مشكلة عجز الميكانيكية عن حلها في فيات 131

**Abowarda** · 23-01-2017 11:12 AM

السلام عليكم
معلش الموضوع غريب ومفيش ميكانيكي فاهم ايه اللي بيحصل بالظبط في العربية
العربية اللي معايا فيات 131 الماني موديل 1982 موتور 2 كامة 1300 سي سي
من اول ما اشتريت العربية وفي مشكلة بتحصل معايا ومش عارف حل ليها لحد دلوقتي وهشرحها بالتفصيل يارب حد يفيدني
انا بسافر بالعربية القاهره وانا ساكن في الزقازيق وبتحرك الصبح الساعه 6 صباحا بيكون الجو برد في الشتا وفي شبورة العربية بسخنها الصبح وبتبقي ماشية تمام واول مطلع علي الطريق وابدا اعدي سرعة 60 كيلو (وبالاخص لما الار بي ام بتاع العربية يكون عالي وعدي 2000 وداخل 3000) والاقي مطب بدوس دبرياج وبعدين ابدا ادوس فرامل عادي عشان اهدي سرعه العربية
اول ما رجلي تبدا تلمس الفرامل العربية تروح مبطله
ادورها تاني تشتغل عادي واكمل مشي بيها
واول لما ادوس دبرياج وادوس فرامل تاني تروح مبطله وهكذا لحد ما اوصل القاهره
انما لو دوست فرامل بدون دبرياج والعربية واخدة غيار مبتبطلش لكن اول لما تهدي سرعتها وساعتها لازم ادوس دبرياج عشان انقل علي غيار اقل والمس الفرامل تروح مبطله
اللي بيحصل ان عداد الار بي ام بينزل لحد الصفر يعني كان العربية مش وصلها بنزين ومبتبرجلش بتروح مبطلة فجاة
واللي بلاحظة ان العربية بتبقي باردة يعني درجة الحرارة بتبقي بين 60 و 70 لان الجو بيبقي برد والهوا مقابل الرادياتيروالعربية بتجري
وحاولت احل الموضوع وقفت علي الطريق اسخن العربية لحد متوصل 90 (لان عندي المروحة بتشتغل عند 87 وبتفصل عند 92 ) واجي اكمل مشي بردة اول مدوس علي الدبرياج عشان افرمل تروح مبطله
ترموستات الكوعه عندي ملغي والكاربراتير معمولة صيانه وطقم الكهربا متغير
والعجيب بقي ان لما اجي اروح بيها من القاهره للزقازيق وبيبقي الساعه 3 العصر كدة بتبقي عادي جدا جدا ولا بتبطل ولا بتعمل حاجة
انا مش عارف المشكلة فين ولازم عشان اوريها للميكانيكي استني يوم برد وفيه شبورة عشان تبطل وهي ماشية
اسف للاطاله بس ياريت الاقي حل للموضوع ده لان العربية لما تفضل تبطل مني كدة الي جانب بروده الموتور في الوقت ده مبقدرش اني امشي بيها وعشان اتغلب علي موضوع انها تقف بعمل الاتي
لما اقرب من المطب مثلا او المكان اللي ههدي فيه واضطر استعمل الدبرياج والفرامل مع بعض
اول ما ادوس فرامل وابص علي عداد الار بي ام والاقيه بينزل للصفر اروح شايل رجلي من علي الفرملة ودايس سنه بنزين ومرجعها تاني للفرملة كدة العربية مبتبطلش بس بتبقي مبرجله طول ما انا ماشي بيها الفترة دي
ولما ارجع بيها في الوقت الطبيعي بالليل لما اخرج داخل الزقازيق بتبقي زي الفل وبمشي بيها جوا البلد زي الفل وبتتحرك وبتجري وعادي جدا وطبعا جوا البلد مش بقرص علي العربية والار بي ام مبيعلاش زي مكون ماشي علي الطريق السريع.
لحد دلوقتي كل اللي الميكانيكية بيعملوه يبعتوني لواحد بتاع كاربراتير او اغير طقم الكهربا او الفلاتر وبردة نفس المشكلة موجودة

اسف للاطالة
ارجو الافادة

**amr011111** · 23-01-2017 12:48 PM

قبل ما تطلع مشوار الصبح فك بك السلانسيه وسلكه بسلك رباط.وممكن برضه تجرب تحط بنزين 92
منفعش يبقى تعلى العربيه عن طريق الكربراتير

**Abowarda** · 23-01-2017 12:54 PM

الف شكر لرد حضرتك واهتمامك
بك السلانسية اللي عندي كهربا ولما فكيتة نضفته بصيت في الابره في الشمس لقيتها سالكة ومكنش في اي عوائق
بنزين 92 هجربة بس بحس ان العربية مبعرفش اسيطر عليها ههههههههههه بتبقي بتجري جامد وصوتها هادي جدا
انما العجيب اني مره وقفت العربية وعليت الكربراتير من المسمار بدرجة ان الار بي ام كان بيبقي علي 1500 في السلانسية وبردة كانت بتبطل
هل ممكن للبرد دور في الموضوع ده واجرب اركب ترموستات الكوعه ولا ممكن يسبب مشاكل

**essamr** · 25-01-2017 07:39 AM

ممكن تكون مشكله فى السيرفو

**سورس** · 26-01-2017 08:30 AM

شوف فلتر البنزين

**abdoumahros** · 26-01-2017 10:09 AM

مشكله حضرتك بتنحصر في بك السلانسيه الكهرباء او ثرموستات الكوعه

نصيحتي ركب ثرموستات الكوعه لانه مهم وغلط انك تلغيه وسواء المشكله اتحلت ولالا خليه راكب وبعدين شوف حد بتاع كربراتير كويس يتصرف في بك السلانسيه

**سورس** · 30-01-2017 03:22 AM

ايه الاخبار طمنا عليك

**lancer06** · 30-01-2017 03:49 AM

انت جاوبت على تساؤلك بنفسك
لو جربت تدور العربيه الصبح ومسخنتش كويس وجيت تمشى هتبطل معاك لانها لسه موصلتش لدرجه الحراره المناسبه لتشغيل الموتور بكفائته
واللى بيحصلك نتيجه ان ترموستات الكوعه متشال الميه بتبرد والدايره مفتوحه بتبرد بدورها الكربراتير وطبعا السخان بيبرد فبيخنق شفاط الهواء علشان يدخل هواء اقل وبنزين اكتر
لإكمال عمليه احماء الموتور من جديد
ركب ترموستات الكوعه وإن شاء الله المشكله تتحل تحياتى وإن شاء الله بتقى الاعضاء يفيدوك اكتر