتكلمنا عن نقص الزيت.. وعرفنا إنه أحد المشاكل اللي بتواجه ناس كتير..

ونقص مستوى الزيت يعتبر من أهم المؤشرات على حالة الموتور.. والموضوع ده ممكن يكون مؤشر لمشكلة كبيرة أو ممكن لأ...

ده غير إن ناس كتير بتخلط بين النقص الطبيعي للزيت والنقص غير الطبيعي...



إيه ده؟؟ هو في نقص طبيعي للزيت؟؟؟


أيوه... وأكتر الناس بتسميه بخر الزيوت... وبنسمع ناس كتير بتتكلم على إن في زيوت معدل بخرها أعلى من غيرها، عشان كده الزيت بينقص في المواتير... حتى وهي جديدة بحالتها!!!

في الحقيقة الكلام ده "غير دقيق"

اللي احنا بنوصفه ده إسمه "استهلاك الزيت"


كل مواتير العالم بتستهلك زيت مع التشغيل... بمعنى إن الزيت بيتحرق مع البنزين أو السولار

وده بسبب طبيعة عمل الموتور .. لإن الزيت لازم يزيت أي جزء متحرك علشان تبقى حركته سهلة وما يولدش حرارة عالية



السلندر من جوه لازم يبقى عليه طبقة من الزيت عشان البستم يمشي كويس... والبستم بيبقى فيه حلقات بتمنع اختلاط غرفة الحريق عن الأجزاء التانية المتحركة، ودي اللي معروفة بإسم "الشنابر"، ومن ضمن الشنابر دي فيه واحد أو اتنين مخصصين لمسح الزيت من على السلندر...



بس المسح عادة مش بيتم بصورة كاملة، وبتفضل فيه طبقة رقيقة على السلندر بتتحرق مع البنزين.


الحاجة التانية اللي بتزود استهلاك الزيت هو وجود فتحة النفس أو "بلف الـPCV"...



المعروف إن فيه أجزاء كتير في الموتور بتتزيت بـ"الطرطشة" .. وبالتالي رذاذ الزيت ده بيخرج أثناء تزييت وش السلندر بالذات، وبيطلع من جوه البلوك من بلف الـ"pcv" ويرجع يدخل تاني مع خليط الوقود والهوا ويتحرق في السلندر..



صمام الـPCV هي فتحة موجودة غالبا في غطا التاكيهات من فوق عشان تسمح بخروج الضغط الزيادة اللي ممكن يكون موجود جوه البلوك بسبب تسرب غازات العادم من السلندرات إلى البلوك، وغالبا الفتحة دي بيبقى عليها محبس بسيط عشان يفتح بس لما الضغط يزيد عن حد معين.


واللي بيحصل فعليا إن نسبة الغازات اللي بتتسرب من السلندرات بتبقى قليلة جدا لما الموتور يكون سخن... وبتزيد بشكل واضح لما الموتور يكون بارد أو ما وصلش لدرجة حرارة التشغيل الصحيحة...

معنى كده إن الموضوع ده لا يمكن نتفاداه؟؟؟

أيوه... بس ممكن نقلل منه

لو عايز معلومات أكتر .. تقدر ترجع للموضوع ده:
http://www.nilemotors.net/Nile/418186-a.html



طيب لما الزيت ينقص كده... أعمل إيه؟؟

ممكن تزود زيت... بس على شرط..

إنه يكون من نفس نوع الزيت الموجود في الموتور... بمعنى إنه يكون من نفس الماركة وله نفس المواصفات .. أو بمعنى أصح.. من نفس العبوة

المشكلة إنك لو خلطت نوعين زيت أو ماركتين زيت... إحنا ما نضمنش محسنات اللزوجة والإضافات اللي محطوطة في الزيت الأولاني تتفاعل مع اللي في الزيت التاني ولا لأ

... فيه تفاصيل أكتر عن موضوع الإضافات ده في الموضوع ده ...

http://www.nilemotors.net/Nile/492072-a.html



عشان تريح دماغك.... يفضل وانت بتشتري جالون الزيت تشتري عبوة صغيرة من نفس الزيت عشان تزود بعد كده.



طيب إيه هو النقص غير الطبيعي للزيت؟؟؟


النقص غير الطبيعي معناه إن الزيت بينقص بسبب وجود عيب في الموتور... يعني الموتور مش في حالة كويسة

والنقص غير الطبيعي له سببين...


أولا.. وجود تسريب من جوانات وأويلسيلات الموتور...





والجوانات والأورنجات والأويلسيلات في الموتور هدفها هو منع تسريب الزيوت والسوائل..

وأغلب المواتير بتبقى فيها الجوانات أو الأويلسيلات زي الصورتين دول..



علشان تعرف إذا كان عندك تسريب من الموتور.. فده المفترض يكون واضح بالنظر للموتور أو تحت العربية..

بمعنى إنك لازم تشوف حاجة من دول:

1- بقع زيت وتراب على جسم الموتور (ممكن تبقى عاملة زي الطين لو التسريب قوي) .. خاصة عند السير الأساسي في الموتور اللي متركب عليه الدينامو وطلمبة المية والكمبريسور.




2- بقعة زيت على الأرض تحت العربية لو التسريب كان قوي أو لو كانت طبة الزيت مش مربوطة كويس مثلا...





ثانيا... تسريب داخلي للزيت داخل حجرة الاحتراق

وده له أكتر من مصدر..

ممكن تكون حلقات المكبس (الشنابر) متآكلة أو مكسورة .. وبالتالي طبقة الزيت اللي على جدران السلندر مش بتتمسح بما فيه الكفاية وتتحرق مع البنزين..



وممكن كمان تكون جوانات الصبابات في وش السلندر متآكلة وتسرب زيت جوه السلندر..



وممكن في بعض الأحيان يكون جوان وش السلندر فيه جزء مكسور بين واحد من مجاري الزيوت (بين البلوك ووش السلندر) وواحد من السلندرات أو أكتر..

دي صورة بيبين احتمالات بوظان وش السلندر كلها وإيه اللي ممكن يحصل..




التسريب الداخلي ده عادة بيبان لو حضرتك دوست بنزين بشدة وفجأة... وبيظهر في شكل دخان أبيض مزرق..



خلي بالك.. لو التسريب بسيط ممكن الدخان ما يبانش إلا في لحظات معينة.. علشان كده يستحسن تخلي حد واقف عند فتحة الشكمان عشان يشوف إمتى الدخان بيطلع بالضبط..

إنما لو التسريب كبير.. هتلاقي الزيت بيطلع باستمرار.. وساعتها يبقى الموتور محتاج عمرة أو نص عمرة..





طبعا... في الحالة دي هتلاقي فتاوي طلعت وتقوللك "حط زيت شنبر"..

لو عايز تعرف إيه حكاية زيت الشنبر وإضافات الزيوت التانية.. ادخل على الموضوع ده في المشاركة التانية:
http://www.nilemotors.net/Nile/492072-a.html


...