عرض للطباعة
السلام عليكم
اشتريت عربية بتوكيل من واحد كان مشتريها بتوكيل برضه من مالكها الأصلي..
العربية ناقلة من مرور لمرور وفيها تصريح 3 شهور مش رخصة ..
التصريح هينتهي في 20/11/2016 الجاي وملفها لسة ماجاش من مرورها القديم ..
أستأذن حضراتكم نشوروا عليا أعمل إيه لما يقرب ينتهي التصريح في حالة إن ورقها لسة ماجاش .. وأعمل إيه في حالة إن ورقها جه ..
مع العلم إن اللي معايا توكيل من توكيل والتصريح بإسم صاحبها الأصلي.
أرجو سرعة الرد وجزاكم الله خير
على حسب
أولا حضرتك التصريح مكتوب فيه إيه
لو مكتوب في ضهره
نهاية الضريبة و تاريخ الفحص
لسه كتير عليهم يبقى خلاص
لما التصريح هيخلص لو الملف كان مجاش هيدوك تصريح غيره
بس لازم ثانيا
لو مش فاضل كتير يبقى هتجدد
ثانيا التوكيل مكتوب فيه إيه
لو في التوكيل التعامل مع المرور يبقى ممكن تجدد التصريح أو تطلع رخصة بنفس الحالة و المرور
لو مش مكتوب التعامل مع المرور يبقى حضرتك هتنقل ملكية قبل ما التصريح يخلص عن طريق إنك تروح الشهر العقاري و تشتري العربية بعقد مسجل بيع للنفس و تاخد معاك كل التوكيلات الأصول و بعدين تروح المرور اللي انت تابع ليه ترخص
و ممكن حضرتك تأكدلي النقط دي و أقولك تعمل إيه بالظبط
السلام عليكم
أشكر لك الإهتمام والرد أخي أ/ شريف فهذا يدل على أصلك الطيب .. جزاكم الله خير
بالنسبة للضريبة فهي تنتهي في 11/10/2017 والفحص 2019
أما التوكيل فهو توكيل عام وليس خاص بسبب عدم استطاعة استخراج شهادة البيانات لعدم وصول الملف من المرور القديم .. ونص التوكيل كالآتي: أن الشخص الذي اشتريت منه السيارة بصفته وكيلاً عن صاحب السيارة الأصلي قرر أن يوكلني في البيع والشراء للنفس والغير وأقلام المرور وشهادات البيانات والمخالفات والقيادة والتجديد والادارة والترخيص والضرائب والتأمينات وتوكيل الغير.
أما بالنسبة للبيع ونقل الملكية .. في الشهر العقاري طلبوا شهادة بيانات أو الرخصة نفسها لعمل العقد وبسبب عدم مجئ الملف من المرور القديم لم أستطع استخراج شهادة بيانات .. فبالتالي لم يكن أمامي إلا عمل توكيل عام وليس خاص لأن الخاص يتطلب أيضاً شهادة بيانات
شكرا على الكلام المحترم
و ربنا ييسرلك أمورك
اللي أعرفه حضرتك إن التصريح يغني عن شهادة البيانات طالما ساري
بالإضافة إل إن موضوع التوكيل لازم يكون في كل التوكيلات
يعني من الأول للأخير فيه التعامل مع المرور و تجديد الترخيص
لو كده
يبقى هتقدر تعمل كل حاجه
بس طالما طلبوا منك في الشهر العقاري شهادة بيانات
يبقى غالبا التوكيل الأول مفيهوش التجديد
بس لازم تتأكد إن العبارة دي ذكرت في كل التوكيلات
جزاكم الله خير ويسر الله لنا وإياكم .. وألف شكر لتعبك معايا
والسلام عليكم