الموضوع: استفسارات قبل البدأ في التغيير

المشاركة الأصلية كتبت بواسطة Ayman Mustafa

السلام عليكم
انا جديد في المنتدي وهو شدني بصراحه لدرجة اني بقالي 3 ساعات بقرا في منتدى الابيزا .. ربنا يكرم كل القائمين عليه

ادخل في الموضوع علطول
انا سيارتي سيات ابيزا 2000 ومسقط لها مكنه 1400 16v//aua من 4 شهور // الموطور القديم كان 1000 8v
المشكله ان في معايا كام مشكله مش عارف ايه سببهم // مع العلم ان خبرتي في السياراه مش بطاله ومش قويه برضو // بعمل الصيانات بتاعتها بنفسي

1- المشكله اللي كانت مع الماطور القديم ومازالت مستمره مع الجديد ان العربيه لما بتسخن سحبها بيقل // يعني هي في الشتاء افضل من الصيف وبالليل افضل من النهار // واحيانا بحس بصهد
2- الفتيس لو انا ماشي والعربيه اترجرجت بسبب الطريق ممكن يفك من التعشيقه بتاعت الغيار // الفيتيس مانيوال
3- سحب وعزم الموطور الجديد بيقل مع الوقت // يعني اول ما اشتريته غير دلوقتي // وانا حاسس ان الموضوع ممكن يكون متعلق بالشكمان عشان في كذا لحام
4- انا حاسس ان صوت الموطور عالي شويه // هل في حاجات ممكن اعملها تساعد على ان الصوت يكون اوطى شويه
5- كتير بحس ان العربيه مفككه وانا ماشي // مع العلم ان العفشه متربط عليها // هل في حاجه محتاجه تتغير
6-من بعد ما الموطور الجديد ركب والعريه من قدام بتحك في مطبات ماكنتش بتشغلني اصلا بالموطور القديم // هل الموضوع متعلق بالعفشه // هل في حاجه محتاجه تتغير
7- واخيرا // انا كنت عاوز اغير الفوانيس بس اناعارف ان في نوعين من الفوانيس للابيزا نوع فيه لمبه واحده للعالي والواطي (ودا اللي عندي) ونوع تاني فيه لمبه للعالي مستقله عن لمبة الماطي // وانا بصراحه مش عارف ايه ممكن يكون افضل وليه

أهلا بيك معانا وإن شاء الله تستمر وتفيدنا بخبراتك.

أنا ما اتعاملتش مع سيارات سيات قبل كده ولا أي حاجة من مجموعة فولزفاجن.. بس أنا هجاوب على اللي أعرفه بحكم إن بعض الأعراض عامة في السيارات...

سؤال رقم 1...
طبيعي جدا إن سحب العربية يقل مع الحر لإن كثافة الأكسجين بتقل في الجو كل ما الحرارة زادت..
وده معناه إن المتر المكعب مع الهوا على درجة حرارة 30 وزنه أقل من نفس المتر المكعب على حرارة 15.. وبالتالي كمية الهوا والأكسجين أقل..
وبدون الأكسجين لا يمكن يتم حرق للبنزين... فلما الأكسجين بيقل طاقة الموتور بتضعف.

سؤال رقم 2..
لو ما كنتش غيرتهم قريب فراجع قواعد الموتور والفتيس ... القواعد دي بتمسك الموتور مع جسم العربية جوه حوض الموتور وهي عامل أساسي في سلاسة الحركة في العربية.

سؤال رقم 3..
سحب العربية بشكل عام بيعتمد زي ما قلنا على كمية الأكسجين اللي داخلة.. وكمان سهولة دخول الهوا إلى داخل السلندر...

السلندر عامل بالضبط بالضبط زي السرنجة ... البستم بتاعها مش هيتحرك لو سديت الفتحة بتاعت السرنجة..
فاتأكد من إن فلتر الهوا نظيف.. وإن مجرى الهوا نظيف ومافيهوش أي رواسب... وأنصحك تستخدم منظف دايرة البنزين (البخاخات).... وغالبا هتحتاج تنظف البوابة..

سؤال رقم 4...
احتمال تنظيف الموتور يخلي صوت الموتور أهدى كتير...

سؤال رقم 5...
راجع على قواعد الموتور والفتيس زي ما قلتلك... 80% المشكلة من هناك... راجع بردو على البطاحات (الوصلات اللي ماسكة المساعدين الأماميين والسست في جسم العربية)

سؤال رقم 6...
غالبا الموتور الجديد أتقل ... وده طبعا خلى العربية أوطى من الأول.
اكشف عند مركز كويس لضبط الزوايا والمفروض يقولولك إيه المشكلة في العفشة.
ممكن تكون البطاحات عايزة تتغير.

سؤال رقم 7..
من وجهة نظري مفيش فرق كبير... خصوصا لو جبت اللمبات المضبوطة بتاعتها..
الميزة الأساسية للفانوس أبو لمبتين من وجهة نظري هي إن لما لمبة تتحرق هتغيرها هي لوحدها... بس تكلفة زيادة طبعا..


وانتظر ردود أخرى.. ممكن حد تاني من الزملا يفيدوك أكتر مني.

...