عاوز اشتري عربية زيرو وممتازة في حدود 200 الف

**د/ وائل سعد** · 02-03-2017 12:48 AM

انا محتار عاوز اشتري عربية زيرو وممتازة في حدود 200 الف جنيه ممكن تزيد شوية 10% او تقل بس المهم اعتمادية وعملية وتستحمل شوارعنا ومطبااتها ولا تكوني كورى نهائيا لا هيونداي ولا كيا فياريت الافادة وعلي وجة السرعة لاحسم قراري لاني عاوز اشتري الايام دي ، المقارنة والمفاضلة من حيث:

1- الاعتمادية
2- الثبات
3- تحمل المطبات والشوارع
4- وكيل كويس ومحترم
5- مش مهم سعر اعادة بيع لاني مش ناوي بيع
6- زيرو وليست مستعمل (لا افكر في المستعمل نهائياً)

**mahmoudselim** · 02-03-2017 01:25 AM

افضل الاوروبي ستروين سي اليزيه و سكودا رابيد وافضل الياباني نيسان صني وديهاتسوا تريوس بس ثبات لأ ورأي افضلهم الستروين
http://www.nilemotors.net/Nile/396082-c-elysee.html
ولو اني كمان عجباني السكودا والله فاشوف انت ايه الافضل ليك

**د/ وائل سعد** · 02-03-2017 03:49 AM

بس الاسعار اكيد معدية عن ال 200 الف جنيه طيب محدش يقدر يرشح ليا حاجه في الفيات الجديد الزيرو سمعت ان اسعارهم متقاربة من ال 200 الف مفيش حد يرشح حاجه كويسه بحيث اقرر الشراء وارتاح من صداع االسيارات ده وصعوبة الاختيار

**mahmoudselim** · 02-03-2017 04:14 AM

الستروين بتبتدي من 199 مانوال 219 اوتو.
الفيات عندك لينيا 209 مانول.

**svneleven** · 02-03-2017 06:15 AM

الفيات مش اعتمادي زي ما حضرتك عاوز. ممكن رينو لوجان أحسن شوية.

**borio1704** · 02-03-2017 11:49 AM

لو حضرتك بتدور على الاعتمادية .. يبقى آخر حاجة تفكر فيها هي فيات....

فيات معروفة على مستوى العالم بأنها أسوأ سيارات العالم من ناحية الاعتمادية...
عربيات كلها مشاكل وأصحابها بيخلصوا منها بسبب مشاكلها.

ولو حضرتك بتدور على الاعتمادية.. يبقى لازم تحط في خياراتك هيونداي وكيا... لإن اعتماديتهم أعلى من كل الأوروبي تقريبا.

اعتمادية يعني تويوتا - هوندا - مازدا - سوبارو - كيا - هيونداي - سوزوكي - نيسان - ميتسوبيشي ... بالترتيب

الاعتمادية = 70% من سعر إعادة البيع... يضاف إليها توفر قطع الغيار وسهولة الصيانة.

بصراحة .. ما أنصحكش بأي ماركة غير الماركات اللي فوق دي..

بالنسبة للثبات... شيله من دماغك...

الثبات بيعتمد بشكل كبير جدا على حجم السيارة وشكلها...

- العربيات الـSUV أو الـ4x4 بتبقى عالية وثباتها منخفض وبتقلب أسهل من السيدان...
- العربيات الصغيرة معمولة للاستخدام جوه المدينة.. يعني مشي بسرعة لا تزيد في أغلب الأحوال عن 100.. وبالتالي مش هتلاقي عربية صغيرة ثابتة... انسى.

والأهم من كده.. حفاظا على سلامتك وسلامة عيلتك.. ما تزودش سرعتك عن 120 بأي حال من الأحوال... وفي الحالة دي كل العربيات ثباتها واحد تقريبا.

بالنسبة لتحمل المطبات والشوارع..

حضرتك كدة محتاج عربية SUV.. لإن العربيات دي معمول في حسابها أثناء التصميم إنها تمشي في طرق وعرة.

المشكلة الأهم دلوقتي... أنهي عربية SUV في الماركات اللي فوق دي بسعر 200 ألف...

مفيش.

ما قدامكش غير إنك تبدأ تدور في الصيني...

والصيني أنا شخصيا أفضله عن أي حاجة أوروبية... لإن مصاريفه قليلة والمشاكل اللي بتيجي من وراه مقبولة عن الأوروبي وتصليحها أرخص.

...

**د/ وائل سعد** · 02-03-2017 12:32 PM

يعني الفيات لو زيرو مش مناسبة انا شايف انها تقفيل ايطالي تركي وسعرها مناسب ليا وانا مش بحب الكورى او الصيني ولا احب ركوبهم فمش عارف الاختيار يكون ايه ؟؟

فيات بونتو مثلا او فيات لينيا اعتقد مفيش حد اشتكي منهم ولا ايه رايكم ؟؟؟

**tasaka** · 02-03-2017 12:57 PM

المهندس بوريو قال لك ابعد عن الفيات .. يعنى المختصر المفيد

خد الرابط ده لسه كنت حطه امبارح فى موضوع كيا اللى بتتباع فى امريكا
فيات 500 اسوأ عربيه بتتباع فى امريكا .. واخده اعلى تصنيف ( بس بالسالب ) ..
يعنى رقم 1 فى اسوأ 10 عربيات فى الاعتماديه فى امريكا
اظن كده الكلام بتاع المهندس بوريو اصبح اوضح !!

( اقتباس )
بالمناسبه .. اسوأ 10 عربيات فى الاعتماديه فى امريكا
تترأسهم فيات 500 .. و لا تعليق
و من ضمنهم فورد فيستا و فورد فوكس

10 Least Reliable Cars - Consumer Reports

و بصراحه مستغرب انك مفضل فيات على الكورى ؟؟

**tasaka** · 02-03-2017 01:14 PM

فيه عربيه شانجان .. كان الاستاذ كولن دائما بيزكى شانجان ( اعتقد كانت suv )

هى عربيه سيدان ليها فيديو على يو تيوب

بص و موش حتخسر حاجه

https://www.youtube.com/watch?v=aXaJve2KqNw

و ممكن كمان تبص على اوبترا حتكون فى الميزانيه برضه