شراء سيراميك من خورشيد

السلام عليكم ورحمة الله .
الحقيقة انا حبيت انقل للاعضاء تجربتى فى شراء السيراميك من منطقة خورشيد بالاسكندرية خصوصا بعد ان بحثت على النت عن تفاصيل تخص هذا الموضوع ولم اجد .
فى البداية انا بحثت على الانترنت عن شراء سيراميك فى الاسكندرية لقيت معظم الكلام على مكانين فى الاسكندرية . مكان فى المنشية شارع كده مش فاكر اسمه ولقيت الكلام على المكان التانى اللى هو منطقة خورشيد فقررت اتجه الى خورشيد . وفعلا توجهت الى هناك . المكان اظن معروف بتيجى عند كوبرى العوايد متطلعوش وتخش من تحته وتمشى بجوار ترعة المحمودية . منطقة شعبية طبعا . بتمشى حوالى 3 كيلو تلاقى نفسك فى منطقة كلها معارض سيراميك وهتلاقى مصنع ليسيكو نفسه هناك . طبعا فى اول الطريق بتلاقى معارض صغيرة وكل ماتكمل مشى هتلاقى المعارض الكبيرة . طبعا انا كنت معرفش حد خالص لكن سألت احد السواقين هناك لقيت اشهر المعارض واحد اسمه بطيئة هو اسمه كده بطيئة وفى واحد اسمه سلوع لقيت عنده حاجات كويسة . طبعا بعد ماتنقى السيراميك بتروح تشيل من المخازن والعربيات النقل واقفة قدام المعارض او تاخد عربية معاك وحاول تركز وانت بتحمل السيراميك انك تاخد حاجتك اللى انت منقيها يعنى مايحطش حاجة تانية . بالنسبة للاسعار كويسة وفى كل الاسعار وكذلك اطقم الحمام كله موجود .
وربنا يوفق الجميع والسلام عليكم

شكرا لنقل التجربه المفيده . حضرتك اشتريت نوع ايه والسعر كام.

فعلا هناك ارخص من السوق بكتير اوي عشان مش بيعدي علي المحلات التجزئه و الجمله

اشتريت ليسيكو مقاس 42 فرز اول كان ب44 وفرز تانى ب 39 وبلاطة جميلة جدا