معاناتي مع فتيس اوتوماتيك نيسان صني الشكل الجديد
السلام عليكم و رحمه الله و بركاته
انا سجلت اول مرة انهاردة عشان بس احكي ليكم عن معاناتي مع فتيس العربية نيسان صني الشكل الجديد ..
اولاً العربية موديل 2013 الشكل الجديد و كل الصيانات بتاعتها بعملها في التوكيل و العربية ماشية 115000 كليو ..
للأسف من حوالي شهر العربية بطلت مني وانا ماشي على السلانسية و بعدين دورت تاني و مشيت و كل ما ابقى سلانسية تبطل لحد ما افصلها خالص و اسيبها تهدى شوية و بعدين ادور و امشي بيها على الطرق السريعة .. لحد روحت التوكيل مودرن موتورز و قالولي ان العربية عايزة بوجيهات و موبينة بس هما مش عندهم الموبينة فأشتريتها جديدة من برة و ركبتها و بردة نفس المشكلة .. قولت اروح لحد يكشف عليها كمبيوتر لأني للأسف كنت شاكك في كلام التوكيل .. المهم كشف عليها و قالي الكمبيوتر مش قادر يتعرف على الفتيس .. تقريبا في مشكلة في الفتيس ..
قولت الراجل يمكن غلطان اخدتها و روحت لواحد تاني قالي نفس الكلام .. بعدين قولت اروح التوكيل بس المرة دي اروح اوتو ايجيبت .. لما روحت قالولي الفتيس كلة عايز يتغير و السبب ان الزيت اتحرق و تمن الفتيس 28000 جنية .. طبعاً انا اتصدمت من الرقم و اخدت العربية على ونش و مشيت و روحت لواحد تاني قولت يمكن الكل غلطان بس للأسف أكد لي ان المشكلة في الفتيس و ان الفتيس بالكامل محتاج يتغير .. دورت على فتيس استيراد و اقل سعر وصلت له كان 11000 جنية ..
المهم دورت على الفيس بوك لقيت واحد بيصلح فتيس كويس في ميدان لبنان .. فكيت الفتيس و روحت ليه قالي الفتيس هيتصلح ب 8500 جنية .. طبعا رقم كبير جداً بالنسبة لإني اجيبة استيراد ..
انا دلوقتي في حيرة كبيرة .. اصلح الفتيس بتاعي ولا اجيبة استيراد و هل السعر دة فعلا صح و مناسب ولا الناس ببتشتغلني ؟ و لية الفتيس يحصل فية كدة مع ان العربية بقالها 3 سنين بس ..
ارجوكم ساعدوني في اختيار صحيح و قرار مناسب اخدة بسرعة.