جارنا بيركن قدام العربيه و يشد الهاند بريك

المشكله ياجماعه
هى ان لينا جار لا بنطيقه ولا بيطيقنا ،ماحصلش بيننا مشاكل قبل كده لكن لا بنحبه ولا بيحبنا لله فى لله كده
نزلنا يوم الصبح لقيناه راكن قدام العربيه بتاعتنا وشادد الهاند بريك والبواب ناداله وخلال 10 دقايق نزل وحرك العربيه بدون اى اعتذار
وشكرناه من باب الادب بدون عتاب ولا اى كلام تانى وساعتها اعتذر وقال ان الباركينج كان زحمه بالليل ومالقاش ركنه وعشان كده ركن قدامنا

وانتهى الموضوع على خير يومها

احنا اهو الاسبوع اللى بعدها و نفس الموقف ببص من البلكونه لقيته راكن العربيه قدامنا وبالتأكيد شادد الهاند بريك
عشان ماحدش يزق عربيته المصونه ويبهدلهاله ونغور احنا فى داهيه عادى
فأرجوكم تقولولى ايه الحل
مهو مش ممكن كل ما نيجى ننزل لازم نخبط عليه ناخد الاذن عشان نخرج بعربيتنا!!

ارجوكم تقولولى ايه الحل ولو حد حصل معاه مشاكل مشابهه مع جاره

وهل لو استمر الوضع كده او عملها عند بقى معانا ف لو عملنا شكوى فى القسم هيساعدونا ولا ايه النظام

من غير شكاوي ولا حاجه
انت كلمه بالراحه , بعد السلام وازيك واخبارك , قله معلش انت بتبقي قافل علينا
ولو اتزنقت وركنت قدامنا ابقي سيب الهاند بريك علشان اطلع عربيتي وهخلي البواب يرجع عربيتك مكاني لما ااطلع
بالذوق كده ,, انت بتقول انه محصلش مشاكل بينكم قبل كده والحمد لله
يبقي الموضوع يخلص بالذوق
بالتوفيق

بالظبط كده. أنتو جيران و لازم تتعاملو بالحسني و احيانا بيكون الجفاء اللي حضرتك شايفه من اللي قدامك مش تناكه منه و لا قلة ادب لكن ممكن ما يكونش اجتماعي و كلامه قليل. المهم ابدا بالحسني و عامل ربنا.

ابدأ بالطريقه الكويسه الاول .. ثم مجلس اداره العقار لو فيه .. او للسايس انه ينظم الامر ده لان ده شغله

انا عارف ان فيه نوعيه جيران سيئه للاسف .. و مينفعش معاهم الا الشده .. بس انا لا انصح بذلك

و فى جميع الاحوال لا تلجأ للشرطه .. لانكم فى النهايه جيران .. و الجار له حقوق .. لو هو موش عارفها .. انت تكون افضل منه و تحفظ حق الجيره .. حتى لو هو ما يستاهلش

ردود جمليه
ربنا يباركلكم

شكرا لكل الناس اللى ردت
ربنا يباركلكم
و هو مازال بيركن قدامى بس حظه انى كل لما بنزل بيكون هو مش راكن و خرج بعربيته
وكمان عايزه اتأكد انه شادد الهاند بريك عشان اكلمه فى الموضوع
و عندكم حق الجيره اهم من اى شىء هم صحيح جيران جداد فالعماره مابقالهمش اكتر من سنه بس اهم فى الاخر جيران ووالله انا لابحب المشاكل ولا حاجه
بس بتخنق من الناس اللى مش بتقدر الاخرين
ربنا ييسر الامور وشكرا ليكم