معي مبلغ من المال وعايز اكسب منه
ايهما افضل ف تلك الطرق ؟؟؟
معي مبلغ من المال وعايز اكسب منه
ايهما افضل ف تلك الطرق ؟؟؟
السبائك افضل بس خليك فى السويسرى بلاش المصرى عشان مقرفة فى بيعها الجنيهات 3/4 مش مظبوط وانت مش هتعرف تفرق بيم الجنية الكويس والوحش
انا مش حقدر انصحك خالص لان اي نصيحه دلوقتى هى مخاطره جامده جداً البلد بتخضع لاحتمالات كبيره جدا ومحدش قادر يتوقع حاجه
الدهب شاد جامد ومحدش عارف يحدد اذا كان دلوقتى وقت شرا ولا جنى أرباح ولا استقرار يعنى اللي معاه حاجه يشيلها لان سوق الدهب نفسه مش مستقر من كام يوم ال٢١ طلع ل٥٠٠ جنيه في بعض المناطق وتأنى يوم نزل ١٠ جنيه وبعدها نزل ٣ كمان والموضوع اصبح بيتحكم فيه عوامل كتير تخليك مش قادر تتوقع اى حاجه سعره العالمي وسعر الدولار العرض والطلب جوه السوق المصرى جشع اى تاجر بيبيع اى منتج وغيره كتير من المتغيرات فأنت لو قدرت تحلل متغير من المتغيرات دي وتتوقع نتيجته مش حتقدر تتوقع الباقي خاصه وانه عالميا دلوقتى صعب التكهن باتجاهه
الدولار عمرى فمفهمته هو كده كده طالع بس خللي بالك انه لو اتعوم فعلا حيشد جامد وطبعا حيبقي ده وقت البيع لكل الناس " غير العاملين في المضاربه " واللي شايلينه في البيوت لأنهم يبيعوه وده حيخلق عرض كبير واقتصاديا أكيد لازم يريح تانى يريح لحد فين وهل حتلاقي تبيعه ساعتها قبل الترييحه دى ولا لا ده ممكن يخسرك كتير لو انت مش لعيب في العمله اللي انا شخصيا مبفهمش فيها وخد في اعتبارك برضه انك ساعه بيع الدولار بأى مكسب فأنت حتشترى منتج أكيد سعره زاد ممكن بنفس نسبه أرباحك فما بالك لو ملحقتوش تبيع في الوقت المناسب وحققت لا قدر الله خسائر
يفضل ودائعه البنوك ودي حاجه حتفضل ابسط حاجه وأسهل حاجه بعيد عن المخاطر بس غالبا انت بتحقق خسائر محسوبة وبما ان الناس كلها عارفه ده ففي الوقت الحالي محدش حابب يحط فلوسه بالشكل ده خاصه وأنك بتبني عارف انك كده كده خسران
شفت الحيره اللي الناس كلها فيها
ولكن خد بالك ان الأوقات اللي زي كده بتكون أحسن وقت تحقق فيه مكاسب بس حتعتبر نفسك بتلعب قمار يا تكسب جامد يا تخسر شويه لو انت قلبك جامد والفلوس دي فائضه عن احتياجاتك فأدرس السوق ونوع استثماراتك ومتقلقش لو اشتريت اى منتج دلوقتى فأنت غالبا كسبان
بالنسبة لشراء الدهب فده تعليق كنت كاتبه بخصوص الموضوع ده لعله يفيد
متعملش شهادات دلوقتى استنى اسبوع او اتنين عشان البنك المركزى هيرفع العائد الى 15 %
بنسبه للدولار الى هيشترى على 14 مخاطره جدا
البنك الدولى وكل الشركات قالت هيرسى بعد التعويم على 11 او 12
االخلاصه الى اشترى دولارات خلاص اشترى محدش يشترى على 14 عشان دى الذروه للارتفاع
التحليل دة عجبنى
النقطة المهمة في الإستثمار في الدهب هو سعر الدولار اللي بيأثر فيه مع تأثير إنه بيطلع عالمياً فدلوقتي لو سعر الدولار نزل محلياً يبقى سعر الدهب هينزل خلال الأسبوعين الجايين وعالميا الدهب عنده تصحيح قوي يعني هاينزل برضه :) - سعر الدولار أنا شايف إنه هينزل لمستوى ال 11 ج وال 12 لعدة أسباب :
أولاً إن التحليل الفني والمالي بيقول كده .
ثانياً إن الصعود الأخير كان نتيجة مضاربة على الدولار مش نتيجة عرض وطلب .
ثالثا إن فيه ناس كتير هتبدأ تبيع لأن السعر دلوقتي مغري جداً .
رابعاً إن التقييم العادل لسعر الجنيه أمام الدولار حوالي 11.6 فحتى لو صعد تحت تأثر المضاربة لازم يرجع لأصله :)
- طبعاً أنا بأكد على مجموعة نقط :
- أولاً رأيي ده نتيجة تحليل علمي مش بناء علي رؤية شخصية .
- ثانياً رأيي غير ملزم لأي حد يعني اللي شايف إن الدولار هيصعد ومُصر إنه يشتري في القمة دلوقتي محدش هيمنعه.
- ثالثاً رأيي منفصل تماماً عن أي إنحياز سياسي :)
- رابعاً أنا كتبت رأيي نتيجة لسيل الأسئلة على الخاص اللي مش هنفع أرد عليهم واحد واحد .
- خامساً أنا بقول رأيي لأني قلقان على ناس كتير بتندفع للشراء مع الهوجه ودول هيخسروا كتير لأن سعر الصرف ممكن يستقر على مستوى ال 11 لمدة سنة أو أكتر وده شفناه من 18 سنة لما الدولار طلع من 3.4 ل 6.5 وبعدين نزل واستقر عند 5.5 حوالي 10 سنين طبعاً دلوقتى غير زمان لأن التغييرات السياسية والإقتصادية دلوقتي أكبر وزي ما قلت في البداية ده رأي غير ملزم لحد ولكن نصيحه لوجه الله :)
- أتمني إننا ما نستعجلش ولا نندفع لأننا كمصريين لينا سوابق في الموضوع ده من أيام الدينار العراقي والناس بترجع تزعل وتندم . ربنا يوفق الجميع ويرزقنا بالحلال
لو انت مش بتاع مضاربات وتجارة في العملة وعايز حاجة امنه وارباحها اعلي في حالة انك حتسبها للزمن يبقي احسن حاجة هو الشهادات
طيب دلوقتي انا رسيت من كلام سيادتكم
ع حاجتين يا اما سبايك دهب سويسري واني ابتعد عن الجنيهات عشان ف منها مغشوش يا اما انتظر نزول فوائد الشهادات ل ١٥٪
انا رايح النهارده ان شاء الله لجواهرجي واشوف الكلام ايه معاه بخصوص السبايك
لا خد بالك يا باشا ان الغش في كل الأنواع والعيارات يعنى السبائك بتتغش برضه والسويسري المعتمد تجار الدهب بيستعبطوا وبيحطوا علي السبيكة عموله ومصنعيه بتوصل ساعات ل٦٠٠ جنيه فطبعاً ساعه البيع وحتى لو السعر علي بتكون خسرت الرقم ده
انزل لمحل جواهرجى مشهور وَيَا سلام لو معرفه واسمع منه واشترى من عنده والأفضل انك تنوع سبائك وجنيهات علشان كمان يوم لا قدر الله متتزنق في مبلغ صغير تقدر تتصرف في حاجه صغيره ومتبقاش ملزم تبيع السبيكة كلها يبقي عندك قدره انك تبيع جنيه او اتنين تفك الازمه
المهم انك حتشترى بفواتير ومن حد موثوق فيه