الموضوع: نداء و رجاء للأخوة بتوع العربي المكتوب بحروف حلبنتيشي

أولا السلام عليكم و رحمة الله و بركاته
أنتشرت مؤخرا ظاهرة بين الشباب الصغير السن و هي كتابة لغتنا العربية بحروف أجنبية و أبتداع أشكال أو مرادافات للحروف التي ليس لها بديل في اللغة الأجنبية مثل
العين و الخاء و الحاء و الضاد و الهمزة
و أصبح التعبير لدى هؤلاء الشباب عند كتابة رسالة موبايل أو كتابة رسالة على الكمبيوتر تظهر بشكل حلبنتيشي أستنجرليني غير مفهوم للأغلبية
يعني تلاقي رسالة مكتوبة كالتالي

ana Masry a3ish fi el3alam leghait ma 2amout

طبعا كلام حلبنتيشي غير مفهوم و يعبر عن أشياء كثيرة منها عدم الرغبة في التعلم للثقافة الأصلية لنا
و أنا مش عايز حد يفهم كلامي أنه أتهام أو ماشبه و لكن هذه هي الحقيقة

و تمت مناقشة الكثيرين مما يفعلون ذلك و لهم الكثير من الحجج
الكمبيوتر عندي مفيهوش لوحة مفاتيح عربي !!!

الحل ..... يوجد في كل مولات الكمبيوتر استيكرات عليها الحروف العربي بثمن لا يتجازو 5 جنيه و يتم لصقها على الحروف كما هو موضح عليها طبقا لخريطة تُسهل عملية اللصق على المستخدم

أنا بطئ في الكتابة بالعربي ؟؟
و الله بزعل قوي من الناس اللي بتقول كدا
يعني أنت كسول للدرجة دي و مش عايز تتعلم لغتك ؟؟؟؟ ده الموضوع سهل جدا و مش هايخد معاك أكتر من أسبوع في التعلم و التدريب على كتابة رسالة يوميا باللغة العربية ....... رسالة واحدة و سيكون كل شئ على ما يرام

أنا مش محتاج العربي في حاجة ؟؟؟
دول بقى ردي عليهم ........ جاتكوا خيبة على اللي علمكوا كدا ( و حسبي الله و نعم الوكيل )

مش عارف فيه حجج تانية و لا لاءة بس دول أشهر حجج بأسمعها من الناس اللي بتكتب العربي الحلبنتيشي

ملحوظة تانية للناس الأخوة الأفاضل اللي بيمارسوا العادة الغريبة دي
و الله العظيم تلاتة أنا 99 % من المداخلات أو المواضيع المكتوبة بهذه الطريقة لا أقرأها بتاتا و أقوم بتفويتها بالبلدي
عارفين ليه ؟؟
علشان أولا شئ متعب جدا في قراءته و محتاج وقت و قوة نظر جبارة علشان أقعد أربط ما بين كل حرف انجليزي و مقابله في اللغة العربية و في الأخر أجمع كلمة عربي
و تاني حاجة ...... شئ مقزز و يدل على الأستهتار بالجذور الأصلية لنا كمواطنين نعيش في بلد أسمه
جمهورية مصر العربية ........ و خدوا بالكم من أخر كلمة
يعني مقلناش الأنجليزية أو الأفرنجية أو الفرانكوأرابية

أسمها ووصفها العربية ليدل على اللغة التي نتعامل بها و على فكرة
اللغة الوحيدة المعترف بها في الدستور المصري هي اللغة العربية فقط لا غير و لا يوجد أي لغات أخر معترف بها في الدستور كلغة للبلاد

لذا رجاء رجاء رجاء منكم يا أخواني
حاولوا أن تجتهدوا قليلا للكتابة باللغة العربية

و فيه موقع يقوم بتحول الحروف المكتوبة بالانجليزية إلى العربية للناس اللي مش عايزة تتعب نفهشا في تعلم لغتها و مرتاحة في كتابة لغة الأجانب ( و ياريتهم بيتقنوها .... دول كمان لما بيكتبوا انجليزي صرف .... بيبقى ضايع )

محدش يذكر أسمه ...... و الموضوع مش ضد شخص بعينه و محدش يأخد الموضوع بمحمل شخصي أحنا بس يهمنا الصالح العام لينا و ليكم و للغتنا العربية
مرة تانية أنا مش بهاجم حد ...... بقدر هجومي على أسلوب خاطئ لا يُشجع

موقع الترجمة هو
www.yamli.com

سأضيف استطلاع للرأي و نرى تجاوب الأعضاء مع المداخلات المكتوبة بالطريقة الحلبنتيشي

الله يكرمك يا أستاذ توت

انا نفسي الادارة تاخد بنتيجة التصويت ده وتمنع الكتابة بالحروف دي والمشاركات يا تكون عربي يا تكون انجليزي. لكن الصنف اللي ملوش شكل ده أكيد أسوأ من استخدام اللون الأحمر في الكتابة.