الموضوع: %% تـــقـــــريـــر للـــتاريــــخ عــن بيجــو 301 الأســـــد الفرنســـى %% المتعه

بسم الله الرحمن الرحيم

































اولا ماركة بيجو الفرنسية العريقة معروفة من زمان بالقوة و الصلابة و لانها تقع فى قلب اوربا و لان اهم حاجة عندهم هو البنى ادم .... مش زى الدول الاخرى ... عوامل الامان هى رقم واحد

لان فعلا انا عمرى ما افكر اشترى شويه رفاهيات على حساب الصلابة و القوة و التحمل

... العربية نمسك حاجة حاجة بس المهم

العربية فى مصر موديلات 2013 الى 2016 كلها مانوال 5 سرعات و الاوتو 4 سرعات

انما من اول موديلات 2017 ... يوجد فيس ليف بالاضافه ان الاوتو بقى 6 سرعات فتيس ف غاية السلاسه تحت اى ظروف







. اولا الماتور 1600سى سى و بيطلع 115 حصان و هو من نوع VTI
و كمان سرعة العربية تصل الى 220 و لكن مقفولة على 190 كيلو فى الساعة
و طبعا الماتور جبار و حنين فى استهلاك البنزين اللى بيوصل لامانة 6 الى 7 لتر على الطرق السريعة و من 9 الى 10 لتر فى الزحمة و التكيف

و كمان سعة خزان بنزين 50 لتر و يعتبر حجمه كويس جدا و يمشيك رينج 400 الى 600 كيلو متر

العربية موجوده فى مصر على 3 فئات

البيز لاين مانول بسعر 245الف جنيه
البيز لاين اوتو بسعر 265الف جنيه
الهاى لاين اوتو بسعر 285الف جنيه






طبعا العربية جميع الفئات تشتمل الاتى ..

عدد 2 اير باج ... للسائق و الراكب الامامى
نظام فرامل ABS+ EBD مانع الانزلاق و بصراحة العربية بتكلبش فى الارض
دريكسيون باور كهرباء حديث و بيتقل على السرعات عشان زيادة امان
تكيف هواء عادى
زجاج كهربائى جميع النوافذ
سنتر لوك و ريموت تحكم
كاسيت سى دى و راديو و AUX
2 سماعه فى البيز لاين و 4 فى الهاى لاين
الايبملويزر المانع للسرقة و بشفر المفتاح بشفرة جديدة عشوائى كل مره
( يعنى عشان تنسرق لازم اكراه او سطو او تتشال بونش )
لمبات شبورة خلفى
تابلوه
مسند راس
ولاعه
طفايه
جنوط 15 حديد للبيز لاين و 15 اسبور للهاى لاين
فتح الشنطة من الداخل و تانك البنزين
زرار لوك داخلى
زرار غلق التحكم فى الزجاج الخلفى
جنط استبن احتياطى زى جنوط العربية و نفس المقاس 15 ... مش زى عربيات بتنزلك جنط صغير وي يقولك امشى على سرعة 80 .. و يوفر فلوس الجنط و شغل الاستغلال






...
فئة الهاى لاين تتمتع بالسابق و زياده

نواكل على الابواب و الشبكة الاماميه
التكيف تاتش
بلوتوث و USB
جنوط 15 اسبور
مسند يد
شاشه فى الكاسيت
سينسور ركن
لمبات شبورة امامى
دراع كروز للتحكم فى الصوت
مريا تحكم كهربا





..
مميزات العربية


فتيس 5 سرعات مانوال او 4 سرعات اوتو للموديلات 2013 ال 2016..

.. من اول 2017 الفتيس 6 سرعات اوتو

ممتاز و المانوال 5 سرعات زى ما هو بس حصلف فيس لفت للعربية هيبدا من عام 2017 للعربية

العربية شكله يساوى اكتر بكتير من سعرها و هى شبه الاودى 3

و كمان ثبات العربيه تحفه لحد 160 بجد و بعد كده بيقل شوية

الشنطة بحر بمعنى الكلمة وواسعة جدا لو انتا اسرة و بتحب السفر او انتا محتاج تحط شنط كتير.. اختيارلك للعربة السيدان دى هيكون استثمار مناسب

العربية انتشرت جدا فى مصر و ده هيسهل عمليات البيع و الشراء و توفر قطع الغيار الاصلى و التقليد فى كل انحاء الجمهورية.. عشان الشعب المصرى اتطور و بقى يدور على عوامل الامان

العربية عالية جدا للناس اللى بتشتكى من المطبات و الطرق المكسره و عمرها ما حكت معايا
و لامانه ممكن تحك لو حمولة كاملة و اخدت مطب بسرعه و حلها . انك تظبط الضغط الخلفى على 36 و الامامى 33
و العادى 32 جميع العجلات صيف و شتاء

المطبات انا اخدت مطبين على مرتين كل مره باليل على سرعة تزيد عن 120 ... و العربية نزلت على الطريق زى الاسد ولا راحت يمين و لا شمال .. و الحمد لله ثقتى زادت فى العربية جدا

صوت الماتور معقول لحد 140 و بعدها بيعلى شوية و انا شايف انو طبيعى بس لو مشغل تكيف مش هتحس بى خالص

العربية السحب ممتاز جدا من اول 0 الى اخر العداد

الفرامل ABS بتنقذ فعلا و عمرك ما تشترى عربية موديل حديث من غير ABS لان مهم جدا جدا جدا

سعرها المعقول ادى الى الانتشار و كمان قطع الغيار متوسطة و ارخص من عربيات كتير
و صيانه كل 10 الاف مش زى الكورى كل 5 الاف عشان يحسب عليك مصناعيات و خلافه و يستغلك

قطع غيار معمره و شكل انسيابى و العربية مريحة جدا جدا جدا فى القاعده و واسعه جدا و تشيل 3 الى 4 افراد فى الكنبة الخلفية مستريح و مسافة حوالى 15 سم الى الكرسى الامامى


التابلوه واسع جدا و تقدر تخزن فيه اى حاجة

الكراسى الخلفية بتطى و تزود مساحه الشنطة مع انها مش محتاجة بس اوبشن موجود

السنترلوك يقفل اوتوماتك لو فتحته و مفتحتش ولا باب لمده 30 ثانية

العربية مش هتدور الا بالمفتاح الاصلى المشفر ... و كل مره بيدخل فيها الكونتكت بياخد شفرة جديدة عشوائى .. ( الايمبلويزر )

سهولة الوصل الى جميع الازرار فى التابلوه

دهان السيارة قوى و يستحمل جوه مصر

التكيف تلاجه

الانتظار بيشتغل مع الفرامل الشديدة المفاجئة اوتو ماتك

عدد 2 مفتاح ... 1 ريموت و التانى عادى




العربية فعلا صفقة رابحه و معمره
وكفى بيجو فخرا بى 405 و 504 و 207 و 508 اللى ركب البيجو من زمان عارف يعنى ايه امان و صناعة متينه و صاج محمل و دهان محترم و ماتور عفى و عشره سنين














العيوب

اولا ممكن متعرفش تشوف الكبود قدامك بس لو انتا طويل هتعرف تشوفه

مساحات العربية لو سايس مش بيفهم مش هيعرف يرفعها و هتخبط فى الكبود و الحل انك تشغل المساحات دوسه واحده بعد ما تقفل الماتور و هتفضل فى نص البربيز و يقدر يرفعها عادى


تيل الفرامل زى عربيات كتير مع المواصفات الاوربية الجديدة بيصفر ساعات و سعات لا و بيخلص على حسب السواقة من 5 الى 25 الف كيلو على مستوى ملاك كتير و الحل بعد كده بيتغير الى نوع تيل اخر بره التوكيل لان ضمان التيل 10 الاف كيلو فقط و سعر بره بى 450 جنيه و الاصلى فى التوكيل 950..... و التيل الاسبانى بيوصل الى 30 الف و على حسب الاستخدام

صوت الانذار بتاع الحزام مزعج حبتين لمد 2 دقيقة و بعد كده بيفصل

مفيش اماكن تخزين كتير .. هما 5 اماكن بس

صوت الماتور بعد 140 عالى .... و قبل 140 ولا تحس بيه خالص .. بس لو مشغل التكيف مش هتسمعه

مفيش مكان مناسب يتحط فى الموبيل

العفشه ولا هى ناعمه جدا ... ولا هى ناشفه جدا .. متوسطه




و اقدر اقول بكل صراحة بيجو توسعت فى مصر و عهد الشركة الجديدة انها تبنى اسم بيجو فى مصر من تانى بعد لما بعدت عنها الاضواء شوية و العربية دى من الطراز الاولى تخاطب الفئة الاقتصادية و اسعار قطع غيارها فى المتناول و متوفر منها انصاص و ارباع فى الحرفين
و بدا ناس كتير تتشغل فيها و هى عربية منافسه قوية جدا

و ثبتت نفسها فى الصين و روسيا و الجزائر و تركيا و غيرها


و اللى بيفكر يتوكل على الله فعلا و اول ما هتشوف العربية و تجربها .. صدقنى هتخلص فيها على طول

عاش الاسد

واللى عندو سؤال يتفضل يقول و انا فى الخدمة






























دمتم فى رعايه الله
و مستعد للاسئلة فى اى وقت