-
استشارة بخصوص الجالينا
السلام عليكم
انا معايا ابيزا بس بفكر في حاجة اكبر طبعا للبيت والاولاد بس المشكلة ان الاسعار ولعت نار ووسط البحث لقيت الجالينا 2007 و 2008
قلقان لان سعرها قليل على الاوبشن الروعة اللي فيها ياريت حد يفيدني هل العربية كويسة وثابتة على الطريق وخل قطع الغيار متوفرة بسهولة ولا هتعب علشان الاقيها وهل اعطالها وكهربتها نظامهم ايه وخصوصا موضوع الاير ماس لاني بعاني منه عندي في العربية
ياريت النصيحة قبل ما اخد القرار
وجزاكم الله كل خير
-
غلى حد علمى
الموتور هو نفس موتور اسبرانزا 620 .. لاحظ ان انتاج اسبرانزا 620 اتوقف من حوالى 3 او 4 سنين
العفشه مختلفه عن ال 620 .. فدى احتمال تكون غاليه ( الله اعلم )
الثبات .. المفروض طبعا تكون ثابته .. ال 620 ثابته جدا جدا لحد 160 و الجالينا المفروض انها نفس المستوى ان لم يكن افضل
الامان .. الجالينا اول ما ظهرت فشلت فى اختبارات الامان بشده فى المانيا ( حصلت على نجمه واحده فقط ) .. و تم تعديلها جذريا و تقويه هيكل السياره ( خلال شهرين لتجنب الفضيحه ) .. و حصلت على 3 نجوم و هو ده مستوى الامان النهائى بتاعها
الجالينا و ال 620 .. تقييمهم هو 3 نجوم فى اختبارات الامان .. و ده تقييم متوسط
بس بسبب فشل الجالينا فى البدايه فى اختبارات الامان فى المانيا ( هى كانت نزلت السوق فعلا و بتتباع ) .. يبقى المفروض تعلى بالموديل سنه او سنتين من اول موديل نزل .. يعنى ما تشتريش اول موديل و الافضل كمان تانى موديل من بدء نزولها .. علشان تكون متأكد ان العربيه اللى هتشتريها هى الحاصله على 3 نجوم
الاوشن .. اعلى من ال 620 بحاجات بسيطه جدا
لاحظ ان الضريبه عاليه .. و استهلاك البنزين اعلى من العربيات الصغيره و بلذات جوه البلد .. و لاحظ ان اسعار الوقود بتتغير بسرعه .. فتدرس موضوع هل ستحتفظ السياره بقيمتها السعريه مستقبلا ام لا كعرض و طلب
انا معى ال 620 و كنت اصلا عايز الجالينا الهاى لاين و ورت كتير عليها .. و لكن تجار سيارات مرسيدس قالوا لى لو غاوى الصينى بالحجم الكبير ده يبقى خد ال 620 افضل و كنت مستغرب من كلامهم
اعتقد لو لقيت اسبرانزا 620 تكون افضل .. بس اللى يحكمك هو الحاله طبعا ثم السعر .. حاول تأخذ عداد قليل نسبيا .. انا اول مره اركب صينى و معنديش فكره بيحصل له ايه لما الكيلومتر بتاعها بيعلى شويه .. هل حتستمر مريحه ام تبدأ المصاريف ؟؟
بالتوفيق
-
موتور ال 620 هو ميتشوبيشى جالانت .. كود 4g63 كامه واحده
موتور الجالينا برضه ميتشوبيشى جالانت .. كود 4g63 .. بس ما اعرفش الجالينا كامه واحده او اثنين .. يعنى لو فيه اختلاف حيكون فى وش السلندر فقط و باقى الموتور زى بعض .. ده لو هى 2 كامعه فعلا
Content Relevant URLs by
vBSEO 3.6.0 PL2