السلام عليكم انا مشترك فى المنتدي ومتابعه من 2012 لكن مشاركاتي قليله لكن النهارده حابب اقول للأعضاء تجربتي مع سيارتي الاسبرانزا 516
عشان لو حد وقع فى نفس المشكله يوفر فلوسه واشتغالات الصنايعيه وقبل محكي اللى عملته عايز اقول ان السبب فى حل المشكله هو توفيق من ربنا وليس شطاره مني
اولاً بداية المشكلة، كنت ماشي بالسياره عادي جدا وفجأه وانا بركن السيارة بطلت، حاولت ادور كتير مفيش فايده، قولت جايز شرقانه سيبتها شويه ونزلت اشتريت حجات، ورجعت بعد نص ساعه، حاولت برضه مفيش فايد،ه قولت جايز يكون مؤشر البنزين باظ، روحت جبت بنزين وحطيته برضه مفيش فايده، ولما فقدت الامل سيتها، وتاني يوم جيبت ميكانيكي يشوفها ملقاش كهربا واصله للاسبراتير، فضل يشوف ايه المشكله اكتشف فى الاخر ان مجرد فيوز ضارب، حطلى فيوز تاني والعربيه دارت ومشيت، روحت البيت وبعديها نزلت روحت كام مشوار وابطل وادور عادي، وفجأه وانا برجع مرشدير العربية بطلت برضه، حاولت ادور كتير مفيش فايده قولت يبقى نفس الفيوز ضرب، مكنش معايا فيوز ولا بنسه اشيل بيها الفيوز
ملحوظه: (اكتشفت بعد كدا ان فى مشبك فى العلبه ممكن اشيل بيه الفيوزات واكتشفت كمان ان فى فيوزات وكتاوت احتياطي موجوده فى العلبه للطوارئ)
المهم جبت ميكانيكي شاف العربيه وغير الفيوز راح ضارب وكل ميحط فيوز تاني افتح الكونتاك يضرب قالى ياباشا الضفيره فيها قافله لازم كهربائي يشوفها
دا الفيوز اللى كان بيضربملف مرفق 15742
طبعا انا واقف فى الشارع يعني هشوف اى كهربائي والسلام روحت لكذا واحد بيفهموا محدش منهم وافق يجي معايا لحد مروحت لواحد كدا فى ورشه صغيره على اده شغال فى عربيه 128 قولت مش مشكله اكيد الموضوع مش كبير هيشوف القفله فين ويصلحها اكيد سلك ملمس ولا حاجه
وجه معايا الباشا وقعد يحاول يمين وشمال ويحط فيوز يتحرق يروح مشعر الفيوز بسلك برضه يتحرق يروح مشعر سلك اتخن شويه ويسيبه لحد ميسخن ويتحرق انا بصراحه مش عارف ايه اللى صبرني عليه وسيبته يعمل كدا بس هو النصيب
الذكي فضل يكرر نفس الموضوع منغير ميدور حتى فين القافله او يشيل الفيش بتاع الديناموا او المرشديسر او اي حاجه لحد مجاب اخره راح شايل الفيوز خالص وحاطط حتة سلك تخينه مكان الفيوز ويقولى دور المهم شوفت دخان طالع من علبة الفيوزات لمحته وانا جوه العربيه بس كان الشمس والحر خلونى اشك انه مش دخان وفضل يحاول وفى الاخر لقيته بيقولى خلاص ياباشا شيلتلك القافله اهي الفيوز معتش بيضرب شوف فيوز اهو بحطه ومبيضربش كدا تمام
طب انا عايز العربيه تدور، قالى مهى كدا بقى عايزه ميكانيكي عشان حساس الدواره دا اللى كان فىيه القافله انا شيلتلك كدا القافله، الميكانيكي يدورها ، قولتله ماشي شكرا والحساب بقى لما ادور العربيه هعدي عليك وانا ماشي
طبعا معترضش لانه عارف هو عمل ايه
المهم ولاد الحلال وصفولى ميكانيكي شغال فى الاسبرانزا قولتله الوضع كذا كذا قالى ياباشا لمبة الebc بتنور قولتله لا ولا حتى لما بتفتح الكونتاك قولتله لا قالى يبقى لسه عندك مشكله فى الكهربا خلى الكهربائي يشوفها قولتله الكهربائي شكله جاب اخره ومش هخليه يشوف العربيه تاني فراح باعت معايا الواد اللى عنده ومعاه لمبة تست وفيوزات وكنترول عربيه فرنا وجه يشوف المشكله وبعد الكشف على كل حاجه قالى ياباشا علبة الفيوزات شكلها ضربت وريحتها شياط اصلا ومفيش كهربا طالعه على الفيوزاللى كان بيضرب دا كدا انت محتاج كهربائي كويس يراجع على العربيه ويتأكد وحسبي الله ونعم الوكيل
قولت دي غلطتى انى خليت اى واحد يشتغل فيها وعملت تلفونات لحد موصلت لواحد بيقولوا انه كويس روحت جبته بعربيه وجيت فضل يقلب فى العربيه يمين وشمال والفيوزات اللى فى الشنطه والفيوزات اللى فى التابلوه وفى الاخر قالى علبة الفيوزات اللى في الكبوت شكلها اتحرقت كدا انت محتاج تجيب علبة فيوزات روحت اسأل على علبة الفيوزات لقيت سعرها 1200 جنية يعني عشان في قافله بتضرب فيوز الجهل دخلنى فى علبة فيوزات ب1200 جنيه
المهم روحت اتكلمت مع الميكانيكي وقولتله علبة الفيوزات فعلا اتحرقت وسعرها عالى ايه الحل قالى على فكره ممكن لو حد بتاع الكترونيات يقيسهالك ويشوف ايه الخط اللى فاصل ويلحمه قولتله يعني مش هي عباره عن مكثفات واي سي وترانزستور وكدا قالى لا هى مجرد خريطه بتوصل دواير ببعضها قولت حلو انا عندي فكره عن الالكترونيات دي لعبتى قولت اجرب واشوف رجعت للكهربائي خدت منه علبة الفيوزات البايظه قولتله هحاول اشوفلها حل واجيلك بكره وسيبت العربيه مركونه فى الشارع وروحت البيت جهزت العده كشاف وعدسه وافوميتر ونزلت من على النت الكتالوج بتاع الخريطه بتاع علبة الفيوزات كان فى حد هنا حاططها وبفضل الله عرفت الخط اللى فاصل ووصلت للرجلين اللى المفروض يكونوا واصلين وعملت كوبري ولحمت الخط اللى فاصل
ملف مرفق 15744ملف مرفق 15743ملف مرفق 15745ملف مرفق 15746ملف مرفق 15747
وروحت للكهربائي قولتله ركب كدا وجرب
ركب العلبه ووصل مجرد بنفتح الكونتاك راح الفيوز رجع يضرب تاني قولت كدا الحمد لله العيب القديم رجع لوضعه فضل ماشي مع الضفيره طلع فى سلك عريان بيلمس فى حوض العربيه عامل قافله راح مغطيه بشيكرتون وغير الفيوز وكله رجع لوضعه دور ياعم ودارت العربيه
وبفضل الله وفرت تمن علبة فيوزات ب1200 والمشكلة اتحلت
اللى عايز اقوله اولا متخليش اى حد يلعب ويجرب فى العربيه حتى لو هتركن العربيه عطلانه فى الشارع يومين لحد متجيب حد موثوق فيه
ثانيا علبة الفيوزات مش حاجه وهميه ولا اختراع عشان يكون سعرها 1200 لو اتحرقت عندك شوف حد بتاع الكترونيات كويس يكون عنده صبر واديله الخريطه بتاعتها وهيحل المشكله بإذن الله
ودي الخريطة بتاعت سبرانزا 516 ملف مرفق 15748
ثالثا اسف على طول الموضوع بس حبيت اشارك جايز يبقي مصدر نفع لأي حد يمر بنفس التجربه
