الموضوع: خطوات شراء سيارة جديدة "زيرو" من المعرض

المشاركة الأصلية كتبت بواسطة DreAmO

السلام عليكم ورحمة الله وبركاته
وعليكم السلام ورحمة الله وبركاته

إن شاء الله قررت اجيب رينو ستيب واي 2017
ومحتاج شوية نصائح وأعرف شوية حجات

مبدئياً كدة انا مش بعرف اسوق "لسه هتعلم يعني"
وكنت ناوي اعمل زي مالناس بتبدأ .. واجيب عربية مستعملة منوال اتعلم فيها وكدة
لكن مع ارتفاع الاسعار والمبالغه في سعر المستعمل + مشاكل المستعمل + "عندي رهبة من السواقه ومش بحب وجع الدماغ"
قررت اجيب زيرو اتوماتيك واسهل الدنيا على نفسي ومعقدهاش

1- ازاي اتأكد ان العربيه موديل 2017 مش موديل قديم
( الستيب واي 2017 مفيش معلومات تقريباً عنها واضحه عالنت وتقريبا اغلب المواقع ناقل مواصفات وصور الموديل القديم )

2- ازاي افحص العربيه في المعرض بطريقه عمليه وسريعه
( لأن في الغالب موظفين المعرض هيبقوا فوق دماغك وعايزينك تنجز )
أفحص زى ما تحب وخد وقتك زى ما تحب وفيه هنا مواضيع على كيفية فحص سيارة جديده
3- هل يشترط وجود رخصة قيادة علشان اشتري العربيه من المعرض ؟
لا يشترط
4- ايه المستندات اللي لازم استلمها مع العربيه "ياريت تفاصيل واسمها الدارج في المعارض"
يعني لو ايصال نقول ايصال .. لو استماره نقول استماره .. لو فاتوره الخ .. وشكلهم ايه

5- اسلوب الدفع والاستلام .
لو هتدفع كاش هتدفع وتاخد عقد والعربيه معاك
6- هل في حجات المفروض استلمها مع العربيه " كوريك او عدة مثلاً "
اى عربيه بيجى معاها اساسى طبعا الاستبن ومفتاح بيبه على شكل حرف ال لفك العجل وكوريك وحديده لرفع الكوريك وقاطرة للعربيه وطبعا الكتالوجات وبعض العربيات بتستلم كتالوج واحد وكتالوج الصيانه بتستلمه من التوكيل ولو فيه ولاعه بتستلمها برضه مع العربيه

7- اخلي بالي من ايه وما ادققش مع ايه ؟

8- ترخيص العربيه والسير بها من المعرض بدون لوحات ( ايه النظام )


إن شاء الله هيكون معايا صديق كان معاه نفس العربيه موديل 2015 منوال


اخيراً : ايه الصح بقى اللي اعمله علشان اتعلم السواقه على العربيه دي
ولو في إضافات من عندكم ونصائح اكون شاكر .
لو تقدر تاخد 6 حصص بره فى اى مدرسه سواقه تتعلم على عربيه اتوماتيك غير بتاعتك يبقى كويس وبعد كده تشوف حد معرفه وتطلع بعربيتك فى اوقات فاضيه واماكن فاضيه كذا مره لحد ما تتقن السواقه وبالتوفيق
شكراً

المشاركة الأصلية كتبت بواسطة عزيز محمد

مش هأقدر أفتي بخصوص النقط اللي سألت فيها عشان معنديش خبرة حديثة بما يتم أثناء الشراء من المعارض،
لكن عاوز أنصحك بأول حاجة تعملها بمجرد استلام العربية وترخيصها وهي التأمين الشامل عليها ضد السرقة والحوادث (وربنا يحفظها لك ويبارك لك فيها)

نظامه ايه التامين الشامل ضد السرقة والحوادث
تبع مين وايه تكلفته

اشكرك .