الموضوع: ايهما افضل ف وقتنا الحالي سبائك ذهب او جنيهات ذهب ام وديعة بالبنك بفائدة ١٢،٥٪‏

السبائك افضل بس خليك فى السويسرى بلاش المصرى عشان مقرفة فى بيعها الجنيهات 3/4 مش مظبوط وانت مش هتعرف تفرق بيم الجنية الكويس والوحش

انا مش حقدر انصحك خالص لان اي نصيحه دلوقتى هى مخاطره جامده جداً البلد بتخضع لاحتمالات كبيره جدا ومحدش قادر يتوقع حاجه

الدهب شاد جامد ومحدش عارف يحدد اذا كان دلوقتى وقت شرا ولا جنى أرباح ولا استقرار يعنى اللي معاه حاجه يشيلها لان سوق الدهب نفسه مش مستقر من كام يوم ال٢١ طلع ل٥٠٠ جنيه في بعض المناطق وتأنى يوم نزل ١٠ جنيه وبعدها نزل ٣ كمان والموضوع اصبح بيتحكم فيه عوامل كتير تخليك مش قادر تتوقع اى حاجه سعره العالمي وسعر الدولار العرض والطلب جوه السوق المصرى جشع اى تاجر بيبيع اى منتج وغيره كتير من المتغيرات فأنت لو قدرت تحلل متغير من المتغيرات دي وتتوقع نتيجته مش حتقدر تتوقع الباقي خاصه وانه عالميا دلوقتى صعب التكهن باتجاهه

الدولار عمرى فمفهمته هو كده كده طالع بس خللي بالك انه لو اتعوم فعلا حيشد جامد وطبعا حيبقي ده وقت البيع لكل الناس " غير العاملين في المضاربه " واللي شايلينه في البيوت لأنهم يبيعوه وده حيخلق عرض كبير واقتصاديا أكيد لازم يريح تانى يريح لحد فين وهل حتلاقي تبيعه ساعتها قبل الترييحه دى ولا لا ده ممكن يخسرك كتير لو انت مش لعيب في العمله اللي انا شخصيا مبفهمش فيها وخد في اعتبارك برضه انك ساعه بيع الدولار بأى مكسب فأنت حتشترى منتج أكيد سعره زاد ممكن بنفس نسبه أرباحك فما بالك لو ملحقتوش تبيع في الوقت المناسب وحققت لا قدر الله خسائر

يفضل ودائعه البنوك ودي حاجه حتفضل ابسط حاجه وأسهل حاجه بعيد عن المخاطر بس غالبا انت بتحقق خسائر محسوبة وبما ان الناس كلها عارفه ده ففي الوقت الحالي محدش حابب يحط فلوسه بالشكل ده خاصه وأنك بتبني عارف انك كده كده خسران

شفت الحيره اللي الناس كلها فيها
ولكن خد بالك ان الأوقات اللي زي كده بتكون أحسن وقت تحقق فيه مكاسب بس حتعتبر نفسك بتلعب قمار يا تكسب جامد يا تخسر شويه لو انت قلبك جامد والفلوس دي فائضه عن احتياجاتك فأدرس السوق ونوع استثماراتك ومتقلقش لو اشتريت اى منتج دلوقتى فأنت غالبا كسبان

بالنسبة لشراء الدهب فده تعليق كنت كاتبه بخصوص الموضوع ده لعله يفيد

المشاركة الأصلية كتبت بواسطة eslamrace

الذهب كاستثمار يعتبر من أفضل الطرق لحفظ القيمه لانه واخد منحنى صعودي بقاله فتره ولكن زي اي استثمار مرتبط بالاحوال العالمية فيه مخاطره برضه ولكن بتقل لكونك محتفظ بمعدن ذو قيمه في ذاته وده علي مر الزمن

الموضوع في مصر مختلف شويه وكل الكلام اللي حقوله ده رأي شخصي كونته من البحث في الموضوع والتعامل في الموضوع وبالتالي يحتمل الصواب والخطأ ولكن لعله يفيد

الذهب ٤ انواع ب٣ عيارات وهم دول المعروفين في مصر إنما في عيارات تانيه ولكنها مش مفصله في مصر
الأنواع هى الذهب الكسر والجنيهات الذهب والسبائك والذهب المشغول
العيارات هى ٢٤ و ٢١ و ١٨
الذهب الكسر ده ذهب كان مشغول واتباع وفي أوقات كتير بيبسي لونه اسود لانه بيتم حرقه علشان الصائغ يتأكد انه معلهوش اى حاجه خارجياً وبيكون مكسر ولكن مبيكونش عليه اى مصنعيه يعنى بيتوزن ويتباع ولكن المشكله انه ممكن في بعض الأوقات الصياغ مبترضاش تاخده كله وبالتالي بتكون مضطر تبيعه للي اشتريت منه خاصه انه ذهب مكسر مش حتقدر تعرف مصدره اذا كان بالفعل اتشرى من السوق ولا مسروق ولا قصته ايه وعلشان كده محدش بيشتريه كتير غير الخبره في المجال
تانى حاجه الجنيهات الذهب ، الجنيهات الذهب الاصليه دي مجموعه اتعملت سنه الف تمنمايه وحاجه وكانت النجليزى ودي مش متداولة كتير في السوق لان اللي معاه بيحط علي فلوسها زيادته لانها تعتبر نادره وبعد فتره حتبقي اثار إنما المتداول هو الجنيه المصري وده بيتعمل في مصانع في مصر وبيكون ٨ جرام عيار ٢١ وده بيكون عليه حاجه زي عموله من ٢٠-٥٠ جنيه حسب اللي بتشترى منه وممكن يزيد كمان شويه لو مدموغ إنما الغالب بيكون عليه ختم المصنع بس علشان تقل التكلفة لان الدمغه حتعلي سعره علي التاجر حوالي ٢٥ جنيه وبالتالي بيتداول غير مدموغ وبيتباع علي كده "بالرغم ان ده مش قانوني"
اما السبائك فالمعروف والأكثر انتشاراً هى السبائك عيار ٢٤ اللي بتكون ذهب صافي بيسموه ٩٩٩٩ او البندقي ودي بتكون اما جرام او ٢ جرام او ٥ جرام او نص اونصه ١٥ جرام وشويه او اونصه ودي بتكون ٣١.١ جرام والنص اونصه في منها أشكال ممكن تتعلق في سلاسل وبيكون عليها صور من جهه والجهه التانيه عليها معلومات السبيكة انها ٩٩٩٩ وإذا كانت سويسرى بيتكتب عليها وحجمها أد ايه وفي طبعاً اكبر من كده ولكن انتشارها اقل والسبائك بيكون عليها برضه عموله حوالي ٣٠٠ جنيه علي الأونصة
اما الذهب المشغول فهو الذهب الخاص بالزينة وبيكون عليه ضرايبه وعموله ومصنعيه وبالتالي مش بيكون للاستثمار غير طويل الأجل جداً علشان تعوض كل المصروفات دي

اما العيارات فَهى بتتقاس بنسبه النحاس للذهب فعيار ٢٤ بيكون ذهب صافي اما عيار ٢١ بيكون الكيلو فيه ٨٧٥ جرام ذهب و ١٢٥ جرام نحاس ومعيار ١٨ ٧٥٠ جرام ذهب و٢٥٠ جرام نحاس

يفضّل لينا كام حاجه نتكلم فيها الذهب بالرغم انه يعتبر ملاذ أمن بس محدش يقدر يتوقع اتجاهه ودايما فيه نسبه مخاطره والصايغ الشاطر مستحيل يأكدلك انه طالع ولا نازل لانه بيتأثر بحاجات كتير بره مصر وجواها ومن الحاجات دي البترول والدولار جوه وبره وتكاليف استخراجه والبورصة العالميه وهكذا
اما عن الغش في الذهب فهو زي اى حاجه تانيه بيتغش عادي جداً من اول العيار والوزن لحد الدمغه اللي عليه والموضوع مش سهل انه يتم اكتشافه خاصه العيار والدمغه

النهايه ان الذهب زي اى استثمار فيه مخاطره ولكن برضه بيحفظ قيمه الفلوس بشكل جيد جداً ولكن النصيحه يتم المضاربه فيه بفلوس زايده عن الحاجه علشان الخساره فيه مبتتحققش غير بالبيع ولكن لو الفلوس غير ضرورية ففي حاله نزول السعر حتستنى عليه فتره ياخد اتجاه صعودي وساعتها تقدر تبيع ومتخسرش خاصه انه مبيتأثرش بمرور الزمن فيتلف او يحصله حاجه

تحياتى وأتمنى لو حد عنده أضافه او تصحيح يفيدنا ،

طيب دلوقتي انا رسيت من كلام سيادتكم
ع حاجتين يا اما سبايك دهب سويسري واني ابتعد عن الجنيهات عشان ف منها مغشوش يا اما انتظر نزول فوائد الشهادات ل ١٥٪‏
انا رايح النهارده ان شاء الله لجواهرجي واشوف الكلام ايه معاه بخصوص السبايك