مشكلة فى كورونا الشاهين 2007
السلام عليكم و رحمة الله و بركاته
انا عندى عربية شاهين موديل 2007 و من حوالى تلت سنين الكورونا قفشت و انا ماشى و الحمد لله ربنا سترها .
وقتها غيرت تروس الكرونا عند ميكانيكى قديم , على حسب ما اتذكر الكلام هو استخدم تروس فيات 132 و قاللى ان التصليح اللى عمله حيمشى العربية تلت سنين , و الحمد لله العربية كانت ماشية كويس و بعد تلت سنين فعلا بدأت اسمع خبط خفيف ورا عند المطبات و لما اهدى .
و لما وديتها لميكانيكى رفعها و لقا الشدادات بتاعة المساعدين راحية فى داهية , ده غير انه كان شاكك فى الكرونا برده.
المهم انه فك الدفرنس و كشف على الكورونا و قال انها عايزة تتغير .
لما بصيت عليها ما لقيتش فيها حاجة متاكلة , مجرد خط رفيع و قصير فى واحد من التروس كان شبه الخدش .
الميكانيكى قال انه معناه فى مشكلة فى الكورونا و الاحسن نغير الدفرنس بالكامل بواحد استعمال.
انا من اسكندرية فرحنا انا و هو الاماكن المشهورة لقطع الغيار : شارع صلاح الدين - الفراهدة - الساعة - شارع العاشر من رمضان فى سيدى بشر و للأسف لقينا كل الاستعمال الموجود حالته تعبانة , حتى ما قدرناش نلاقى كورونا استعمال لوحدها او حتى كورونا تنفع تبقى بديل.
الموضوع انتهى انى غيرت الشدادات بتاعة الدفرانس و الياى بتاع العجلتين اللى ورا و قفلت العربية على كده , العربية الخبط اللى فيها صوته قل و بقت ماسكة نفسها اكتر ,بس ظهرت مشكلة اكبر على السرعات 80 و طالع , انى لما اهدى شوية باسمع صوت خرط و زنة عالى جاى من ورا .
الصوت ده مكنش موجود قبل كده , او على الاقل ما كنش عالى لدرجة انى الاحظه. بما انه غالبا جاى من الكورونا فانا حسيت انه خطر امشى بالعربية على الطرق السريعة لاحسن لا قدر الله الكورونا تقفش تانى و انا على الطريق السريع.
حاليا المشكلة:
- انى الاقى دفرنس\كورونا استعمال او كورونا جديدة حتى بس أصلى التركى, لان تقريبا اللى فى السوق صينى و هى اصلا طقم التروس.
-كان فيه تاجر قطع غيار من الفراهدة قال لنا ان قطع غيار الشاهين الاستعمال الكويسة بتتباع فى كفر الدوار بس مش عارف ابدأ منين و ادور فين.
- هل الاحسن فعلا اغير الدفرنس كله ؟ ولا اغير الكورونا فقط ؟
الميكانيكى اللى صلحها اول مرة كان قال ان معظم الصنايعية ما بتعرفش تركب الكورونا كويس و بالتالى بيطلبوا الاسهل و هو تغيير الدفرانس كله , مش عارف المعلومة ده صح ولا لأ , بس حتى هو لما غير الكورونا اول مرة مكنتش مظبوطة و اضطر يعدلها مرة تانية , انا عايز احل المشكلة من جذورها , فى نفس الوقت مش عايز موضوع الكورونا يأثر كتير على تمن العربية فمحتاجه يخلص بشكل كويس .
اتمنى اسمع خبراتكم و ارائكم و الله المستعان.