حكايتي مع 2008 gen 2 والاستخارة (حيران خش وشوف تجربتي)

السلام عليكم ورحمة الله وبركاته
الموضووع دة كنت عايز اكتبو من زماااااااااااااااان جداً بس مرضتش اكتبوا إلا لما الناس الي حاجزة 2009 تستلم ويكتبو كلامهم عشان ميبقاش موضووع طالع في النص كدة ملوش علاقة بالمواضيع التانية
قولت اكتبوا دلوقتي عشان في ناس كتير محتارة بين 2008 و2009
ملاحظة(كلامي دة مش معناه ان نوع احسن من نوع او لون احسن من لون ودي تجربتي وخلاص يعني مش كلام معتمد على اي اسس)

بكل بساطة انا كنت محتااار بين 2008 و2009 وحجزت 2008 وبعدين غيرت كلامي ورحت حجزت 2009
(احترت جامد)
قولت اعمل استخارة بالقرعة (معرفش ايه صحتها في الشرع بس حد كان قالي عليها)
جبت 4 ورقات كتبت في 2 منهم 2008 واتنين منهم 2009 ودعيت دعاء الاستخارة
وغمضت عيني وسحبت
أول مرة طلعت 2008
قلت اسحب تاني (خليهم 3 مرات )
تاني مرة طلعت 2008
قلت اسحب تالت مرة
طلعت --------
2008 بردو (انا عيني دمعت , مكنتش متخيل ان يحصل كدا , ولا مرة 2009 مع ان احتماليتها 50 % قلت سبحان الله) وقررت خلاص هية 2008 والتوكل على الله

بدأت ادور على الالوان الي موجودة في السوق (كان نفسي في فضي أو نبيتي ولو مفيش يبقى اسود)
لقيت في السوق كلو (أبيض, شامبين, رمادي, أصفر)
احترت وقلت اعمل استخارة بردو
دعيت الدعاء وعملت قرعة جبت ورق وكتبت في كل ورقة لون مختلف وكتبت فضي واسود مع انو مش موجود في السوق
-سحبت أول مرة طلع أسود
-تاني مرة طلع فضي
- ثالت مرة طلع اسود

(مفيش فضي ولا اسود في السوق)
قلت اعيد تاني (كل دة مغمض عيني)
-أول مرة طلع اسود
-تاني مرة طلع اسود
- تالت مرة طلع اسود
سبحان الله ولا مرة طلع اي لون تاني من الالوان الباقية
قلت يبقى اسود(بس اجيبو منين مش عارف)

(كان في معرض واحد مكلمتوش كان عز العرب الصحراوي (الاستاذ محسن رد عليا )
كنت حاسس اني هلاقي الاسود
سالتو : ممكن تشوفلي واحدة سودة عندك
قالي مفيش عندي غير رمادي
حكيتلو اني محتاج اي لون غير دة
قالي مفيش
قفلت وانا زعلان واعدت ادور على معارض تانية
المهم نص ساعة لقيتو بيكلمني قالي في واحدة سودة في اسكندرية احجزهالك
متتصورووش انا حصلي ايه ساعتها
كنت هموووت من الذهووول الي حصلي
(انا طبعاً ثقتي في ربنا كبيرة وكنت عارف انوا هيرشدني للخير) بس مكنتش عارف ان الموضوع هيمشي سهل كدة
طبعاً سجدت لربنا شكر وقولتلو هاتهالي والراجل جابهالي على طول
دي حكايتي مع الاستخارة وال2008 يا رب اكون فدتكو فيها
(ارجوا اني مكنش طولت في الموضوع دة, ومقصدش اي حاجة , بس دي تجربتي)
ومستني ردكوا عليا

أعتقد ياباشا إن موضوع الورقة ده مش صحيح و الله اعلم ...... ده زي بتوع الجاهلية ( بدون أخذ الكلام على شخصك المحترم ) أنا بتكلم بس عن عادة كانت موجودة عن العرب ايام الجاهلية

و برضه الله اعلم

على العموم الف مبروك عليك العربية و ربنا يباركلك فيها و يقيك شرها و شر الطريق و يبعد عنك بتوع الميكروباصات

اخي العزيز اولا الف مبروك عالربية, بس انت حيرت نفسك زيادة, انت كنت تدرس الموضوع وتشوف الفروق بين 2008 و 2009 واعتقد من خلال المواضيع اللي هنا الكل هيفضل 2009 لاسباب كتير جدا, اهمها ان العيوب اللي كانت في 2008 اتصلحت في 2009 وطبعا واضافة بعض الكماليات, انا كنت افضل انك تجيب 2009.
بالنسبة لموضوع الاستخارة بالقرعة انا مقدرش افتي فيه, بس حاولت اعمل قرعة على 4 انواع عربيات والجين تو مكنتش ضمنها كانت ال frv من ضمنها وهي اللي كنت عايزها, وروحت وحجزت وكنت متاكد ان لو هي دي اللي ربنا كتبهالي هتكون من نصيبي والامور كلها هتمشي سهلة جدا, والبريليانس طلعتلي كذا مرة في القرعة, بس ربنا رتب بعد كدها ان الامور في البريليانس اتعقدت وسعرها ارتفع ومكنتش هقدر ادفعه وروحت سحبت الحجز وانا مش عارف اجيب ايه وكان نفسي في الجين بعد ما صرفت نظر عن البريليانس, وربنا رتب كل حاجة ودبرلي الفلوس وحجزت واستلمت بسهولة وسرعة مكنتش متخيلها.
انا بس اللي عايز اوصلهولك انك لازم يبقى عندك نقاط اساسية عند اتخاذ اي قراروتشوف هل الامور ماشية ولا في حاجة مكلكعة لو ماشية يبقى توفيق من عند ربنا ولو لا يبقى تتاني وتشوف ربنا كاتبلك ايه.
بس عالعموم كله خير من عند ربنا المهم انك معاك الجميلة, وربنا يحرسلك طريقك ويحفظك ويحفاظلك عليها.

انا اسف طولت عليكم.

الاستخارة انا مؤمن بيها جدا انما ان اختيارك للعربية و الالوان يبقى بناء على سحب ورق !!!!!
انا موش مقتنع بالطريقة دى خالص
عموما ربنا يكرمك فيها ان شاء الله و بالتوفيق

el mawdoo3 dah 3'areeeeeeeeeb awy

rabena yebareklek feha ISA

ياعم دى جت معاك كدا
يعنى الورق ملوش علاقة
عموما سيبك انتا
مبروك عليك العربية

موضوع جميل و تجربه اجمل و موضوع الاستخاره عن طريق الورق مش عارف فيه بصراحه بس المهم انك جبتها و انت مطمن ...

بص ياباشا الموضوع ولا ليه علاقة بالاستخارة اللى انت صليتها الموضوع صدفة فقط لا غير وعلامة اذن الله تيسير الامر

أعتقد ياباشا إن موضوع الورقة ده مش صحيح و الله اعلم ...... ده زي بتوع الجاهلية ( بدون أخذ الكلام على شخصك المحترم ) أنا بتكلم بس عن عادة كانت موجودة عن العرب ايام الجاهلية


+1000000

كلام مظبوط كانت كل حياتهم متعلقة بسحب واحدة من عصيتين واحدة طويلة و التانية قصيرة
طلعت طويله يعني ديه علامه الموافقة يا معلم
سحبت الصغيرة يبقي اياك تعمل كده و الا هتشوف السواد لو عانت وعملت اللي في دماغك
ياريت تاخد نتيجة السحب اللي انت عملتها علي انها حظ مش اكتر

الف مبروك جين2 الجميلة :hurray::hurray:وربنا يملها بركة عن تجربتى مع الاستخارة زى مالقتها ماشية مشيت معاها مع الثوابت الى نفسى فيها والى وقف سيبتة لحد ما اتوكلت بفضل الله وربنا يكرمنا فيها جميعا:018:
ربنا يوفق

اقتباس:

---

المشاركة الأصلية كتبت بواسطة MohamedAmonem

أعتقد ياباشا إن موضوع الورقة ده مش صحيح و الله اعلم ...... ده زي بتوع الجاهلية ( بدون أخذ الكلام على شخصك المحترم ) أنا بتكلم بس عن عادة كانت موجودة عن العرب ايام الجاهلية


+1000000

كلام مظبوط كانت كل حياتهم متعلقة بسحب واحدة من عصيتين واحدة طويلة و التانية قصيرة
طلعت طويله يعني ديه علامه الموافقة يا معلم
سحبت الصغيرة يبقي اياك تعمل كده و الا هتشوف السواد لو عانت وعملت اللي في دماغك
ياريت تاخد نتيجة السحب اللي انت عملتها علي انها حظ مش اكتر

---

+111111111

الف مبروك على العربية بس اللي انت عملته دا والله اعلم لا يجوز لانه فعلا مثل الاستقسام بالازلام

انا بشكر جميع الي شاركوني في الموضوع دة برايهم
وتعليقي البسيط:
1- انا قلت ان الموضوع دة انا عارف انو ملوش اساس يعني مفيش حاجة اسمها استخارة بالقرعة\(مفيش خلاف)
بس نقطة القرعة دي (مش حرام ) ودي في الاسلام مش تأليف والدليل على كدا
ان الرسول صلى الله عليه وسل كان بيقترع مين من زوجاته هتسافر معاه (لما بينوي يسافر)
غير كدا (قرعة الحج ) هل هية حرااام ؟؟؟ أكيد لا
غير كدا لو اي حد دور في السنة هيلاقي ان القرعة موجودة وحلال مش حرام
2- انا شايف ان الموضوع ممكن يكون صدفة (بس ليه ميكونش تقدير من ربنا) هوة ربنا مش يقدر يعمل اي حاجة (يعني زي مسهل المواضيع انها تمشي في الخير مش يقدر يطلعلك الورقة الصح الي فيه الخير)
3- انا مبعممش الموضووع عشان متكونش بدعة و(بس الاستخارة موجودة في الدين والقرعة كمان موجودة)
4- نقطة ان كل العيووب الي في 2008 اتصلحت (ملهاش اي اساس من الصحة)
اصبر على رزقك\ربنا يباركلك فيها مش قصدي حاجة بس متعرفش ايه الجديد من بروتون
5- ممكن ربنا يسهل لحد 2008 وممكن يسهل لحد 2009 واكيد كل واحد ربنا بيكتبلو الخير
بشكركو تاني يا جماعة وربنا يكرمكوا جميعا

اقتباس:

---

المشاركة الأصلية كتبت بواسطة tutankhamoun

أعتقد ياباشا إن موضوع الورقة ده مش صحيح و الله اعلم ...... ده زي بتوع الجاهلية ( بدون أخذ الكلام على شخصك المحترم ) أنا بتكلم بس عن عادة كانت موجودة عن العرب ايام الجاهلية

و برضه الله اعلم

---

انا باكد ان القرعة مش عادة جاهلية (التطير والتشاؤم والتفاؤل بحاجات معينة هية الي حرام) القرعة من الحاجات الي الرسول صلى الله عليه وسلم كان بيعملها

(وبالنسبة للمكرباصات :عندك حق ربنا يكفينا شرها كلنا ):k40:

اقتباس:

---

المشاركة الأصلية كتبت بواسطة أبومريم

الف مبروك على العربية بس اللي انت عملته دا والله اعلم لا يجوز لانه فعلا مثل الاستقسام بالازلام

---

اخي العزيز
الاستقسام بالازلام : لو في موضوع معين ومش عارف تعملوا او متعملوش وعملت القرعة
انما القرعة بين حاجتين او كزا حاجة دة مسموش استقسام بالازلام دي اسمها قرعة
(افكركوا بشوية حاجات واردة في القرآن)
1- قرعة سيدنا يونس لما اترمى في البحر (هوة سيدنا يونس مش نبي وعارف الدين مش كان ممكن يقولهم القرعة حرام)
2- قرعة الااحبار ومن بينهم سيدنا زكريا في اختيار ايهم يكفل السيدة مريم ) مش اقترعوا بردو
والسنة فيها اقتراع كتير\والله اعلم

يا جماعة بكل بساطة انا كنت عايز اوضح حاجة
ان اي حد لما يدعي ربنا بجد ومتوكل عليه هيهديه للطريق الصح
مش مهم الطريقة (قرعة ولا لا) المهم انك تكون متوكل وواثق ان الخير ربنا هيسهلهولك
انا فعلا مش قصدي ان الطريقة صح انا قصدي اعتمادنا على ربنا هوة الي صح

ايوة صح طبعا يا اخي الحبيب ان القرعة من الاسلام بس ليها شروط
القرعة لا تكون لاختيار بين شيئين ايهما فيه الخير و ايهما فيه الشر و انما تكون الاستخارة
حضرتك شوف اللينك دي:
http://www.islamweb.net/ver2/Fatwa/S...Option=FatwaId

وايضا من موقع الشيخ بن عثيمين:

والقرعة ثابتة في تمييز كل حقين متساويين لا تمييز بينهما، وهي حكم شرعي ثبت في القرآن وفي السنة، في القرآن ورد في موضعين:

الأول : قوله تعالى في يونس عليه السلام: {{فَسَاهَمَ فَكَانَ مِنَ الْمُدْحَضِينَ *}} [الصافات] .

الثاني: قوله تعالى: {{وَمَا كُنْتَ لَدَيْهِمْ إِذْ يُلْقُونَ أَقْلاَمَهُمْ أَيُّهُمْ يَكْفُلُ مَرْيَمَ وَمَا كُنْتَ لَدَيْهِمْ إِذْ يَخْتَصِمُونَ}} [آل عمران: 44] .

أما في السنة فقد وردت في ستة مواضع منها: أن رجلاً أعتق ستة أعبد، فجزَّأهم النبي صلّى الله عليه وسلّم ثلاثة أجزاء، وأقرع بينهم ليخرج الثلث فقط[(94)].

ومنها: أن النبي صلّى الله عليه وسلّم كان إذا أراد سفراً أقرع بين نسائه فأيتهن خرج سهمها خرج بها[(95)].

أما دلالة النظر على أن القرعة حكم شرعي فلأنه لا طريق لنا إلى التمييز بين متساويين إلا بهذا.

وأنكر بعض أهل العلم القرعة، وقال: إن القرعة من الميسر وأنها مثل الاستقسام بالأزلام، ولكن هذا القول مردود لمخالفته النص، ولبطلانه بذاته، أما مخالفته للنص فقد ذكرنا ما جاء في الكتاب والسنة من إثبات للقرعة، وأما بطلانه بذاته فإن هذا ليس من الميسر؛ لأننا لا نقرع إلا بين شيئين متساويين، والميسر ليس بين متساويين، نعم لو قلنا: أنتما رجلان بينكما هذا الحق مشتركاً مناصفة، ولكن سنجعله ثلثين وثلثاً ونقرع بينكما فلا يجوز؛ لأنه ميسر، إن وقعت على صاحب الثلث غُلب، وإن وقعت على صاحب الثلثين غَلب، أما شيئان متساويان فأين الميسر فيهما؟! وأما الاستقسام بالأزلام فليس كذلك، فليس هناك حقان متساويان يراد التمييز بينهما، بل هما إرادتان من هذا المستقسم، ويعمل بهذه الأقداح لينظر ماذا يُقسم له من هذه الإرادة، فبينهما فرق، وعلى هذا فالصواب أن القرعة ثابتة في كل حقين متساويين لا يمكن التمييز بينهما إلا بهذا.

بقا يا راجل تعمل استخاره على ورقه و مكسل انك تصلى ركعتين الأستخاره يا راااااااجل :N_no[1]:
عامه الف مبروك و ربنا يباركلك فيها

اقتباس:

---

المشاركة الأصلية كتبت بواسطة mbisar

بقا يا راجل تعمل استخاره على ورقه و مكسل انك تصلى ركعتين الأستخاره يا راااااااجل :N_no[1]:
عامه الف مبروك و ربنا يباركلك فيها

---

انا صليت استخارة تقريبا خمس مرات (انا قعدت حاجز العربية شهر)
الله يبارك فيك

اقتباس:

---

المشاركة الأصلية كتبت بواسطة amrrashed

بص ياباشا الموضوع ولا ليه علاقة بالاستخارة اللى انت صليتها الموضوع صدفة فقط لا غير وعلامة اذن الله تيسير الامر

---

ممكن اعرف حضرتك يعني ايه الموضوع ملوش علاقه بالاستخاره الي صليتها كدا حضرتك بتتكلم في موضوع ثاني خالص والاستخاره دي شي اساسي ربنا بيهديك بيها للي فيه الخير ليك .... فيريت منتكلمش في موضوع السنه اكدته ونقول ملهاش علاقه بالاستخاره .....
وانا شايف ان الراجل بيتكلم وبيحكي تجربته وبجد ممتعه وجتلوا العربيه بطريقه لذيذه ويمكن ده لان نيته ساعة القرعه كانت بعد اذن ربنا فربنا عمله الي فيه الخير وهو شايف ان فعلا الاختيار جيه صح فهو راضي باختيار ربنا ليه ...
ربنا يباركلك فيها ياباشا ويكفيك شرها ومواضيع حضرتك جميله ونتعرف فوقت قريب ان شاء الله ..........

مبروك عليك الجين 2 (2008) السوداء

الف مبروووك على الجين 2 و ياجماعه يارييييت منتكلمش فى الامور الدينيه هنا عشان كل واحد ممكن يطلع بى فتوه ملهاش اى اساس من الصحه و انا مؤمن بالاستخاره (الصلاه+الدعاء) و حكايه الورق اللى الاخ عملها دى مسئلة قرعه ملهاش علاقه بالاستخاره لاكن هو زود الدعاء عليها, و الف مبروووووك عليك تانى و محدش يكتب بالاحمر عشان ده لون خط الاداره على ما اتذكر

موضوع الاستخارة ملوش علاقة بموضوع الورق دا خالص على فكرة هى جت كدا معاك

الف مبروك على العربيه

ياباشا الف مبروك عليك العربية

الله يبارك فيكو جميعاً
شكرا ًعالاهتمام