انا كدة شغال فى تأسيس البيت صح ولا غلط ؟

**EgyArmy** · 03-11-2016 12:57 AM

عايز رايكم انا كدة شغال صح و كل قرش بيتدفع مظبوط فى مكانه ولا بهدر وقت و مجهود و فلوس و فيه حلول افضل عمليا و ماديا ولا لا ؟
بالله عليكم لو صح طمنونى و متنخلوش تردوا و لو فيه وجهات نظر تانيه انا عارف ان المهندسين هنا اكتر من شعر راسى

هشترى 20 جردل بيتومين فى الغالب هتكون الماركة باكين لانها الاكتر انتشارا فى المنطقه بتاعتنا

فيه 3 حمامات هاخد لكل حمام جردل و اخففه بجردل مايا و انضف الارضيات جدا و ادهن ارضيات الحمام هيتبقى 17 جردل هعزل بيهم السطح

بفكر لزيادة الامان فى كذا حاجة
اولا السيكا الجركن بيفرد 4 متر يعنى هحتاج فى الحمام الواحد 3 جراكن الى بيتم خلطها بالاسمنت المائى و اعمل تلييسة اسمنت بالسيكا فوق البيتومين بس هل السيكا متوفرة فى السوق ولا لا ؟ و سعرها كام ؟
ثانيا اجيب رول خيش مقطرن و احطه فوق البيتومين
ثالثا رول انسومات
ايهما فى ال3 افكار دول اصلح و اوفر ؟

و كمان بفكر اعمل ( حلل مصفى ) بلاعات يعنى فى البلكونات و على السطح فقولت هشترى لكل بلكونه حله بمخرج واحد و نص بوصة و حله بمخرجين الاول واحد و نص بوصة و التانى اتنين بوصه و دة هيرمى على ( شبك ) ماسورة بلاستيك يعنى اتنين بوصه هل اقدر انفذ دة بنفسى داخل بلكونات الشقق و اوفر تمن مصناعيه السباك لانهم قالولى هياخدوا فى تركيب البلاعتين و توصيلهم بالشبك 450 فى كل شقه فأنا هسهل عليه المأمورية بحيث ان عمله كله يكون فى تركيب الشبك الخارجى من السطح للارض
و الافضل نهايه الشبك تكون على الارض ولا داخل الصرف الصحى ؟ لانى خايف يكون داخل الصرف فيعمل ريحه فى البلكونات و السطح و يطلع حشرات

تابعوا الموضوع سواء معايا فى الرأى او فيه افكار تانيه عندكم
لانى لسه هتكلم عن
سقف الحمام و شكله النهائى
سقف البلكونه و شكله النهائى
مخرج شفاط المطبخ قبل تركيب السيراميك

**amr011111** · 03-11-2016 12:09 PM

أحسن حاجه فى العزل الانسومات طبعاً. بس العزل عالبارد كله شغال بيه ولا تقلق طالما اللحامات سليمه. ولو هتعمل العزل على البارد يبقى ملهاش لزمه تبهدل نفسك وخلى السباك يعملها لانه المفروض مش ياخد فلوس زياده عليها لان الموضوع مش بياخد اكتر من خمس دقايق ده بالنسبه للحمامات.

**EgyArmy** · 05-11-2016 12:34 AM

المشاركة الأصلية كتبت بواسطة amr011111

أحسن حاجه فى العزل الانسومات طبعاً. بس العزل عالبارد كله شغال بيه ولا تقلق طالما اللحامات سليمه. ولو هتعمل العزل على البارد يبقى ملهاش لزمه تبهدل نفسك وخلى السباك يعملها لانه المفروض مش ياخد فلوس زياده عليها لان الموضوع مش بياخد اكتر من خمس دقايق ده بالنسبه للحمامات.

بعيد عنك ربنا كارمنى بصنايعيه دكاترة
انا يمكن بشتغل فى الشقه عنهم
فأنا هعزل على البارد بالبيتومين
و هشترى انسومات
بس محدش يعرف سعر الانسومات كام دلوقتى و كام متر ؟
و محتاج لصنايعى ولا لا
لانى قريت بين السطور كلمة لحامات دى معناها ايه ؟

**HeMa_LanCeR** · 05-11-2016 08:14 AM

المشاركة الأصلية كتبت بواسطة egyarmy

بعيد عنك ربنا كارمنى بصنايعيه دكاترة
انا يمكن بشتغل فى الشقه عنهم
فأنا هعزل على البارد بالبيتومين
و هشترى انسومات
بس محدش يعرف سعر الانسومات كام دلوقتى و كام متر ؟
و محتاج لصنايعى ولا لا
لانى قريت بين السطور كلمة لحامات دى معناها ايه ؟

الفكره انك تعزل بارد وبس
اللحامات قصده لحامات السباكه
لان لو اللحام مش مظبوط والله لو عملت مليون عزل باردو هتكسر السيراميك وتصلح اللحام
مواسير دلوقتي البلاستيك مش بتحتاج عزل زي الزهر
انا انصحك متكلفش نفسك في العزل بس كلف نفسك في اظوات سباكه محترمة وصنايعي كويس وتجيب الشركة المصنعه للمواسير تعملك اختبار

**EgyArmy** · 06-11-2016 03:10 PM

المشاركة الأصلية كتبت بواسطة hema_lancer

الفكره انك تعزل بارد وبس
اللحامات قصده لحامات السباكه
لان لو اللحام مش مظبوط والله لو عملت مليون عزل باردو هتكسر السيراميك وتصلح اللحام
مواسير دلوقتي البلاستيك مش بتحتاج عزل زي الزهر
انا انصحك متكلفش نفسك في العزل بس كلف نفسك في اظوات سباكه محترمة وصنايعي كويس وتجيب الشركة المصنعه للمواسير تعملك اختبار

المشكلة أن بتاع المحارة عمل عليها اسمنت و كلمت الشركة مرتين و كلمة فنى المعاينة فى باننجر قالي مش هقدر انزل الاسمنت و كل صنايعي خايف ينزل الاسمنت منها عشان متكسرش اعمل ايه بقى ؟

**HeMa_LanCeR** · 07-11-2016 01:57 PM

المشاركة الأصلية كتبت بواسطة egyarmy

المشكلة أن بتاع المحارة عمل عليها اسمنت و كلمت الشركة مرتين و كلمة فنى المعاينة فى باننجر قالي مش هقدر انزل الاسمنت و كل صنايعي خايف ينزل الاسمنت منها عشان متكسرش اعمل ايه بقى ؟

ومين قاله في اسمنت ؟
انت هات الفني وخليه يضغط ومش لازم يختملك الشهاده المهم ان انت تطمن ولو في تسريب هيبان من الاسمنت طبعا

**EgyArmy** · 08-11-2016 01:12 AM

المشاركة الأصلية كتبت بواسطة hema_lancer

ومين قاله في اسمنت ؟
انت هات الفني وخليه يضغط ومش لازم يختملك الشهاده المهم ان انت تطمن ولو في تسريب هيبان من الاسمنت طبعا

للاسف شركة باننجر حاليا بتبعت معاينه الاول واحد بمجرد النظر كدة و معاه كشاف بيبص على العيوب و يقولك دى تتغير او سليمه بقلم ماركر بيعمل دايرة على الغلطان و خط على السليم فعرفوا من خلال اول معاينه فى الببيت عشا ن كدة مرضوش يجيبوا الكبس