ازاي تغير مساحات BMW e90 316 بمبلغ 16 جنيه و45 قرش!
بسم الله الرحمن الرحيم
السلام عليكم ورحمة الله وبركاته
..
الزملاء الاعزاء والاصدقاء الافاضل
مع دخول فصل الشتاء كنت براجع علي العربية وكوني من الاسكندرية المساحات هنا اهم من الفرامل
واكتشفت ان المساحات متأكلة وابتدت تتقطع ولازم تتغير!
سالت عليها وكانت الصدمة .. فردة المساحات الواحدة ب 200 ج والحجة سعر الدولار!
طبعًا الحكاية دي استفذتني جدًا جدًا وبغض النظر عن الاستطاعة المادية انا مش حغير المساحات ب 400 جنيه مستحيل.
والمشكلة الرئيسية ان ال e90 مساحاتها ليها كليبس شكله مختلف والمساحات العادية اللي في السوق مبتركبش عليه.
المهم علشان مطولش عليكم كنت في كارفور ولقيت هناك مساحات صيني رخيصة ب 16.45 ج وكانت الفكرة في البداية ((هل ممكن اخد منها الكاوتش فقط واركبه مكان الكاوتش القديم؟))
اشتريت المساحات وقلت حجرب وحاخد المخاطرة المحسوبة اللي اقصى تكلفة ليها 16.45 ج
فكيت المساحات بتاعتي اخدتها البيت مع الجديدة وجبت العدة وقعدت ادرس الموضوع
وبعد دقائق اكتشفت ان عملية تبديل الكاوتش صعبة واحتمالات انه يتقطع كبيرة اوي
بس اكتشفت حاجة تانية اني اقدر انقل الكلبس بتاع القديمة للجديدة
وبالفعل بدات افك كلبس الجديدة الاول
بداية شلت الغطاء البلاستيك وبعدين شلت القاعدة البلاستيك واتبقي جسم صلب راكب علي الحديد اللي بيحمي كاوتش المساحات بشكل قووي جدًا واكتشفت اني اقدر افكه باني اضغط علي الحديد ببنز واعصر الكوتش اللي بينه لحد ما طلعت الجزء ده وبقت المساحات قابلة لتركيب الكليبس الخاص ب bmw
وبنفس الخطوات شلت كليبس الاصلي بتاعي وركبته علي الجديدة والحمد لله ركب بتطابق تام بدون اي فروق
وجربتها علي العربية والنتيجة ممتازة جدًا والحمد لله
التكلفة
16.45ج
الوقت 15 دقيقة (اعتقد بعد كده حكون اسرع بعد ما فهمت الموضوع)
الخسائر صفر والحمد لله
ارجو ان يكون الموضوع مفيد
خالص تحياتي للجميع
