الموضوع: ازاى اقدر استفيد واستمتع بكل لحظة مع أبنى أرجو المساعدة

أسف على البوست اللى مكملش أنا عندى ابنى 4 سنين و 9 شهور وعندى اخته سنتين و 6 شهور بعد ما اتولدت بنتى اهتمامى بقي منصب على بنتى أكتر ومبقتش مهتم بأبنى زى زمان وشغلى مكنش بيسمح انى اتواجد بالبيت عدد ساعات كافية يدوبك على قد انى اكل وانام وأنهارده معرفش ليه فجأة قلت له تعالى نلعب مع بعض شوية مقولكمش الفرحة واللهفة اللى لقتها فى عينيه وفى اللحظة دى عرفت ان اولوياتى مضطربة وانى بضيع لحظات المفروض والطبيعى انى استمتع بها فقررت انى هضبط اوقات العمل والسهر واقللها واستثمرها فى اولادى عايز نصيحتكم سواء اباء او امهات ايه اللى ممكن اعمله علشان استفيد واستمتع بكل لحظة متوفرة مع ابنى وبنتى وزوجتى برنامجكم ايه اجازة نهاية الاسبوع اوديهم فين واروح فى اى مكان نتشارك فيه والعب معاهم واعلمهم واتعلم منهم وازاى اتفاعل معاهم اكتر واكتر اللى انا بساله انا عارف مش طبيعى وغير منطقى بس الشغل لحس لى دماغى مبفكرش فى حاجة غيره افيدونى افادكم الله

قال رسولنا الكريم "اتقوا الله واعدلوا بين اولادكم"
العدل مطلوب حتى في القبلات

أنصحك باصطحابهم لاي مكان يجمعكم ولو حديقة بسيطة او رحلة بسيطة في حدود امكانياتك
استثمارك في أبناءك أهم مليون مرة من العمل

لقد رأيت بعيني مشاجرات بين بعض الاخوة عند المقابر عقب دفن أبيهم مباشرة
مشاجرات على الميراث ، وعلمت أن أباهم رحمه الله قضى معظم حياته مغتربا لتوفير الحياة الكريمة لهم

وتابعتهم بعد ذلك (لأنهم أقاربي) فوجدت ان معظمهم باعوا ما ورثوه وأصبح هباء منثورا
ولم يفكر أي واحد منهم أن يزور قبر أبيهم ، أو يدعوا له

أدعو الله أن يبارك لك فيهم وان يجعلهم قرة عين لك ولزوجتك