الموضوع: هل الجين2 لفئة الشباب فقط...... ام لا؟؟؟؟

المشاركة الأصلية كتبت بواسطة Terrible_DaRsH

بس اولا واخيرا انا مش بقلل من العربية دى يا سيدى وقلت فى المشاركة الاولى كده ...
والله عربية محترمة وكل حاجة ...
بس ميزة العربية دى انها ( امكانيات وقوة مقابل سعر) بمعنى ان العربية دى لو كانت اغلى شوبة محدش كان اشتراها ولو ارخص كانت الناس كلها اشترتها ..وربنا يبارك لك فى الجنجن بتاعتك:k10: .. .

بُص يا باشا العربية دي فعلا لو أغلى من كدا مكنش حد هايشتريها
مش علشان هي ما تستاهلش
لاءة علشان عليها علامة بروتون اللي محدش في مصر يعرف عنها حاجة

العربية دي لو إنتاج مصنع مشهور بالأداء ده مع وجود تقفيل أحسن من كدا و كمان أغلى من كدا
كانت باعت بالهبل بالهبل ...لأن علشان تعرف العربية لازم تركبها
أنا ركبت عربيات كتيرة و منهم على سبيل المثال أوبل فكترا
و أقدر أقولك .............بدون مبالغة و الله
العربية في الأداء و الثبات .......... زيها زي العربيات الغالية عنها زي الأوبل فكترا مع أختلاف أن موتور الأوبل أنعم من موتور الجين 2 و قاعدة الصالون أحسن من قاعدة صالون الجين 2
إنما في الثبات و الأتزان على الطريق و قوة صاج مع وجود الكم الهائل من الكماليات

العربية دي بجد ينقصها حاجة واحد فقط
جودة تقفيل أحسن من كدا و خي تكتسح بجد لأن 100 % من الشكوى من العربية في التقفيل فقط ....... و محدش أشتكى من موتور أو من عفشة

حاجة كمان أحب أقولها
العربية نازل منها الفاس ليفت 127 حصان برة مصر ( ممكن ينزلمصر السنة اللي جاية )
و دي لما تنزل ....... هاتقطع السوق لو نزلت بسعر منافس
لأن جودة التقفيل فيها أحسن من الجين 2 الحالي و كمان موتور 127 حصان هاتنزل تنافس عربيات جامدة مع إمكانياتها ..........

أنا عايزك تركبها و تجرب و تقولي ايه رأيك

و محدش قال أنها الأفضل
أحنا بنقول هي أفضل صفقة ........ قيمة مقابل سعر مقابل أداء = روعة
مع الاعتراف بوجود بعض عيوب التقفيل عند بعض الناس مش كل الناس

هي دي قصة الجين 2

عايز كمان أقولك إن فيه عربيات في السوق أقل منها بكتير ......و بتتباع أغلى منها و بإمكانيات أقل و مع ذلك بتتباع و الناس متهافتة عليها
ليه ؟؟؟
علشان عليها أسم ماركة مضمون ........ مع أن العربية يجب أنها تقل على الأقل 10 إلى 15 ألف ..... بس بقى الأسم له السحر

كلامي ده يا جماعة مش معناه أن الجين 2 أحسن من كل العربيات اللي في السوق
أنا بكرر تاني الجين 2 كصفقة .......... صفقة ممتازة
سيارة حلوة جدا + ثبات عالي + أداء محترم + اعتمادية - جودة تقفيل + سعر ممتاز = الجين 2

و مش معنى كلامي أنها أحسن حاجة في السوق كسيارة و بكرر تاني
هي أحسن كصفقة
إنما كسيارة يمكن مقارنتها بسيارات كتير و ممكن السيارات التانية تكسب مبس لازم تكون حاجة عالية في الفئة علشان نقدر نقارن و أنا شايف مثلا أن أحسن حاجة في الفئة الحجمية ( و ليس السعر فقط ) مع السعر في المستوى ده هم
الجين 2 و الواجا و البيرسونا والنيسان صني و الكيا سيراتو
عربيات محترمة جدا و في فئة حجمية أغلى من اللي هما فيها ........... و بسعر منافس جدا
يعني مثلا النيسان صني و السيراتو و الواجا في فئة السيارت الكورولا و السيفيك و الحاجات دي
و لكن أنظر إلى فارق السعر ..... و لا يوجد فارق كبير في الجودة أو الأداء
نيسان صني 118 حصان و موتور محترم جدا و سيراتو 124 حصان و تقفيل رائع و السعر منافس للسيارتين
و معاهم بروتون بس أنا شرحت على السيارتين دول علشان الناس متفهمنيش غلط و تفتكر إن أنا منحاز لبروتون بس
أنا بنحاز لأي عربية منافسة في امكانيتها و سعرها و جودتها

و هذا ليس تقليل من السيارات الأغلى
أنا عارف ليه العربيات اللي أنا ذكرتها أغلى من العربيات اللي قارنت بينها
علشان فارق العملة الكبير و فارق أسعار العمالة في الدول المنتجة للسيارة و فارق أسعار الضرائب في الدول المنتجة عن بعض
يعني فيه فارق بين أسعار عملة كوريا و ماليزيا عن اليابان و فارق في أسعار الضرائب و فارق في أسعار العمالة العالي في اليابان مما يرفع السعر بالاضافة إلى جشع الوكلاء المحليين لما عربياتهم يكون عليها إقبال

و هذا رأيي و ضحته مرة تانية بتفاصيل أكتر علشان الناس متفهمنيش غلط

اكيد جين 2 تنفع للكبار برضو

اللي يأكد كامي شفت رجل سنه حوالي 45 ل 50 سنة راكب هيونداي كوبيه (مبهزرش)

يبقى اكيد الجين 2 تنفع للكل بس الشباب هيعجبوا بيها اكتر

المشاركة الأصلية كتبت بواسطة Terrible_DaRsH

طب يا استاذ توت اثبت كلامك ده واعمل موضوع مقارنة فى الفئات السعرية والامكانيات للسيارة دى ...
وحط معاها السيارات الاغلى قليلا والارخص قليلا ونشوف مين الاحسن والافضل ...
اجمع معلومات عن باقى السيارات وحطهم كلهم فى موضوع واحد ...
وصدقنى والله اتمنى تفوز الجين تفوز خصوصا على الفيرنا ...
ولازم انت اللى تعمله لانك من مالكى السيارة ...

يا باشا أنت مفهمتنيش

ايه اللي جاب الفيرنا في النص .... هي علشان بتطلع من الجين 2 ؟؟؟
و بتطلع برضه من عربيات تانية كتيرة زي الأوكتافيا مثلا
طيب ليه
علشان العربية فيها موتور حلو و قوته متقاربه مع أغلب العربيات 1600
بس وزنها أقل من أغلب العربيات على الأقل 100 كجم أو أكتر قليلا
و ده بيديها قوة دفع رهيبة علشان وزن خفيف ..... و أنا مش هاتكلم عن الثبات و الكلام ده


-----------------------------------------
عايز تقارن أنا تحت أمرك
لو نفرض مثلا أن الجين 2 نزلت مصر بتقفيل أحسن من كدا و متساوي مع سيارات أحسن منها في التقفيل و لا يوجد أدني مشكلة و بالسعر ده
طيب مين العربيات اللي في فئة الجين2 الحجمية اللي ممكن نقارنها بيهم
هي السيارت السيدان الصغيرة compact sedan
مثل المازدا 3 مثلا مع وجود فارق في الحجم لصالح المازدا 3
و لكن في النهاية بيتم تصنيف على أساس الحجم ده
طيب تعالى نقارن
موتور ...... متقارب قوي 110 للجين و 105 حصان للمازدا
الثبات و الأتزان ....... متساويين و طبعا ثبات رهيب
نقطة تفوق المازدا هي التقفيل الرائع و خامات الصالون الممتازة
الكماليات مش نقطة مقارنة قوي غير لما بنتكلم عن السعر
ده طبعا غير الحالة النفسية لما واحد يكون راكب ماركة مشهورة قوي و ده بتفرق عند الناس اللي موضوع الماركة بيفرق معاهم قوي

ده رأيي مثلا لو قارنه الجين 2 بالمازدا 3

--------------------------------

ممكن نبص على ماركة تانية في نفس الفئة الحجمية
نيجي للانسر الشكل القديم اللي هو بيسموه البوما تقريبا
الموتور مواصفات مصر 104 حصان و مواصفات الخليج 120 حصان و الجين 2 موتورها 110 حصان ..... يعني فيه فرق بس مش رهيب لصالح أو على الجين 2 حسب مواصفات اللانسر
الثبات و الأتزان أعتقد أن أغلب الناس متفقة أن الجين 2 أكثر ثباتا من اللانسر
الأهم نقطة الضعف الدائمة في الجين 2 بمقارنتها بعربيات أغلى منها
جودة التقفيل و خامات الصالون .....أنا شايف أن خامات اللانسر الداخلية مصنوعة من الجلد الرائع و التقفيل جميل


في النهاية فرق السعر أنا شايف أن ما يستاهلش
و ده رأي شخصي

أما بالنسبة للصني فهي أكبر من الجين 2 و تتقارن بالكورولا و السيفيك و مفيش فرق بينهم غير أن الصني تجميع محلي و ده بيبين فرق السعر ما بينهم
يعني الصني لو نازلة ياباني كاملة ..... كانت هاتبقى في فئة سعرية تانية
و مع ذلك أن شايف ان الصني المصري ممتازة و ما هي إلا مشكلة نفسية خوفا من التقفيل المصري

بس لو فيه أي عربيات تانية حضرتك عايزني أقارن بينهم و ما بين الجين 2 أنا تحت أمرك

في الأخر أنا أيه اللي خلاني أقول أن الجين 2 فئة محترمة

موتور محترم و إن كان فيه منافسين عندهم مواتير محترمة برضه و فيهم الأفضل من موتور الجين 2

ثبات رهيب رهيب بمعنى الكلمة و إتزان رائع لا تجده إلا في السيارات الغالية السعر

طبعا كماليات كتيرة و محترمة

صاج قوي و محمل ..... مش علشان يستحمل في الحوادث علشان في الحوادث كله زي بعضه و لو أن الحوادث الخفيفة بيستحمل معاك فيها
بس هو صاج قوي علشان يستحمل معاك شوارع البلد اللي أحنا عايشين فيها و مش من أي لمسة يطبق

طبعا النقطة السلبية في المقارنة فقط
هي ان خامات الصالون أقل من العربيات الغالية اللي في فئتها الحجمية
و برضه مشكلة جودة التقفيل اللي ناس كتير بتشتكي منها

إنما الجين 2 كعربية و ركوبة ........ فعلا محترمة و باين قوي تأثير لوتس الرياضي في العربية من ناحية الثبات و الاتزان و المناورات