الموضوع: تجربتى اليوم مع اجراءات و مصاريف تجديد رخصة السيارة

السلام عليكم .... النهاردة جددت رخصة عربيتى النوبيرا 2006 و فيما يلى كافة الاجراءات و النفقات لكى تعم الفائدة:-
1- قبل التوجه للمرور عديت على شركة مصر للتامين و اشتريت وثيقة التامين علشان بخاف ليكون مكتب التامين اللى فى المرور قافل و سعر وثيقة التامين لمدة ثلاث سنوات 203 جنيةعلما بان سعرها عند ترخيص العربية اول مرة فى اواخر 2005 كان 88 جنيه للثلاث سنوات.
2- بعدين توجهت لشركة بافاريا و اشتريت طفاية علشان مكانش عندى , ثمن الطفاية 121 جنيه , بعدها روحت نيابة المرور جبت شهادة المخالفات.
3- طلعت على ادارة المرور (مرور اسيوط) و دخلت على شباك تجديد التراخيص و الموظفة المختصة كتبتلى الورق المطلوب شراؤه فى ورقة من عندها.
الورق المطلوب شراؤه بيشترى من الخزنة و ثمنه 23 جنيه.
بعدين قلولى روح اشترى الشنطة من عند الاستاذ محمود , رحت للاستاذ محمود ادانى شنطة معفنة قيمتها لا تزيد عن 3 جنيه لكن المرر بيبيعها ب 12 جنيه , و لما سالت ايه لزمتها قالولى ان ملف كل عربية من هنا و رايح لازم يكون جوه شنطة مقفولة علشان مفيش حاجة تضيع.
4- رحت عند الراجل بتاع البوية كتب اسمى و رقم العربية على الشنطة و لهف 5 جنيه.
5- روحت بالورق و الشنطة عند الموظفة المختصة اللى فى الشباك فاخذت الورق كله و اديتنى نوذج الفحص و قالتلى روح افحص و تعالى.
6- الفحص مكون من 4 مراحل المرحلة الاولى فحص الطفاية و التاكد من صلاحيتها و طبعا لازم الموظف المختص يمسك الطفاية و يعمل فيها خبير الخبراء و يقول مالها خفيفة كدة (مع انى لسة شاريها)
المرحلة الثانية مرحلة اخذ البصمة من الموتور و الشاسية , و المرحلة الثالثة مرحلة المهندس الفنى اللى اصبح دوره حاليا هو التاكد من عدم وجود فيمية او زينون او تغيير فى الوان اللوحات , اما المرحلة الرابعة فهى مرحلة البيئة (ده اسمها) و فيها يتم ادخال خرطوم طويل متصل بشاشة كمبيوتر بداخل شكمان السيارة و طبعا تسعين فى المية من العربيات بيتقال لاصحابها صلحوا الشكمان و اضبطوا الكاربيراتير (مع ان العربية انجكشن) و تعالوا بكرة.
7- بعد انتهاء كل مرحلة من المراحل السابقة لازم الضابط اللى فى ميدان الفحص يمضى , يعنى بيمضى اربع امضاءات , و بعد اخر امضاء بياخد نموذج الفحص و بيبعته مع موظف من عنده لموظفة الشباك.
8- روحت لموظفة الشباك لقيت نموذج الفحص وصل عندهاو اخذت منى وثيقة التامين و الرخصة القديمة و صورة البطاقة و شهادة المخالفت و كتبتلى اذن دفع فى الخزينة بمبلغ 681 جنيه + طوابع شرطة بعشرة جنيهات.
9- دفعت فى الخزنة و جبت الايصال للموظفة المختصة فاديتنى ورقة روحت بيها لمظف الكمبيوتر و بناء عليها طلعلى الرخصة الجديدة من عنده.
يوم صعب و عزائى الوحيد انه مش بيتكرر الا مرة كلا ثلاث سنوات.