استفسار بخصوص تغيير ماء ريداتير لانسر بومة

**abdo.bedir** · 07-10-2016 02:18 AM

السلام عليكم
عندى حاجه غريبه اوى فى العربية ... قربة مياه التبريد مش راكب فيها غير خط واحد واصل بين اعلى نقطة فى الريداتير (الطبة) واوطى نقطه فى القربة
مسكت القربة طلعتها وفضيتها تماما وركبتها تانى وعملت كام مشوار بالعربية ... النتيجة القربه لسه فاضية والعربية ادائها ودرجة حرارتها طبيعى جدا !!!
ايه بقى اعمل ايه ؟ :D
انا قريت كل مواضيع تغيير مياه الريداتير بس مافيش حاجه منها موجوده عندى

**svneleven** · 07-10-2016 05:30 AM

انا عندي الخرطوم خارج من اعلي نقطة في الردياتير لاعلي نقطة في القربة.

**sherif_mahalla** · 07-10-2016 05:52 AM

عادي
هى فكرتها لما تحط مياه في القربة حتي علامة الامتلاء و تنقص المياه في الرادياتير سيدخل بخار ساخن على القربة من أسفل فيختلط بالماء و يرفع حرارته و ضغطه و بالتالي سيندفع الماء من القربة إلى الرادياتير و الهواء أو البخار يتجه من أعلى نقطة في الرادياتير إلى القربة و هكذا

فالمفترض ألا تنقص المياه في الرادياتير و القربة فارغة و لا تمشي بها فارغة أبدا

**abdo.bedir** · 07-10-2016 03:40 PM

المشاركة الأصلية كتبت بواسطة svneleven

انا عندي الخرطوم خارج من اعلي نقطة في الردياتير لاعلي نقطة في القربة.

صحيح هى الفتحه فى القربة فوق لكن لو ركزت شوية هتلاقى فى انبوبة داخليه فى القربة موصله من الفتحه دى لحد اوطى نقطه فيها

**abdo.bedir** · 07-10-2016 03:42 PM

المشاركة الأصلية كتبت بواسطة sherif_mahalla

عادي
هى فكرتها لما تحط مياه في القربة حتي علامة الامتلاء و تنقص المياه في الرادياتير سيدخل بخار ساخن على القربة من أسفل فيختلط بالماء و يرفع حرارته و ضغطه و بالتالي سيندفع الماء من القربة إلى الرادياتير و الهواء أو البخار يتجه من أعلى نقطة في الرادياتير إلى القربة و هكذا

فالمفترض ألا تنقص المياه في الرادياتير و القربة فارغة و لا تمشي بها فارغة أبدا

شكرا لرد حضرتك لكن ازاى افضى المياة من الموتور تماما ومافيش خط راجع
لان المياه اللى في العربية حاليا لونها بقى سيئ جدا

**sherif_mahalla** · 07-10-2016 04:33 PM

المشاركة الأصلية كتبت بواسطة abdo.bedir

شكرا لرد حضرتك لكن ازاى افضى المياة من الموتور تماما ومافيش خط راجع
لان المياه اللى في العربية حاليا لونها بقى سيئ جدا

ركز في جسم الرادياتير
هتلاقي فيه خرطومين واحد من فوق و واحد من تحت الرادياتير و هتلاقي واحد داخل عالموتور و واحد خارج من الموتور
لأن لازم خرطوم يدخل المياه للموتور و خرطوم يخرج المياه من الموتور للرادياتير عشان تتبرد
المهم انت هتيجي و العربيه باردة و تفك الخرطوم اللي خارج من الموتور و ده غالبا هتلاقيه من تحت الموتور لفوق الراديتير
و هتسيبه يصفي المياه
و بعدين تفتح غطا الرادياتير و تجيب خرطوم مياه حنفيه شديده
و تحطه في الرادياتير
هتلاقي المياه طالعة من مكان ما فكيت الخرطوم مزفته
هتصبر عليها لحد ما تطلع نظيفة
ممكن كمان تفتح مدخل مياه التسخين بتاع المكيف عشان تتغسل معاك
لما تتأكد إن كل الطين خرج
هتشيل الخرطوم من وش الرادياتير و تسيبه يصفي المياه
لو عايز كل المياه تنزل
هتدور الموتور شويه عشان الطرمبة تشتغل و تنظف هي كمان
لما الميه كلها تنزل و ممكن متعملش الخطوة دي لأن ممكن لو اتعملت غلط تجيب وش سلندر
بعد كده هتركب الخرطوم تاني
و تجيب مياه خضرا أو حمرا أو مقطرة أو مياه فلتر ٥ مراحل أو تكييف بس بلاش مياه من الحنفية عشان بتبهدل الدورة
بعد كده هتضيف المياه لحد ما تملا الرادياتير و القربة و تقفلهم و تدور العربية
تفضل سايبها شغاله لحد ما المروحة بتاع التبريد تشتغل و تفصل
ساعتها تفتح القربة مش الرادياتير لأنه هيبقى سخن طبعا
و تتأكد من مستوى المياه لو مظبوط أقفل و بطل
لو ناقص زود مياه و متبطلش غير لما المروحة تشتغل و تبطل كذا مره عشان متقفعش السلندر
بالتوفيق

**borio1704** · 07-10-2016 09:35 PM

المشاركة الأصلية كتبت بواسطة abdo.bedir

السلام عليكم
عندى حاجه غريبه اوى فى العربية ... قربة مياه التبريد مش راكب فيها غير خط واحد واصل بين اعلى نقطة فى الريداتير (الطبة) واوطى نقطه فى القربة

مسكت القربة طلعتها وفضيتها تماما وركبتها تانى وعملت كام مشوار بالعربية ... النتيجة القربه لسه فاضية والعربية ادائها ودرجة حرارتها طبيعى جدا !!!
ايه بقى اعمل ايه ؟ :D

انا قريت كل مواضيع تغيير مياه الريداتير بس مافيش حاجه منها موجوده عندى

اللانسر زيها زي كل العربيات الياباني والأمريكاني والكوري بتاع هيونداي وكيا... بيستخدموا دايرة التبريد البسيطة والسهلة والفعالة جدا ... على عكس كل العربيات الأوروبية

ببساطة كده... قربة المية في الياباني عموما مالهاش دور غير الاحتفاظ بفايظ المية اللي بيطلع أثناء تشغيل الموتور... ولما الموتور يبرد.. القربة بترجع المية تاني للرادياتير.

يعني الطبيعي إنك تلاقي مستوى المية في القربة منخفض قبل ما تشغل عربيتك الصبح... وطبيعي جدا تلاقيه عالي لما الموتور يسخن أو بعد ما ترجع من مشوار بالعربية.

غطا الرادياتير هنا له دور محوري ومهم جدا جدا..

الطبيعي في أي مادة لما بتسخن إنها بتتمدد... والمية كمان لما بتسخن وتوصل لدرجة الغليان بتبدأ تتحول إلى بخار... ولإن دورة التبريد مقفولة فالبخار ده بيفضل محبوس جوة الدايرة... ولو سبناه كده الضغط هيزيد لحد ما يوصل لمستوى معين ويخرج من أضعف نقطة (غالبا بانفجار)..

غطا الرادياتير مش بيسمح للضغط يزيد عن حد معين.. وكل ما الضغط يزيد يفتح يطلع الضغط الزايد .. وأول ما الضغط ينزل يقفل علطول..

بص على الصورة..

الغطا بيبقى راكب على سوستة متعايرة تطلع الضغط الزايد.. والضغط الزايد ده بيبقى عبارة عن بخار مية سخن...

وبخار المية ده بيطلع ويتجمع في القربة... ولو القربة مش موجودة المية هتنقص مرة ورا مرة لحد ما نلاقيش مية كفاية تبرد الموتور.

ولما تطفي الموتور بعد ما العربية تبرد.. تكون دايرة التبريد هي كمان بردت.. وفي الحالة دي الضغط بيقل جدا لدرجة إنه بيعمل شفط..

لو فضل الوضع كده هتلاقي خراطيم المية اطبقت على نفسها... ولما تيجي تشغل الموتور تاني ده بيعوق التبريد... ده غير إن لو الخراطيم كانت ناشفة شوية يبقى هتتشقق وتسرب سائل التبريد...

علشان كده غطا الرادياتير معمول فيه سوستة تانية خفيفة بتفتح بس في حالة وجود شفط من ناحية الرادياتير (راجع الرسمة اللي فوق)..

والتعامل الصح مع دايرة التبريد دي هو كالتالي:

- قربة المية لازم يبقى فيها شوية مية ما تقلش عن خط الـMin اللي مكتوب عليها وما يزيدش عن خط الـMax

- غطا الرادياتير لازم يبقى شغال صح (بيفتح رايح جاي) وحاكم مضبوط.

- خراطيم الرادياتير جديدة وتتغير كل 5 سنوات.

- استخدام سوائل التبريد المناسبة حسب المطلوب في الكتالوج ... وعدم استخدام مية الحنفية أبدا إطلاقا نهائيا... وسائل التبريد يتغير كل سنتين.

- ما تنساش كمان ثرموستات الكوعة (ده لمصلحة موتورك أساسا)

لو عايز معلومات أكتر عن ثرموستات الكوعة.. ادخل على الموضوع ده..
http://www.nilemotors.net/Nile/328708-a-2.html

أنا شخصيا أفضل إنك تروح تعمل غسيل لدورة التبريد في بنزينة محترمة أو واحد بتاع رادياتيرات نظيف وبعدها تحط مية خضرا.

...