تجربتى المريرة مع ستروين c5 ..... ربنا ينجيكم جميعا ....
بعد التحية ....
حبيت أنقلكم تجربتى الأسوأ فى عمرى مع ستروين سى 5 و عز العرب ....
من 3 سنين قررت أشترى العربية و بعد بحث و سؤال و سؤال التوكيل قالولى ان موديل 2014 نازل فيه تعديل و بيشتغل ببنزين 92 مش زى 2013 لازم 95
و صدقتهم و فعلا اشتريتها موديل 2014 ....
العربية حدث و لا حرج عن الفخامة و القوة و الرفاهية و الثبات والنعومة و الكماليات مزيج من الأوروبى و اليابانى ......
بعد 6 شهور طارة الدركسيون لونها غير و كاوتش الأبواب داب و فرش الباب الخلفى خرج من مكانه و روحت التوكيل و غيروهم ف الضمان .....
فجأة الكاسيت باظ و روحت التوكيل و قالولى فعلا بايظ بسبب ان حضرتك غسلت العربية ف بنزينة !!!!!!!!!
طبعا اتخانقت و بعد عذاب غيروه ف الضمان لأن تمنه 7000 جنيه و أنا مش أول مرة أغسل عربية ف بنزينة ....
بعد كدة سحب العربية بقى غريب شوية فروحتلهم قالولى طرمبة البنزين باظت غيروها ....
و بعد كدة الطارة باظت تانى و كاوتش الأبواب داب تانى و قالولى ان الكماليات دى بيجيبوها من مصنع ف البرازيل و وقفوا التعامل معاه و غيروهم
كرسى السواق داب و طلبوه من فرنسا .....
بعد كدة دخلنا على المرحلة الصعبة بعد مرور سنتين لأن كل اللى فات دة كان سهل ....
العربية بدأت تكركر و الموتور مش مظبوط و مؤشر الزيت بيقول ان الزيت ناقص ....
روحتله للمرة العشرين فى أبو رواش و بعد الكشف قالولى ان سنسور الزيت كان عايز يتنضف و طبة الزيت مكسورة و بتسرب زيت و غيروها و كوع التربو بايظ و غيروه و هو دة اللى كان بيخلى العربية تكركر .....
قولت كويس .... ماشى .... بعد شهرين بدأت تكركر تانى و مؤشر الزيت قال انه ناقص فقالولى انه لازم العربية تقعد عندهم علشان فرنسا تفحصها و تقرر ايه مشكلة الزيت ....
بعد أسبوع و انا طبعا من غير عربية فرنسا ردت و قالوا ان الموتور باظ و هيبعتوا واحد جديد خلال شهرين و طبعا اتضايقت لأن مش ممكن عربية زيرو موتورها يبوظ بعد سنتين ... المهم بقيت بزود زيت كل 15 يوم لأن الزيت بيتاكل و بعد شهرين الموتور الجديد وصل و روحتلهم علشان يغيروه و بعد أسبوع قالولى ان الموتور اتغير و لكن للأسف الفتيس كمان باظ و هيغيروه و قعدت العربية عندهم أسبوعين مش عارفين يظبطوها لأن الكمبيوتر مسجل مشكلة ف الموتور مع ان الموتور جديد!!!!!!!!
المهم قالوا ان فيه سنسور هو اللى مسبب المشكلة دى و غيروه و استلمت العربية و لكن قالولى انى لازم أحط بنزين 95 علشان اصون الموتور الجديد ....
قولت مفيش مشكلة و بقيت أحط 95 علشان العربية كأنها جديدة و عايز أحافظ عليها ....
المفاجأة بعد شهرين بدأت العربية تكركر تانى و رسالة بتقول ان فيه مشكلة ف الموتور الجدييييييييد ....
روحتلهم للمرة الخمسين و قالولى ان المشكلة ف طرمبة البنزين اللى كانت اتغيرت من سنتين سألتهم ايه السبب قالولى البنزين قولتلهم ازاى و أنا بحط 95 قالولى و مين قالك ان 95 بتاع مصر نضيف !!!!!!!!
اتريقت عليهم و قولتلهم ابقوا استوردوا بنزين مضمون علشان ابقى استخدمه ....
و بكدة انتهت 3 سنسن من العذاب و ضمان العربية خلص طلبت منهم مد الضمان كتعويض و طمأنينة لأن العربية اتغيرت بالكامل .... تكرموا و مدوهولى 3 شهووووووووور ..... شوفتوا الكرم !!!!!!!
بعتها بأقل من تمنها و اشتريت دماغى و قولت من الأمانة أحكى حكايتى للناس علشان ياخدوا بالهم ...
شكرا
و أسف على الاطالة ...
