اول مشاركة بس محتاج خبرتكوا؟؟؟؟؟؟؟

**shalabota** · 04-12-2008 04:19 PM

السلام عليكم اخباركوا ايه يا اعضاء اجمد منتدى للعربيات ؛دي اول مشاركة ليا في المنتدى انا مكنتش بشارك وكنت بكتفي بالقراءة فقط لاني معنديش عربية بس بصراحة انتو افدتوني جدا وانا بقى ليا استفسار بسيط انا ان شاء الله ناوي اجيب عربية بس كل اللي معايا في حدود45000 فكنت عامل حشابي على عربية مستعملة وتكون كويسة ؛انا فكرت في البولو لحد مالقيت واحد صاحبي قالي انت ممكن تجيب عربية ع الزيرو بس حتركبها كمان 3 سنين ومش حتدفع غير المقدم بس قلتله ازاي قالي هاتلك عربية واجرها لشركة بترول بس قالي لازم تكون تعرف حد هناك ؟انا الصراحة مش عارف ايه صحة الكلام ده ولو هو حقيقي حد فعلا من جوه الشركة هو اللي بيخلص ولا؟؟؟؟؟؟؟؟؟

**kimo-nubira** · 04-12-2008 04:27 PM

اولا اهلا بيك عضو كريم مابينا نورت المنتدي

نصيــــــــــحه من اخ ااشتري مستعمل تكون حالتها كويسه وابعد نهائيا عن قصه التأجير ديه فيها نصب كتير جدا

واحد صاحب اخويا خدو منه العربيه وكتبوله عقد وادوله ايجار اول شهرين بعد كده ولاشاف العربيه ولا شاف فلوس

وقلوله اخبط راسك في الحيط وعندك المحاكم ولغايه دلوقتي مش عارف ياخد عربيته ولاياخد فلوس وبيقسط تمنها كمان

ربنا يسترها معنا جميعا ويبعد عنا ولاد الحرام والنصابين

**فادى** · 04-12-2008 04:33 PM

لو افترضنا انك عرفت تأجرها فعلا لشركة بترول و شركة البترول هتوفر السائق, مع ملاحظة انو العادة جرت على تأجير السيارة بسواقها فى معظم الشركات (غالبا السواق بيكون هو صاحب العربية و بيجيبها قسط, و بياخد مرتبه + ايجار العربية), فلازم تاخد بالك انو العربية هتتبهدل و هترجعلك بعد ثلاثة سنوات جثة هامدة مهما كان نوعها و جودتها, لأن شركات البترول بتخش بيها مناطق ما يعلم بيها الا ربنا, من أول الطرق المكسرة التى تصنع من الأسفلت الرخيص سرعان بيتكسر و بيعمل حفر صعبة التجاوز, الى ال"مدقات" المصنوعة من الرمال و الزيت و اللى بتهلك عفشة اى عربية, ده غير المسافات الطويلة اللى هتقطعها العربية و ظروف التحميل غير احتمالات الغرز طبعا, يعنى العربية ممكن ترجعلك بعد 3 سنين عاملة 200 الف و عفشتها و الشاسيه بتاعها متكسر.

**shalabota** · 04-12-2008 04:48 PM

hانا كنت ناوي احط المقدم في عربية فولكس جيتا والصراحة الفكرة لعلعت في دماغي قلت اصبر 3 سنين وفي نفس الوقت اكسب قرشين حلوين بس قلت لازم اخد برايكوا الاول وع العموم الف الف شكر

**ashraflotfy1** · 04-12-2008 04:58 PM

أخى الفاضل
أهلا بك فى منتدانا الجميل و أرجو أن تكون اضافة قيمة لنا ان شاء الله
بالنسبة للتأجير لا أنصح للأسباب اللى الأخوة قبلى ذكروها
لو عاوز عربية بالسعر ده هناك الكثير مثل الدايو لانوس لغاية سنة 2000 و الهونداى أكسينت 1300 و 1500 سى سى و الفيات سيينا و الكيا ريو و نصيحة ابعد عن الصينى و الفيات القديم و خد معاك حد يفهم فى السيارت و شوف جرنال الوسيط و سوق العاشر و لما تلاقى عربية كويسة ارفعها فى محطة بنزين زى كالتكس عند مساكن شيراتون أو موبيل اللى فى الخليفة المأمون أو موبيل اللى على امتداد الاوتوستراد خلف مساكن شيراتون و لا تاخذ سيارة مرشوشة دواخل أو الكيلومتر بتاعها عالى أو متبهدلة أو فيها توكيلات كتير أو من تجار لأنهم نصابين بياخدوا العربيات الواقعة و يلصموها و يبيعوها للناس ربنا يخرب بيتهم
و لك منى كل توفيق
و أستخير و لا تتعجل
و السلام ختام

**tutankhamoun** · 04-12-2008 05:19 PM

45 ألف جنيه يجيبواك عربية حلوة
عندك دايو لانوس و عندك فيات بونتو و هيونداي أكسنت و حاجات حلوة كتيرة

ما توجعش دماغك و تدخل في حوارات ايجار
و زي ما الباشهمندس فادي ووضح ............ العربية هاترجع خردة

**ouba2** · 04-12-2008 07:01 PM

الايجار هايبهدل العربية

**ezzatfox** · 04-12-2008 07:44 PM

لو انت ضامن انك هتأجرها لشركة بترول فعلا ممكن تفكر فى الموضوع لانهم بنسبة 95% ناس محترمة و مش بيبهدلوا العربية و لا حاجة و بعدين هما مش فقرا عشان يأجروا دول معاهم فلوس تشترى اسطول عربيات بس هما سياستهم كدة .. المبانى ايجار و السيارات ايجار عشان لما يصفوا اعمالهم فى اى وقت ميبقاش فى اصول ثابتة دة غير ان اى حاجة بيشتروها بتؤول ملكيتها لجهات حكومية اخرى ودة حسب اتفاقية البحث الموقعة بينهم و بين الحكومة المصرية .
و لو فى شغل فى الصحراء او الحقول معتقدش انهم بيستخدموا العربيات الملاكى خالص بيبقى فية عربيات 4x4 او على الاقل دبل كابينة نص نقل .
بس اتأكد قبل كدة انك هتقدر تأجرها لشركة بترول .
ارجو ان اكون قد افدتك