البرفيوم الاورجينال والتركيب والكوبي والفرق بينهم - حسام يونس

**Karim_Monir** · 05-12-2016 01:25 PM

نقلا عن حسام يونس

بسم الله الرحمن الرحيم
من ساعة تقريبا نزل بوست كان بيتكلم عن البرفيوم ولاحظت اهتمام وردرو كتير جدا
انا هعمل بوست للناس الي مهتمية للموضوع واسف لو البوست مش في مكانو
هتكلم عن نقطتين
الفرق بين الاوريجنال .. والتركيب
افضل اماكن تجيب منهم برفيوم تركيب
البرفيوم الاوريجنال
هوا بيبقي منتج حصري لشركة عتيقة او جديد فالمجال .. بيبقي ميزتو انو جديد مش متكرر ... وبيبقي صعب تقليدو علي الاقل اول سنتين .. وكلمة سنتين بكل ما تحمل الكلمة من معني
عندنا مشكلة ثقافة في مصر بتربط بين ثبات البرفيوم واحساس داخلي ان الازازة مش اصلية
البرفيوم عمتا بينقسم لنوعين .. ولكل نوع بيندرج تحت تلت فئات
e due perfume
e due toilet
e due natural spray
اول نوع هوا اقوي ثبات ممكن حضرتك تشوفو .. وللعلم لا يباع الا حصريا وفي فرنسا فقط بيوصل الثبات بتاعو ل 8 - 10 ساعات وممكن يوصل لانك تغسل الهدوم تلاقي البرفيوم ماسك فالهدوم برضو
وللعلم دة بيبقي ف انواع معينة ودة بيبقي مميز او بمعني اصح الشركة حابة تميز نفسها عن باقي الشركات
النوعين التانين هما اكتر نوعين منتشرين وموجودين التواليت .. ثباتو من 3-5 ساعات .. النوع الاخير للاستعمال الخفيف لا يمكن يزيد عن ساعتين ف كل حال من الاحوال
النوع الاخير هوا اكتر نوع منتشر في مصر في محلات الملابس زي Zara و pull and bear
عشان كدة البرفيوم بتاعتهم رخيصة ومش بتقعد
تاني نوع انت لازم تبقي فاهم ان البرفيوم ف الاساس الشركة بتصنفو علي انو صيفي .. او شتاء .. خفيف او تقيل دة مش بخل منهم او عفانة انها تبعلك برفيوم خفيف الفكرة هنا ان البرفيوم الصيفي فكرتو انو يديك انتعاش ويفوقك وف نفس الوقت ميعملش مكس مع العرق يبوظلك الدنيا او يقوم بوظيفة عكس وظيفتو عشان كدة معظم البرفيوم الصيفي هتلاقي ريحتها داخل فيها فواكة او اعشاب زي الصبار او التفاح النعناع معظم فئة الاكوست والجس كدة فا متفتكرش ان الازازة مضروبة لا انت بس اختارت برفيوم غير مناسب
نيجي للتركيب
90 % من البرفيوم التركيب بيندرج تحت فئة e due perfume
عشان كدة تلاقية ماسك فاللبس ليل نهار وبيبقي كارثي لما بيبقي النوع الي انت اختارتو تقيل وطلبت من الراجل بيتوصي لو مرشتش عالهدوم من مسافة متر . اللبس ممكن حرفيا يبقع
التركيب ملوش غير ميزتين الاؤل فوق خلاص معروفة والتانية رخص تمنو غير كدة هوا مليان عيوب
اول عيب موجود فالتركيب
الزفارة .. ودة بيرجع لان المحل الي بتتعامل معاة بيستورد نوع رخيص من الزيوت
الكحول .. ودي اكتر حاجة بتخليك تتهرش انك راشش برفيوم ضرب وتلاقي الي جنبك قالك دي تركيب صح ..
للاسف اول حالتين انت مش بتلاحظهم الي بيشمك هوا الي بيلاحظهم
عدم توافقية النوع الي طالبو مع الاصل ودي اكبر مشكلة بتواجهة الناس وهيا اكتر مشكلة منتشرة
السبب الرئيسي الي مخلي البرفيوم الاوريجنال منتشر ولسة لية هيبتو لحد دلوقت ان التركيب بيقدر يتوافق مع الاصلي بنسبة اقصاها 80 % لكن عمرو ما يوصل لنسبة 100 % من الاصلي عشان كدة الي بيرشش اوريجنال عمرو ما يفكر يعمل النوع الي بيحبو تركيب الا للضرورة القصوي من ارتفاع اسعار المنتج او المعيشة
تاني مشكلة ان ف انواع كتير لحد النهاردة معرفوش يركبوها ولما عرفو يركبوها كانت النتيجة كارثية بمعني انك لما بترش من البرفيوم بتشم ريحة تانية خالص .. وبعد 3-4 دقايق يبداء البرفيوم يتحول لريحة البرفيوم الي انت عايزو عشان كدة الانواع دي بالذات ترش منها وانت فالبيت وتستني شوية لحد ما الريحة تبقي الي انت عايزها وهنا انت بتفقد ميزة انك عارف انت شامم اية
امثلة علي الانواع دي (البلو دي شانيل - الوان مليون - الجوتشي جيلتي - الرالف لورين الحمرا ) الي اشتري الاوريجنال من دول وعمل منهم تركيب هيعرف كويس انا قصدي اية
عشان كدة نصيحة
اتعامل مع محل كويس لية اسمو وسمعتة في عالم البرفيوم متدورش علي الرخيص
لو المحل الي بتجيب منو جبت منو برفيوم وحسيت ان فية ريحة (عفانة ) ايوة عفانة فالبرفيوم بعد ما رشيت منو اوقف تعامل معاة نهائي
واتمني يكون البوست مفيد

**Amr_MO** · 05-12-2016 06:53 PM

جزيل الشكر على الموضوع القيم لأني كنت بدور على معلومة اكيدة منعا للغش والنصب

سؤالين:

أولا منين باه أقدر اشتري بيرفيوم أصلي أصلي وانا مغمض ومن مكان مضمون ميكونش فيه غش ويبيعلك الفيرست كوبي على انه اوريجينال؟

وهل البرفانات الي بتتباع في السوق الحرة بتاعة مصر للطيران بتبقى اصلية 100% ولا ممكن يكون فيها غش هيا كمان؟

وثانيا ايه هو باه أفضل مكان وأنضف واحد اقدر اشتري منه التركيب، مكانه فين واسم المحل ايه بالظبط؟

**dede_dodo88** · 05-12-2016 07:38 PM

المشاركة الأصلية كتبت بواسطة amr_mo

منين باه أقدر اشتري بيرفيوم أصلي أصلي وانا مغمض ومن مكان مضمون ميكونش فيه غش ويبيعلك الفيرست كوبي على انه اوريجينال؟

وهل البرفانات الي بتتباع في السوق الحرة بتاعة مصر للطيران بتبقى اصلية 100% ولا ممكن يكون فيها غش هيا كمان؟

السوق الحرة و المحلات الكبيرة المفروض بيبيعوا أصلي بس.. محلات زي مزايا, وجوه و فورتشن..

**dede_dodo88** · 05-12-2016 08:14 PM

المشاركة الأصلية كتبت بواسطة Karim_Monir

e due perfume
اول نوع هوا اقوي ثبات ممكن حضرتك تشوفو .. وللعلم لا يباع الا حصريا وفي فرنسا فقط بيوصل الثبات بتاعو ل 8 - 10 ساعات وممكن يوصل لانك تغسل الهدوم تلاقي البرفيوم ماسك فالهدوم برضو
وللعلم دة بيبقي ف انواع معينة ودة بيبقي مميز او بمعني اصح الشركة حابة تميز نفسها عن باقي الشركات
النوعين التانين هما اكتر نوعين منتشرين وموجودين التواليت .. ثباتو من 3-5 ساعات .. النوع الاخير للاستعمال الخفيف لا يمكن يزيد عن ساعتين ف كل حال من الاحوال

تاني نوع انت لازم تبقي فاهم ان البرفيوم ف الاساس الشركة بتصنفو علي انو صيفي .. او شتاء .. خفيف او تقيل دة مش بخل منهم او عفانة انها تبعلك برفيوم خفيف الفكرة هنا ان البرفيوم الصيفي فكرتو انو يديك انتعاش ويفوقك وف نفس الوقت ميعملش مكس مع العرق يبوظلك الدنيا او يقوم بوظيفة عكس وظيفتو عشان كدة معظم البرفيوم الصيفي هتلاقي ريحتها داخل فيها فواكة او اعشاب زي الصبار او التفاح النعناع معظم فئة الاكوست والجس كدة فا متفتكرش ان الازازة مضروبة لا انت بس اختارت برفيوم غير مناسب

الـEau de Parfum هو مجرد عطر بدرجة تركيز أعلى من الـeau de toilette لكن مش بالضرورة يكون أكترفي الثبات أو الفوحان, و عادي بيتباع في اي حتة في العالم لكن الـParfum الخام نفسه هو اللي ممكن بيتباع في اماكن معينة..
في عطور بتنزل بكذا درجة تركيز زي Dior Homme مثلاً, في منه النسخة العادية EDT و الـ Intense eau de toilette و الـIntense eau de Parfum و كل واحدة بدرجة تركيز اعلى من اللي قبليها و طبعاً أغلى لكن مش بالضرورة يكون العطر أقوى و مش بالضرورة كمان أن يكون ليهم نفس الرائحة على الرغم أنهم كلهم نفس الأسم لكن بدرجات تركيز مختلفة.
دايماً معروفة ان عطور الـParfum بتبقى أقرب للبشرة و فوحانها أقل من العطور المخففة EDT و هي شائعة أكتر في العطور الحريمي..
في نوعين من العطور, الـDesigner و دي من بيوت الأزياء زي Dior و Chanel و غيرهم و دول بالدرجة الأولى عطورهم بتبقى مخففة EDT, و النوع التاني هو الـNiche و دول بيبقوا متخصصين فقط في صناعة العطور و دايماً بتبقى حاجات High end بمكونات طبيعية نادرة و بنسبة مواد كيماوية أقل و طبعاً أسعارها أعلى بكتير, و منهم Creed و Amouage و غيرهم و دول بالدرجة الأولى بيكونوا Eau de Parfum..