استفسار عن ميكانيكي بيفهم كويس اوى في شغله وبيعرف يشتغل في الدايو تحديدا

**OSAMA.NUBIRAWY** · 05-01-2017 11:58 AM

لو سمحتوا يا بشمهندسين عايز اعرف ميكانيكي في الفيوم او بني سويف يكون بيعرف يشتغل في الدايو لان عربيتي نوبيرا 2 اغلب ميكانيكية الفيوم بيقولوا هات شورت بلوك علي طول ومن غير ما يكشفوا عليه كويس !!!!!
وروحت امبارح لميكانيكي في بني سويف قالي ممكن اعملك عمره بس هتتكلف شويه عشان هتجيب عمود كرنك استاندرد بالسبيكه بتاعته وطقم شنابر وجوان وش السلندر وممكن تدخل كمان في البساتم وكله حسب ما يفتح ويشوف الحاله ايه برضو!
والعربيه كالاتي :
كل ما ازود بنزين بتطلع دخان ازرق من الشكمان وساعات بتدخله علي الصالون جوا لدرجه اني بتخنق من الريحه + ان الموتور بياكل زيت حوالى كيلو زيت كل 300 كيلو مشي
علما بان مشاويري حوالى 40 كيلو في اليوم

وعايز اسأل هل الردياتير اجبله ميه خضرا ولا حمرا ؟
لاني محتار وكل ما أسأل حد يحيرني اكتر

واسف علي الإطاله وارجو سرعة الرد ان امكن
وشكرا مقدما لحضراتكم .

**maziz2l** · 05-01-2017 05:19 PM

السلام عليكم ورحمة الله وبركاتة بص ياباشا العمرة فيها ميزة حلوة اوي انك حضرتك بتحتفظ برقم الموتور ومش بتحتاج تثبت المكنة الجديدة علي الرخصة لكن عمرها ما تبقي استندرد زي ما هتجيب شورت بلوك بتقفيل الفابريكا بتاعة ف احسن حاجة تجيب شورت بلوك مع مراعاه مطابقه ادوات التغزية اللي هتشيلها من القديم وتحطها في الجديد زي الدينامو كومبريسور التكييف وبالنسبة للريديتيير مش شرط اللون اهم حاجة الجودة بتاعت المنتج وفي حاجة مهمه جدا ان حضرتك تتاكد بنسبة 100 % ان ما فيش تسريب في دورة المياه او التبريد ولازم تغسل دورة التبريد وتسلك الريديتير كويس اوي قبل ما تحطها والله الموفق والمستعان واسف علي الاطالة