المشاركة الأصلية كتبت بواسطة خالد
بالنسبة لموضوع التكييف مش متأكد منه ، ولكن أنا كل العربيات اللى شفتها كانت من غير تكييف ،وفى المعرض ماجبش سيرة عنه
ومسألش عايزها بالتكييف ولا لأ ، فأعتقد أن كلام الأستاذ معاذ هوة اللى أقرب للدقة
وبالنسبة لشروط التقسيط
المعرض زى ماقلت كان " المحمل " ، فيه فروع له 2 فى ميدان الحجاز ، 1 فى نهاية شارع الطيران
فيه أنظمة تقسيط كتيرة على حسب الحالة
أولاً أنسى خااااااااااااااالص اللى مكتوب فى أعلانات الجرايد عند كل المعارض
النظام الأول بضمان الوظيفة ويشترط فيها خطاب بمفردات المرتب ، ويكون المرتب 3 أضعاف القسط اللى هاتدفعه ، الفايدة السنوية على الأقساط تقريباً 9 % ( وخلى بالك المعرض ده بيتعامل مع كذا بنك ، ونسبة الفوايد بتختلف من بنك لاخر)
ممكن نظام تقسيط تانى بضمان البطاقة الشخصية فقط وإيصال كهرباء أو غاز ، ودى لازم تدفع مقدم 40 % على الأقل من تمن العربية والباقى أقساط زى ماتحب من سنه لغاية 5 سنين ، والفايدة هنا بتعلى قوى بتكون بين 11- 12.5%
ممكن نظام تقسيط تالت بضمان وديعة فى البنك بقيمة العربية
على فكرة فى أماكن تانية بتتعامل مع البنك العربى الأفريقى بنفس شروط التقسيط والضمانات ولكن الفايدة 8% بس ،
وياسلام لو تتعامل مع بنك ناصر الأجتماعى الفايدة 6 % بس ، ولكن بعض التعقيدات الحكومية زى لازم ضامن موظف حكومة ، ومرتبك انت يتحول للبنك
بس خلو بالكم ياجماعة من موضوع التقسيط ده لأنه متعب شوية وكل الضمانات فى أيد البنك ومش فى أيدك أنت حاجة خالص
مثلاً بتمضى على شيكات للبنك بقيمة الأقساط ومبتخدهاش لما تسدد القسط شهر بشهر ، بتخدهم كلهم مرة واحدة فى نهاية السداد !
ثانياً بتعمل توكيل للبنك بحرية التصرف والبيع للسيارة وقبض التمن وإستخراج الرخصة واللوحات المعدنية والتجديد للترخيص ، والتوكيل لايلغى ألا بموافقة البنك ، يعنى لفيت الحبل حولين رقبتك وفى أيديهم همة التحكم الكامل ، يعنى ممكن لاقدر الله حصل حاجة وسددت كل الأقساط ممكن البنك يساومك مثلاً على التوكيل اللى أنت عامله ومفوضه فيه بالتصرف الكامل فى العربية ومتقدرش تلغى التوكيل ده وأنت اللى عامله بأيدك ليهم
طبعاً كل الحاجات دى ماظهرتش ألا بعد ماأستلمت العربية ودفعت المقدم ، ومفيش معاك ورق للعربية غير إيصال أستلام بس ومستنى رحمتهم علشان الترخيص !