حضرتك بتتكلم على الرينو لوجان .. مش كده؟؟؟
اللي أعرفه إن المقاس اللي عند حضرتك ده هو أعرض مقاس نزل على اللوجان.. مفيش حاجة أعرض من كده على نفس الجنط...
مشكلتك حاليا إنك لو عرضت الكاوتش احتمال كبير تحتاج تعرض الجنط معاه.. علشان كل ما البروفايل بتاع الكاوتش نقص كل ما كانت الفردة محكومة بمقاسات محدد في عرض الجنط.
المقاس اللي مع حضرتك (195/60r16) يركب على جنط عرضه من 5.5 إلى 7 بوصة
المقاس الجديد الأنسب هو 215/55r16... وده يركب على جنط عرضه بين 6.5 إلى 8.5
لو الجنط عندك عرضه 6 بوصة... يبقى ما ينفعش تعرض الكاوتش أكتر من كده...
لو الجنط عرضه 6.5 أو 7 يبقى ممكن نفكر في كاوتش أعرض...
بالنسبة للتأثير على العفشة... فأنا ما أتوقعش وجود تأثير سيء.. لإن الشيء الأساسي اللي بيبوظ أي عفشة هو زيادة وزن العجلة بالكامل (جنط وكاوتش وطنبور فرامل... وحتى المقصات)...
يمكن اللي ممكن يأثر شوية هو زيادة إحساسك بالمطبات العالية لإن عرض الكاوتش زاد .. وبالتالي هتعدي على مطبات كان ممكن تتفاداها الأول بالكاوتش الأرفع.
إنما بالنسبة للنقر.. فالمفروض إحساس بيها يقل لإن العرض الزيادة هيخليك تمشي على النقر الصغيرة بدون النزول فيها.
بالنسبة لاستهلاك البنزين.. فده برده مش هيبان معاك إلا على السرعات العالية (فوق الـ100 كم/س).. والاستهلاك بيزيد علشان العرض الزيادة في الكاوتش بيعمل مقاومة هوا أكبر أثناء المشي.
بس ما تنساش كمان إن الدركسيون هيتقل شوية ... خصوصا وانت بتركن أو على السرعات البطيئة قوي.
سؤالي دلوقتي.. حضرتك عايز تغير المقاس ليه؟؟
عموما... نصيحتي ليك.. خلي المقاس زي ما هو.
...
المفضلات