ارجو الافاده.. غيرت جوان وش السليندر فى الفليشيا و لسه الميه بتنقص و بتدخل على الزيت.

السلام عليكم ورحمة الله وبركاته
معايا فليشيا ٩٦ و جلدة الكوع الى ف الريدياتير ضربت و نزلت الميه كلها و للعربيه سخنت المهم وظيتها للميكانيكى وقالى انه غيرها قولت تمام .. تانى يوم روحت مشورار و حصلت نفس المشكله و الجلده ضربت تانى لكن كانت العربيه سخنت اوى .المهم جبت جلده اصليه و ركبتها و غيرت زيت .لغايت هنا تمام اوى . تانى يوم لقيت الميه نقصت ف القربه للنص و بشوف مقاس الزيت لقيت طحينه روحت للميكانيكى قالى جوان وش سلندر وفعلا حل الوش و غير الجوان و قفل وطبعا غيرت زيت و فلتر ومشيت .. تانى يوم لقيت طحينه برده والميه ناقصه ف القربه .روحت الباشا تانى قالى الوش عاوز يروح المخرطه ولو ما نفعش يبقا نجيب وش جديد و هيا بايته عنده دلوقتى و بصراحه بالموضوع ده قلقنى جدا خصوصا أن أنا فلشياوى جديد و غير كده اول مره ابات و عربيتى بعيد عنى ارجو الافاده من اهل الخبره واسف على الاطاله

معلش يا باشا و ربنا يعوضك خير ان شاء الله مبدئيا الميكانيكي الي حل الوش و غير الجوان مشفهوش ازاي انو محتاج يتخرط ولا لا احكيلي الموضوع دار ازاي و قالك ايه لان من كلام حضرتك هوا حل و غير الجوان و ركب تاني نيجي بقا لموضوع الخراطه لما بيحل حيشوف الوش ان كان متكحت جامد (مبشور ) في الحاله ديه حيطر يخرطو و شوف ان كان بيتعامل هوا مع مخرطه ولا انتا الي حتخدو تعملو عموما الموضوع حيكلف في حدود ٣٠٠ او ٢٥٠ جنيه و خليه يشوفلك الصبابات كمان كويسه ولا محتاجه خرط و اعملها بالمره و حتكلف في حدود ٢٠٠ او قلل و في سؤال تاني لما عمهالك اول مره كان في جوان واحد راكب ولا اتنين و لما صلحها ركب واحد ولا اتنين برضو و انا متابع معاك ان شاء الله

هوا لما حل الوش جبتله جوان جديد و لقيته بيغير علطول قولتله الوش تمام ولا محتاج مخرطه قالى لا الوش تمام و لما رجعت له قالى كده الوش محتاج يتمسح ف المخرطه واحتمال نجيب وش جديد قلت استر يارب .. المهم مسحه ف المخرطه و قالى انه كان مقفع من للحراره و لحم طبتين وركب جوان جديد و قالى انتى بيها ولو جابت ميه تانى ع الزيت يبقا الفارغه كمان قفعت و دخلنى ف متاهه ... وعلى الاسعار الى حضرتك بتقولها دى واضح انى وقعت ف جزار مش ميكانيكى الموضوع كده متكلف معايا حوالى ٩٠٠ جنيه منهم ٥٠٠مصنعيات والباقى زيت وفلاتر و مخرطه و جوانات

وهوا جوان واحد الى كان راكب و غيره بجوان واحد برده حتى قولتله نركب جوان دبل او جوانين قالى لا بدل مش بتمسك حراره خلاص .. المهم انا لسه يتابعها و بتابع الميه و يارب تتظبط بس انا حاسس ان الميه بتنقص حجات بسيطه كل مشوار و مش عارف فى الحاله دى هيكون ايه الحل وشمرا على اهتمام حضرتك واعذرنى فى قلة الخبره

نصيحه غير الصنايعي ده وماتروحلوش تاني تحت اي ظرف
الميه بتنقص حاجات بسيطه ممكن علشان كان في هواء في الريداتير
اهم حاجه لاحظ الحراره وماتقلقش

رأيي نفس رأي السيد بلوميل
أفضل تغير الميكانيكي لأنه أولا خلاك غيرت جوان و زيوت و ضاعوا بدون داعي و فتح أكتر من مره
ثانيا المفروض طالما فتح يراجع وش السلندر كان يشوف الصبابات بالمره
ثالثا بياخد فلوس كتير مع إنه صنايعي تعبان

تمام انا هغير الصنايعى لكن المشكله ان الحال لسه كما هو والميه بتدخل على الزيت والزيت والحديد الى حطيته امبارح جاب طحينه و كلمته قالى كده الفارغه بتاعت الماكينه قفعت او مشرخه و لازم نجيب ماكينه تانيه وانا خايف اروح لواحد تانى و يجرب تانى و نصرف تانى و نرجع لنفس النقطه ف الى انا عاوز اعرفه هوا :-
(١) هل تحت اى ظرف من الظروف الماكينه ممكن تبوظ و نحتاج ماكينه تانيه ؟
(٢)سعر ماكينه اسكودا فليشيا ٩٦ استعمال كام تقريبا بسعر اليوم وافضل مكان اشترى منه مع العلم انى من المحله الكبرى
(٣)ولو الفارغه مقفعه هل من الممكن علاجها بجوان دبل او جوانين ولا ايه بالظبط
ارجو المشوره علشان أنا هتحرك بكره إن شاء الله على ضؤ افادتكم و جزاكم الله كل خير

وبالنسبه للحراره مش بترفع ووضعها تمام آخرها من ٧٠ ل ٩٠ مش بتزيد عن كده لكن المشكله ف الطحينه

بس يا باشا هيا لو وصلت ٩٠٠ الشغل الي في العربيه مش كتير اوي لكن مصنعيه ٥٠٠ ده كتير اوي اوي حاول تغير الراجل ده في اقرب وقت عموما انتا كنت محتاج جوانين مش جوان واحد وقت التركيب عشان تعوض الفرق الي اتشال في الخراطه و مكنش حيفرق معاك في الحراره لكن خلينا نتكلم علي حاله العربيه دلوقتي اهم حاجه متطغش علي العربيه عشان لازم تتلين شويه بعد ما عملها بنسبه للحراره هيا كده معقوله مش وحشه اهم حاجه تكون لمبه الزيت مش منوره اما بالنسبه الطحينة ممكن تكون من اثر ما باظت اخر مره

يا استاذ بهاء انا لما غيرت جوان تانى مره الميكانيكى حطلى زيت غيار نضيف ومشيت عليها يوم كغسيل الماكينه من الميه الطحينه الى كانت فيها ونزلت الزيت ده امبارح و حطيت زيت جديد و فلتر جديد يعنى المفروض مفيش اثر القديم والصبح بشوف مقاس الزيت لقيت طحينه خالص زى اول مره لكن منسوب الميه ف القربه مقلش كتير زى الاول . كنت حاطط ميه على علامة الماكس ولقيته قبل المينى بحجات بسيطه .. لو دا عادى وومكن يروح لوحده يبقا كده اطمئن لكن لو لسه الميه بتتسرب على الزيت يبقا لازم اشوف حل ولما كلمته تانى ف الجوانين قالى ان الوش ما اتشالش منه حجات كتير ومش محتاجه جوانين وكل كلامه منصب على أن العيب فى الفارغه مش ف الوش ،،

لا الميه الي بتنقص كتير اوي كده اتاكد ان مفيش حاجه بتسرب عشان تحكم كويس ققف في مكانك لحد ما تسخن و حركها و اتاكد انها مش بتنزل ميه من الطرمبه مثلن او من اي حته تنيه و شوف ان كانت بتنزل ميه من الشكمان ولا لا و سعتها حنعرف نحكم و لمبه الزيت ايه نظمها ؟

هوا انا متاكد ان مفيش تسريب من اى مكان وانا روحت النهارده الميكانيكى تانى ف قالى ان فيه تسريب بسيط وكان المفروض الميكانيكى الاولانى يحط جوانين بدل جوان و حط بدره فى الريدياتير و قال ممكن تمنع التسريب و لو ما منعتش يبقا هيحل تانى و يشوف ايه المشكله بالظبط وما اخدش منى فلوس ههههههههههههههههههه علشان كده انا حبيته اوى وربنا يجيب على أيده الشفا دعواتك..

معلش بقا الي حصل حصل و ربنا يسهل ان شاء الله و انا معاك عموما لو في حاجه

الحمد لله المشكله تقريبا اتحلت .. البودره الى حطيته فى الريدياتير تقريبا منعت تسرب الميه على الزيت و القربه معدتش بتنقص و مازالت تحت المتابعه وشكرا على للمتابعه و للاهتمام

الحمدالله و ان شاء الله تكمل علي خير

بما انى كان معايا فيليشيا وعملت معايا كل الحركات الدنيئة مع انها ماشية 100 الف فقط فهيجبلك من الاخر : اولا لازم تروح لميكانيكي عنده ضمير وفاهم ومايجربش فيك وسبب الطحينه هو جيوان وش سلندر اذا كان وش السلندر سليم وللاسف ان غالبية السيارات الفيليشيا وش السلندر بتاعها مابيكنش سليم لان خامته انتامونيا رديئة جدا فهتبقى المشكلة عندك وش سلندر ادى لتلف جيوان وش السلندر حل المشكلة بأبسط الطرق هتجيب وش سلندر استيراد يكون السطح بتاعه مفهوش تعاريج نتيجة المياه ولاخراطة نتيجة اعادة احياؤه يعنى وش استوك سليم مش محتاج مصروف ولا فيه لعب وده اي ميكانيكي هيعرفه علطول اول مايمسكه في ايده تمنه 700 ج في عزبة شلبى هتركبه ومعه جيوان جديد وطبعا بعد مالميكانيكي ينضف العربية من اثار الطحينه وتركبه وان شاء الله تنساها ., الملاحظة التانيه بالنسبة للعداد لازم تكشف عليه هو شغال فعلا 70-90 ولا لا لان الفيليشيا احيانا بتكون سخنه وعدادها يديك 90 وهو بيكون 110 وده تعرفها لما تشغل العربية وهي باردة وتشوف المروحة اشتغلت على كم وتستنى لما تفصل وتشوف فصلت على كم في جو لطيف مش مشمس عشان المروحة تشتغل وتفصل براحتها ., ثالثا وده النصيحه : مواتير الفيليشيا ونظام تبريدها اثبت فشل تام في البلاد الحارة وهي شكوى متكررة جدا لان السيارة مصممة للدول الباردة جدا بخامات معينه تؤهلها انها تسخن بسرعه عشان تواكب البرودة الشديدة الى عندهم وماتصلحش في مصر حتى لو مشيت معك كويس فترة هضايقك فترات فصلحها واخلص منها ..

كل الى حضرتك قولته ده كلام زى الفل يا استاذ تامر و انا معاك فى كل حرف وبالنسبه لعداد الحراره انا كشفت عليه اول ما حييت العربيه و هوا تمام و المروحه بتشتغل على ال ٧٠..
اما المشكله الى أحب اضبفها على كلام حضرتك ان لو الوش سليم ممكن تكون الفارغه هيا الى فيها ميل او تقفيع اعتقد أن علاجها هوا تركيب جوانين بدل جوان واحد ودا بيساعد كتير فى حل المشكله .. اما بالنسبه للماكينه فهيا والله ماكينه جميله و سحبها حلو و كفايه انها كاتينه جنزير يعنى صعب جدا تبوظ .. بس كل ده فى مقابل عيبها الخطير انها مصنعه من الانتيمونيا و مشكلة الحراره تخليها لا تسوى شئ..
انا شخصيا بحب العربيه دى جدا و ناوى اقنيها لكن خايف الموضوع يتكرر و ربنا يستر .

كلام حلو والله بس انا عاوز اقولك اني جايب العربيه بتعتي زيرو ١٩٩٨ و مكنش فيها اي مشاكل في الحراره لحد ٢٠٠٤ ٢٠٠٥ الموضوع بس ان الحجات الي فيها بتبوظ زي ما اي حاجه بتبوظ مش اكتر