الموضوع: يرجى النصيحه بخصوص سيراتو 2016

المشاركة الأصلية كتبت بواسطة m.abdou

جزاك الله خيرا يا بشمهندس على المعلومات الجميله دى


سؤال بقى كده رايك ايه فى العربيه الاوبل استرا


لو الواحد بيقارن بينها وبين السيراتو ابيع الكرولا واشترى استرا ولا سيراتو


انا عارف ان دول مدرستين مختلفيين تماما وكل واحده فيهم بتهتم بحاجه غير التانيه

بس انا بسألك على رايك لو كنت مكانى

لو أنا مطرحك وقدامي الاختيارين دول بس... يبقى السيراتو بدون تفكير..

أوبل مين بس اللي أفكر فيها يا بشمهندس؟؟ كفاية إنها جنرال موتورز وتوكيلها منصور..

ادخل على قسم الأوبل في المنتدى وشوف المشاكل اللي الناس عايشة فيها.

وماتنساش كمان إن أوبل مش موجودة في السعودية... معتقدش ده من فراغ


...

المشاركة الأصلية كتبت بواسطة m.abdou

مش عاوز ااقولك ان رايك صدمنى بجد وحيرنى اكتر لانى كنت بقارن بين الاوبل استرا والسيراتو وميال للالمانى الاسترا وجربتها سواقه


هيا بس تقيله فى الطلعه مش اكتر لكن بتجرى بعد ما تاخد سرعتها من الثبات ومفيش مقارنه بين ثباتها وثبات السيراتو او الكرولا


على فكره السعوديه ليها ثقافه مختلفه عن بقيت العالم

يعنى اذا كان اوبل مش موجوده هناك فبرضه مرسيدس وبى ام دبليو تقريبا برضه مش موجودين الا اعداد بسيطه لا تذكر برضه


وفين فولكس هناك برضه؟؟؟؟؟؟؟؟


طيب فين السوبارو اللى هيا يابانى برضه


طيب ااقولك فين فولفو وقوه فولفو ومتعتها ؟؟؟؟

فين الاروبى عموما؟؟؟؟؟


كل دول وحشيين؟؟؟

اعتقد انها حكايه ان عبد اللطيف قدر يعملهم غسيل مخ كويس والعربيات اليبانى اعطال لا تذكر تقريبا وتكييف كويس فده اللى هما محتاجينه


بس انت متأكد بجد انى انفض للاوبل الاسترا خاالص هنا فى مصر ؟؟؟؟؟؟؟؟

سر انتشار الياباني في السعودية (وتويوتا بالذات) هو نفس سر انتشارها في العالم كله... الاعتمادية واقتصادية التشغيل...

ده على عكس السيارات الأوروبية... مشاكل ووجع دماغ وكمان مصاريفها كتير.. وده بينعكس مباشرة على سعر إعادة البيع..


العربية اللي سعر إعادة البيع بتاعها عالي معناه إن ملاك العربية دي كانوا مبسوطين منها وفي أغلب الأحيان مش بيبيعوها ببساطة..

مبسوطين منها يعني:

أعطالها قليلة..
قطع غيارها متوفرة..
تكاليفها قليلة..
صيانتها سهلة..
منتشرة .. فأغلب الميكانيكية بيعرفوا يشتغلوا فيها..

محدش جاب سيرة ثبات.. ولا أوبشن.. ولا أداء عالي.


وهو ده اللي مخلي ماركات زي تويوتا وهيونداي دلوقتي هما أكتر ماركتين منتشرين في السعودية (وأمريكا بردو).. مش مسألة غسيل مخ خالص.


عموما.. حدد أولوياتك واحتياجاتك بالنسبة للعربية...

لو عايز ثبات عالي... يبقى سيبك بقى من أي عربية غير الألماني..

لو عايز عربية تريحك من وجع الدماغ والمشاكل... فكر في الياباني وبعديه الكوري... وسيبك من أي حاجة تمت لأوروبا بصلة.


وراجع الموضوع ده.. يمكن يسهل عليك شوية..

http://www.nilemotors.net/Nile/329150-a.html


طيب بقوللك إيه..

ما فكرتش في الكروز؟؟؟

الكروز هي عبارة عن آسترا متنكرة في شكل شيفروليه... وأرخص كتير.


...

المشاركة الأصلية كتبت بواسطة M.ABDOU

كلامك صح يا بشمهندش

بخصوص الكروز فدى عملت زى اللى رقصت على السلم

ولا هيا كورى واستفادنا من قله اعطاله

ولا هيا المانى وفيها مواصفات ودلع الالمانى علشان نستحمل قرفه

حاجه كده من رايى انها جنين لم يكتمل نموه فطلع مشوه

ده رايى

أعتقد الناس (وأنا منهم) لما بتقول كلمة كوري.. غالبا بتقصد هيونداي/كيا..

باقي الكوري لا ينطبق عليه موضوع الاعتمادية.. لإنه معتمد في الأساس على تكنولوجيا أوروبية

دايو سابقا وشيفروليه الكوري حاليا معتمد 100% على أوبل (جنرال موتورز)... وسانج يونج كان معتمد على مرسيدس وحاليا على رينو.


بس بردو عايز ألفت انتباهك إن مش معنى إن أوبل ألماني تبقى بنفس مستوى مرسيدس أو بي إم دبليو أو أي ماركة ألماني فاخرة...

أوبل تعتبر عربية شعبية/اقتصادية في ألمانيا.. ومستواها أقل كمان من فولزفاجن.. قارن أسعار أوبل في السوق الأوروبي مقارنة بباقي العربيات...


بالنسبة للكروز... أنا رشحتهالك لإن أنا شايف إن مسألة الثبات مهمة بالنسبالك... واللي أعرفه إن ثبات الكروز عالي مقارنة بكل الكوري عموما والياباني كمان..

طيب شوف الفيديو ده... أنا شايف إنه بيحلل الكروز بطريقة منطقية جدا..
https://www.youtube.com/watch?v=1gS_gA3M2fk

الفيديو ده بيتكلم على السنترا... شوف كده بردو يمكن تغير رأيك..
https://www.youtube.com/watch?v=uZ6II4fnLlg

الفيديو ده بيتكلم على هيونداي إيلانترا ... تقدر تقيسه على السيراتو بردو
https://www.youtube.com/watch?v=GfUhrkdvfJw


...