الموضوع: مساعده فى الشراء من الخارج

عن تجارب سابقة مع على اكسبريس :حاتدفع بالفيزا وبتكتب طبعا عنوانك إللى حاتجيلك عليه ورقم التليفون الموبيل - وبعدين الحاجات بتوصل على البريد السريع أو البريد المصرى أى حاجه منهم بتقوم بتخليص الجمارك لو البريد السريع حتلاقيهم بيكلموك وياخدوا معاد علشان يوصلولك المشتروات لغاية باب البيت وبتدفع الجمرك عند الإستلام - لو البريد المصرى حتلاقيهم باعتينلك إخطار تروح مكتب البريد اللى انت تابع ليه تستلم الحاجات بتاعتك وتدفع برضه الجمارك وانت بتستلم - الحاجات بتوصلك فى خلال من شهر الى شهرين .

تقييم البائع ٩٨,٦٪ وده تقييم كويس
الفيزا أو الماستر بتتعمل من بنك تكون محول عليه مرتبك وبيصدروا ليك فيزا بتشترى بيها من المحلات او بتقبض بيها من الماكينات او بتشترى من على النت - اعتقد ان دلوقتى بعض البنوك عامله عليه قيود فلازم تبلغهم بانك حاتشترى بيها من عالنت وانت بتعملها او ممكن هما يصدرولك فيزا بقيمة معينة ماتزيدش عنها .
اختيار البريد السريع ده مش بنقدر نحدده كمشترين ولا بائعين لكن الشركة اللى بتنقل الحاجه هى اللى بتحدد - وسواء كده او كده الحاجات بتوصل وبيدفعوا جمركها وبيخطروك تليفونيا او باخطار كتابى وبتجيلك عالبيت او بتروح البريد التابع ليك تستلمها لأنهم عاوزين يحصلوا فلوس الجمرك اللى دفعوه منك فلازم حايخطروك.

الـ postal code هو اللى شغال بالنسبة لمصر وده الرقم البريدى لمنطقتك وبتعمل بحث على الجوجل بجملة
Egypt postal codes حايطلعلك مواقع كتير تخش اى موقع وتشوف كود البريد لمنطقتك او للحى بتاعك وتكتبه أو تخش على الموقع ده تعرف الكود البريدى بتاع منطقتك
الرقم البريدي المصري | Egypt Postal Code
. بالنسبة لاستخراج الفيزا فبتروح لكذا بنك تسأل فيهم فى خدمة العملاء وتشوف انسب شروط ليك .
وحتختار AliExpress Standard Shipping لانه الارخص

المشاركة الأصلية كتبت بواسطة smsm2015

طب باشمهندس لو انا عمات فيزا ب 1000 ج مثلا والحاجة اللى جبتها 700 ج هل ممكن اسحب ال 300 ج عادى من اى ماكينة صرف ولا مينفعش واسف جدا لازعاج حضرتك

حضرتك لو حاتحول مرتبك على البنك من حقك يطلعلك كارت فيزا او ماستر بقيمة مرتبك تقبض بيه من الماكينة او تشترى بيه حاجات من كارفور او اى محل تانى مثلا - او تشترى من على النت بس تقول للبنك انك حاتشترى بيها من على النت. والكارت ده بيفضل شغال طول مافيه فلوس فى حسابك ومابياخدوش عليه ارباح .
فيه بنوك ممكن تعملك فيزا تانية بضمان وديعة مثلا او بدون ضمان على حسب سياسة البنك وظروف عملك - دى بتبقى زى ماتكون بتشترى شكك أو بالتقسيط وبتدفع نسبة ارباح للبنك بتبقى ١,٥٪ فى الشهر وبتدفع من المبلغ كل شهر حوالى ١٠ ٪ لو فيزا و ٥٪ لو ماستر .
حضرتك لازم تلف شوية عالبنوك وتاخد فكرة لان مش كل بنك زى التانى .