فورد فيوجن 2016 أو مستعمل بنفس القيمة؟

**AhmadSalemAta** · 09-10-2016 02:49 PM

أرجو من الأعضاء المساعدة، أنا ناوي أشتري خلال الأسبوع ده ومحتار بين فورد فيوجن 2016 تيتانيوم أو ممكن حضراتكم ترشحوا لي عربية تانية في نفس السعر تقريبًا (من 400 إلى 450) مستعمل أو جديد، مع العلم إني مش ناوي أبيع أو أغير قبل 3 سنين ويمكن أكتر.
ملحوظة: لظروف الشغل أنا بسافر من القاهرة للإسكندرية مرتين في الأسبوع ومرة واحدة شرم الشيخ كل شهر.
شكرًا مقدمًا ليكم جميعًا.

**mariachi** · 09-10-2016 04:29 PM

i think this is the best option

**salam100100** · 09-10-2016 05:56 PM

انا مع الزيرو

**محمد المصرى** · 10-10-2016 11:47 AM

الفورد جميلة جدا بس مش منتشره فى مصر وطبعا سعر اعادة البيع للفورد عموما فى مصر مش كويس
انصح انك تلقى نظره على البيجو 508 و الابل انسيجنا
وممكن كمان تبص على الc180 رائعة بس استعمال

**AhmadSalemAta** · 10-10-2016 12:37 PM

أنا فعلا شفت البيجو والأوبل، لكن الفورد شكلها عجبني أكتر من الداخل والخارج، وموضوع سعر إعادة البيع في مصر بقى خارج أي معايير، أنا شفت فورد 2015 بيتباع بأقل من سعر الزيرو بحاجة بسيطة! أما المرسيدس c180 لو كسر زيرو سعرها بقى أغلى ولو في حدود السهر ده هتبقى عاملة أكتر من 60 ألف كيلو وموديل أقدم سنتين على الأقل.

**borio1704** · 10-10-2016 01:35 PM

أولا.. الفورد فيوجن تعتبر من فئة أكبر من معظم العربيات في مصر...

فعليا.. الفيوجن تقدر تقارنها بـ .. تويوتا كامري - هوندا أكورد - شيفروليه لومينا - أوبل إنسيجنيا - فولزفاجن باسات - بيجو 508..

ميزة العربيات في الفئة دي أساسا في الوسع والراحة .. والثبات بردو إلى حد ما... مناسبة جدا للسفر..

اللي ساعد العربيات الأوروبية في الفئة دي إنها تنزل هو استخدام مواتير أقل من 1600 cc (مع تربو) .. وده نفس اللي حصل مع الفيوجن..

ما أنصحكش تروح على أي عربية أوروبية... خصوصا لو مستعملة... بصراحة مشاكل الأوروبي تغني عنه..

ثانيا... بالنسبة لسعر إعادة البيع...

سعر إعادة البيع هو ترجمة مدى رغبة السوق في العربية... والسعر ده بيبقى نتيجة سمعة العربية خلال المدة اللي فاتت.. اللي بتبقى جاية أساسا من مدى راحة ملاك العربية معاها...

باختصار.. العربية اللي سعر إعادة البيع بتاعها عالي هي العربية اللي:

أعطالها قليلة.. (الفورد أحسن من الأوروبي في الحتة دي)
صيانتها سهلة.. (الله أعلم)
تكاليف تشغيلها رخيصة.. شامل الصيانات. (قطع غيار فورد أرخص نسبيا من ماركات تانية كتير)
قطع غيارها متوفرة.. (أتوقع كده علشان التوكيل كويس)
توكيلها محترم.. (عبداللطيف جميل ناس محترمين جدا)

والعربيات اللي زي دي أصحابها مش عايزين يفرطوا فيها.. فسعرها بيعلى.

خلي بالك من حاجة مهمة...
الفيوجن موتورها تربو... يعني عايزة بنزين 95... وده في حد ذاته عامل مهم في اتخاذ قرارك... سواء على مستوى مصاريف التشغيل أو من ناحية سهولة البيع فيما بعد.

...

**borio1704** · 10-10-2016 04:56 PM

المشاركة الأصلية كتبت بواسطة AhmadSalemAta

تمام جدًا، بالنسبة لموضوع البنزين سألت الوكيل قالي إن مفيش أي مشكلة مع بنزين 92، أصدقه ولا إيه؟ :)

أنا مبحبش أصدق حد من غير مرجع أو دليل..

عموما.. دي مواصفات فنية للفيوجن .. لقيتها في وثيقة على النت..

https://www.google.com.sa/url?sa=t&r...E8bFKm0-QTeX-g

مكتوب فيها إن الموتور الـ1500 بيحط بنزين 87

واتأكد بردو من قسم فورد في المنتدى.

...