الموضوع: ادخل قول لنا بتعمل اه فى المواقف دى؟

انا بتبع اسلوب في السواقة ممكن يكون غلس لباقي الي معايا في الشارع و خصوصاً لو قدامي ميكروباص او ميني باص
بسيب مسافة بيني و بينه مساوية لطول عربيته تقريباً علشان لو حب يعمل اي افتكاسة او يتشقلب بالعربية يبقى براحته حتى لو وقف بسيب نفس المسافة هي هي
بحب و انا ماشي ابقى حاجز حارتين
يعني مثلاً على الشمال ببقى ماشي في نص الحارة الشمال و واخد نص من الحارة الي جنبها
و ببقى مستعد لأي حدث كان
و الحمد لله الطريقة دي بتخنق سواقين الميكروباص جامد جداً و سواقين الميني باص و الي يقعد يقلب نور و الي يقعد يزمر اقوم انا مديله انتظاار بدون ما اهدي حتى علشان يوصله هو كدة إذا كان عاجبك
و الحمد لله حتى الان بدون خسائر فادحة و بدون خناقات و لا شتائم

دايما الواحد يقول الحمد لله ، و قضاء اخف من قضاء ، و على رأى المثل "ان جت فى الريش بقشيش"
انا معاك انها حاجة تعكنن و لكن اتعودت ان لو لا قدر الله و حصل حاجة اطنش لو الضرر بسيط و انا مش غلطان ، و برضه بيكون لك نظرة فى اللى قدامك ، يعنى لو انسان مهذب و ذوق ما بقولش حاجة و بسامحه
طبعا فيه ناس بيبقى نفسك تطلع عينهم و لكن احيانا ممكن تلاقى نفسك انحدرت لخناقة او حرب شتائم مع ناس واطية ولا تسوى ، و للأسف حتى لو اخدت حقك منهم بتلاقى نفسك خسرت اكتر من كرامتك ، و للأسف القانون فى مسائل الحوادث حباله طووووووييييييلة قوى ، فلو عندك صبر اعمل محضر احسن
و لكن بصراحة الأمر ما يسلمش من استفزاز يخلى الواحد يطلع من شعوره
مرة من كذا سنة كنت جنب البيت و مروح و عند الملف و الدنيا واقفة فجأة لقيت واحدة ست راكنة عمودى صحيت من الغيبوبة و انطلقت كما لو ان مافيش وراها حد (عندنا نكتة علينا احنا دكاترة العيون اننا شفافين فيمكن ده اللى حصل معاها) و راحت زى الصاروخ مخيشة فى الباب اليمين الأمامى ، طبعا انا ذهلت و نزلت لها لقيتها بتحاول تجرى من فوق الرصيف (عربيتها عالية و كانت موديل سنتها و مركبة صدامات حديد فى كل ناحية) و تصادف مرور مجموعة طلبة مدارس فراحت مفادياهم بانها نزلت من فوق الرصيف و سلمت على الرفرف الأمامى الأيمن بتاعى ، بصراحة كنت هاتجنن و اللى وقفها ان الناس اتلمت ، لقيتها نزلت و بتقول لى "مافيش داعى للغلط" ، قلت لها "ماتعلمناش نغلط فى الستات بس ايه اللى عملتيه ده ؟؟" لقيتها بتقول لى "شوف انا غلطانة و معترفة بكده لكن لا بطلع اقسام ولا باعمل محاضر و لا بادفع تعويض و مابشيلش معايا فلوس" ... بصراحة مش عارف هل ده اسلوبها ولا لما اطمأنت انى مش هاغلط فيها ساقت فيها ؟؟ مش عارف و لكن الدم غلى فى نافوخى و خصوصا ان المعنى الوحيد لكلامها هو انى اخبط راسى فى الحيط
و فوجئت بها بتركب العربية و بتدور علشان الشارع ابتدأ يمشى ، جيت اكلمها راحت قايلة نفس الكلام تانى بالحرف ...
بصراحة منظر العربية و هى مخبوطة خبططين و الهانم و هى عايزة تخلع خلانى افقد اعصابى و رحت ساحب طفاية الحريق من عربيتى و دش دش دش كسرت لها الفوانيس و الشبكة الأمامية و نقرت الكبوت و الرفارف و فوانيس الشبورة
راحت نازلة و هى بتزعق رحت قايل لها "من غير غلط ، انا غلطان لكن لا بطلع اقسام ولا باعمل محاضر و لا بادفع تعويض و مابشيلش معايا فلوس ... و كده نبقى خالصين"
يمكن اللى عملته غلط و لكنه كان صح من وجهة نظرى ساعتها
و ربنا يكفينا جميعا شر الطريق