شرح موجز لزيوت و سوائل السيارة و العمر الإفتراضي لها.

سوائل العربيات الحديثة من زيوت و سائل تبريد مكونات كميائية و طبيعية (معدنية) معقدة جداً و زي أي شيء لها عمر افتراضي سواء في التخزين أو جوه العربية.هاتكلم أولاً عن الزيوت:- زيت الموتور:مُكوِّن شديد التعقيد يعتد على زيت أساس (معدني أو تخليقي "كيميائي" أو خليط بينهما) و اضافات لتحسين وظائف و خواص زيت الأساس الذي يكون دوماً أحادي اللزوجة "لزوجة خفيفة 0، 5، 10 و حتى 20 و نسبته 80-95% من الزيت النهائي" و بيكون فقير جداً في مقاومة الصدأ و التآكل و كفاءة التزييت.الإضافات على قلة نسبتها ترفع معامل اللزوجة في درجة التشغيل العادية إلى درجة 20، 30، 40 و حتى 60 بالإضافة إلى مقاومة الصدأ و التآكل و إطالة العمر التشغيلي (بالكيلو متر و الوقت) و الإضافات المميزة لكل شركة و التي تعطي خصوصية للزيت "مثل الجزيئات الذكية من كاسترول و التي تجعل الموتور في حالة تزييت دائم بما يؤدي للإستغناء عن التسخين صباحاً".طبيعة تكوين الزيت تجعل له عمر تشغيلي بعده تبدأ مكونات الزيت في التفكك و ينتهي عمل الإضافات و تتكون الأحماض التي تبدأ في أكل الأجزاء الأضعف في المحرك و يبدأ تكون الصدأ بالإضافة لفقد القدرة على التزييت و تبدأ الأجزاء المتحركة في الإحتكاك المباشر بينها.زيوت المحركات لها 3 أنواع رئيسية:- معدنية:و هي المستندة على زيت معدني بالكامل في التكوين و عمرها قصير و لزوجتها مرتفعة عن غيرها و اشهرها في مصر 15w50 و 20w50 و المعروف انها 5000 كم و هي غير مناسبة للمحركات الحديثة و يفترض ألا تستعمل إلا في حالة وحيدة و هي أن "المكنة بتاكل زيت" و تستعمل حتى عمل عمرة أو نصف عمرة.أما اسطورة استعمال زيت 5000 بعد ال 100 ألف فخاطئة تماماً و يجب الإلتزام فقط بتعليمات الكتالوج و توصياته بالنسبة للزوجة الزيت و مدة التغيير.بره فيه أنواع اسمها High Mileage و دي ممكن تستخدم بعد 120 ألف كم "مش شرط" و منها المعدني و منها النصف تخليقي و أحياناً بيكون منها تخليقي. و ميزة الزيوت دي انها و ان كان ليها نفس درجة اللزوجة العادية "10w40" مثلاً و لكنها تأخذ أعلى مدى لدرجة اللزوجة "مثلاً درجة لزوجة 40 العادية مداها ممكن يبقى 7.5 بينما ال high mileage مداها بيبقى 9.5"إنما استعمال (زيت تقيل - 5000) بعد ال 100 ألف فكرة خاطئة تماماً و تتسبب في زيادة استهلاك البنزين و الضغط على طلمبة الزيت و صعوبة حركة البساتم و كل ده بيأثر على كفاءة الموتور و عمره في النهاية.عن نفسي معايا سبيرانزا 516 و باحط لها زيت 10w40 زي الكتالوج ما بيقول و هو نصف تخليقي 10000 كم أو سنة و هي عاملة 148600 و استهلاك البنزين جوه البلد زي الكتالوج بالظبط و ساعات أحسن.- نصف تخليقية: و دي بتكون زيت الأساس فيها خليط بين الزيت المعدني و بين زيت تخليقي بنسبة تتراوح من 30-70% للزيت التخليقي، و النسبة دي لو الإضافات قوية مش هاتفرق كتير في الأداء و الكفاءة.- تخليقية:و دي أعقدها تركيباً لأن منها التخليقي بناء على زيت معدني و دي أرخص التخليقي و تقريباً كل الزيوت التخليقية في مصر منها.و منها التخليقي بناء على زيت تخليقي بالكامل و دي بتبقى غالية و أكفأ من النوع الأول و عادة أطول عمراً "بالكيلومتر" من النوع التخليقي الأول و يصل بعضها ل 25000 كيلو/6 أشهر و الآخر و هو الأفضل على الإطلاق يصل ل 40000 كم/سنة كاملة.- زيت الفتيس:غالباً الموجود منه في السوق تخليقي بالكامل "الأنواع النضيفة" و ده معناه انه تقريباً كله مكونات كيميائية و برضه لازم الإلتزام بتوصيات الكتالوج في درجة اللزوجة المستخدمة و مدة التغيير.الزيت ده درجة لزوجته عالية جداً عن زيت الموتور (75w90 و 80w90 على الأشهر في الفتيس المانوال)و لا يفضل استخدام لزوجة مغايرة عشان ما تحصلش عضة في الفتيس خصوصاً مع الأول و المارشدير صباحاً مع بداية التشغيل، بالإضافة لأن تروس الفتيس متصممة على درجة لزوجة معينة و تغييرها ممكن يتسبب في مشاكل للتروس أثناء التعشيقات المختلفة مع الوقت.لما بينتهي عمر زيت الفتيس لزوجته بتكاد تنعدم و التروس بتاكل في بعض لأنها بتحتك بشكل دائم ببعضها و تبدأ عيوب و مشاكل الفتيس تظهر و يستغرب صاحب العربية لأن استعماله للفتيس عادي و مش بيحمل عليه أو بيسيء استعماله.أنا الكتالوج بيقولي استعمل زيت لزوجته 75w90 و ده اللي عملته و فرق معايا فعلاً في نعومة الفتيس و سلاسة النقلات حتى على البارد. و الزيت اللي اخترته عمره الإفتراضي سنتين أو 40-60 ألف كم.مافيش حاجة اسمها زود الزيت لما ينقص و ما تغيرش الأصلي بتاعها لأن بكده عمر الفتيس بيقصر و مشاكله بتظهر.- زيت الفرامل:و ده بقى ممكن يكون مشكلة حقيقية الناس مش بتديها حقها و بتحصل كوارث من ورا إهماله.الزيت ده "في الأنواع الأكثر انتشاراً منه" بيعتمد أساساً على مادة بولي ايثلين "ايثر" جلايكول و دي مادة شرهة جداً لامتصاص الماء و الرطوبة من الجو المحيط و مشكلة تكون المياة في زيت الفرامل انها بتغلي و تتبخر و تتكون فقاقيع هواء و الغاز انضغاطه غير الزيت خالص فكفاءة الفرامل بتقل جداً أو تهرب.و الحل مش في أخد هوا الفرامل كل فترة لأن فيه حد أقصى لكمية المياة "الرطوبة" في الزيت تقدَّر ب 3.7% بعدها بيفقد الزيت فاعليته لانخفاض معدل لزوجته جداً و تبقى العربية معرضة لا قدّر الله لحادثة.عشان كده علب و زجاجات الزيت هاتلاقيها مكتوب عليها إن الزيت صالح لمدة سنة أو حسب توصيات الكتالوج.في حالتي الكتالوج بيوصي بالتغيير كل سنتين أو 50 ألف كم.و فيه ملحوظة مهمة:سكان المدن الساحلية لازم يغيروا في فترة أقل عشان الرطوبة المرتفعة عندهم.زيوت الفرامل للعربيات العادية بتنقسم ل 3 أنواع:DOT 3:و ده بقى تقريباً منقرض في العالم كله و للأسف أغلب التوكيلات و مراكز الصيانة بتستعمله في مصر مع إن العربيات الجديدة متصمم نظام الفرامل بتاعها بالخراطيم و الجلد و الكاوتش على DOT 4، و استعمال DOT 3 بيهري الكاوتش و الجلد و الخراطيم و بيأثر عالماستر مع الوقت. ده بالإضافة لانخفاض لزوجته و درجة غليانه عن DOT 4 و بالتالي كفاءته في الشغل.DOT 4:أصبح شبه قياسي في السيارات الحديثة و له معامل لزوجة و درجة غليان أعلى من DOT 3 لاختلاف التركيب ده غير كفاءته الأعلى و عمره الأطول.DOT 5.1:و ده أحدثهم و أفضلهم و ان ماكانش الأكثر انتشاراً و يتميز بارتفاع درجة غليانه جداً ( 260 مئوي مقابل 230 لل DOT 4 و 205 لل DOT 3) و ده بيقلل من فرص تبخر المياه و تكون فقاقيع هواء في منظومة الفرامل.ال DOT 5.1 ممكن يتحط بدل ال DOT 4 و ال DOT 3 بينما العكس ما ينفعش.ال DOT 4 ممكن يتحط بدل ال DOT 3 بينما العكس ما ينفعش.ال DOT 3 لازم يتحط في متحف التاريخ الطبيعي مش في أي عربية حديثة.سائل التبريد:الشهير ب ماء الريداتير و أهميته الكبيرة في الحقيقة مش بس في كونه بيبرّد الموتور أثناء التشغيل لكن في تكوينه المعقد و مدى مناسبة النوع المستخدم لنظام التبريد و الموتور و الريداتير الخاصين بالعربية.تكوينه الأساسي من خليط ماء مقطر مع ايثلين جلايكول اللي أهم خواصه هي منع التجمد و رفع درجة الغليان مع إضافات أخرى لتحسين الخواص و منع الصدأ و التآكل و غيرها. و كل ما يزيد تركيز الإيثلين جلايكول في السائل و يقرب من نسبة 50% أو يوصلها ده بيكون علامة على كفاءة السائل لزيادة نسبة الإضافات المذكورة و ارتفاع درجة الغليان و انخفاض درجة التجمد. و فيه ناس بتعتبر إن في مصر تركيز 33% مناسب جداً و كاف.فيه 3 مجموعات بتنتمي لها سوائل التبريد الحديثة و مش هاطوّل فيها لأنها عالم معقد جداً و كله كيمياء سواء عضوية أو عادية.المجموعة الأولى IAT و دي الأقدم و بتعتمد على أحماض غير عضوية في التكوين.المجموعة الثانية OAT و دي الأحدث و تعتمد على أحماض عضوية في تكوينها.المجموعة الثالثة HOAT و دي مجموعة هجينة ما بين اللي قبلها.عشان ما تحتارش في اختيار النوع ارجع لكتالوج العربية لأن مثلاً ال OAT غير مناسبة للأجزاء النحاسية أو لحامات الرصاص في بعض أنظمة التبريد.اللون مش عامل رئيس في الإختيار لأن مش كل الشركات نفس اللون في سائلها معناه نفس المجموعة لنفس اللون في شركة تانية.بالنسبة لي اخترت سائل عمره الأفتراضي 3-4 سنوات أو 60-85 ألف كم.عمر الطحان13-3-2017