الموضوع: تقرير كامل عن رينو كادجار ٢٠١٧

تقرير عن الكادجار الفئه الثالثه بعد ٥٠٠٠ كم
أرجو أني مكنش ظلمت السياره في التقرير لأني نازل من. BMW X3
اولا : الشكل الخارجي
السياره لها شكل هجومي تحفه من الأمام مميز بالليد الأمامي وعلامه رينو الكبيرة مع الشبك والنيكل
من الجوانب مساحه الشبابيك مع إطار النيكل عليهم بالاضافة للنيكل والفايبر الأسود علي الأبواب من تحت مخلي ألعربيه شيك ومميزة جدا
من الخلف للأسف السياره من وجهت نظري فقدت الطابع الهجومي اللي كان في الأمام وبانت اصغر في الحجم بعكس الشكل الأمامي علي الرغم من الليد الخلفي المميز
اضاءه الفوانيس الزيتون جيده جدا جدا جدا عالي وواطي صحيح

متتخضش وانت بتشتري لان الفوانيس بارزه عن جسم السياره فحاول تبعد عن العجل والموتسكلات علشان ميأخدش الفانوس معاه

فوانيس الشبوره مش هتعرف انها شغاله الا اما تشوف العلامه بتاعتها في التابلوه نظرا لصغرها وارتفاع السياره

سنسور مطر وسنسور اضاءه لا يوجد رشاشات فوانيس
بصمه للبابين الأمامي

إشارات مرايات ومرايات ضم اوتوماتيك اول ما تبعد عن السياره

الجنوط ١٧ مميزه وتعطي السياره شكل رائع من الجنب والكاتوش كونتيننتال ٢١٥-٦٠-١٧

الايريال من اللي بيتفك والحمد لله الْيَوْمَ اللي ركبته فيه اتسرق

العيب اللي ظهر معي عند ٣٠٠٠ كم في الشكل الخارجي هو ان فريم بينالزجاج الأمامي من فوق والسقف البانوراما فك لوحده ودا مما يدل علي التقفيل السئ
تقييم الشكل الخارجي
٧/١٠

ثانيا: ارتفاع السياره
ارتفاع جيد جدا ومناسب لحجم السياره

ثالثا : السياره من الداخل
١- فتحات التكيف بارزه قليلا وعليها ايطار نيكل والتابلوه خاماته جيده جدا + أضافه كاربون فيبر
٢- الشاشه والعدادات الديجتال جيده جدا ويمكن تغير ٥ أشكال للعداد و٦ ألوان مختلفه مميزه
٣- النافيجيشن كويس بس محتاج ابديت للخرائط
٤ - وحده البلوتوث جيده جدا
٥- سوفت وير الشاشه r-link من أسوأ ما يكون
مش بيشتغل مع كل الموبايلات يعني مثلا تليفوني I phone 6s plus ومشً بيشغل ميديا يعني لا سوند كلاود ولأي اَي صوتيات من خلال البلوتوث يعني تليفونات بس وكفايه عليك كده وعلي فكره اللي عرفته كمان ان كل تحديث المارشيميلو للأندرويد جلاكسي سامسونج برضه مش بتشتغل
٦- لا يوجد مدخل سي دي بالسيارة
٧- ٢ يؤ اس بي و Aux
٨- هاند بريك اوتوماتيك متتعبش نفسك وتيجي ناحيتها هيا بتشتغل اوتوماتيك مع ال P,D,R
9- نظام مراقبه ضغط الاطارات تحفه جدا وبيديك قرايات متغيرة حقيقيه طول ما إنتا ماشي وبيقسها بالبار
١٠ - ايكو سيستمً تحفه فعلا بس مش دي تيربو فين بقي زرار اسبورت
١١- نيجي بقي علي أكتر حاجه معصباني من ألعربيه وهي توزيعه المالتي فانكشن بتاعت الرينو
مثبت السرعة جنب الهاند بريك اما بقيته علي إيدك الشمال في التاره
التحكم في الشاشه والراديو و التليفون مخبيينه في مكان عبقري علشان الحسد فخلي بالك وانتا بتحسس علي الزراير فوق وتحت
١٢ - وحده رفع يتيمه للسواق فقط ومبتشتغلش مع المفتاح فخلي بالك أقفل كل الازاز قبل ما تبطل ألعربيه لانه مش بيوصله كهربا حتي لو فاتح الكونتاكت
آه صحيح حوال تحفظ مكان زراير الأبواب والمرايات لانها مبتنورش بالليل هوا زرار السواق بس
١٤ - نيجي بقي لاكتر حاجه تضحك أزرار سخانات الكراسي مخبينها تحت إيدك في المجضع
يعني حضرتك مش هتعرف ان السخان بتاع الكرسي شغال الا اما تقول هح هح وتضطر تركن الساعة ٢ الظهر بره ألعربيه في الحر علشان تستني اما الكرسي يبرد
١٥- انوار الفيتيس سيئه جدا
١٦- كورسي السائق كهربا بس كان محتاج يوطي شويه كمان ويرجع لورا
١٧ - فرش الكراسي معقول وبصراحة الكراسي مريحة ومش بتوجع الظهر ومجضع الرأس ممتاز
١٨- إياك تحط كان بيبسي أو ازازه مياه في مكان الكوبيات لانه مفيهوش هولدر ومع اول دوسه فرامل هتركن وتقعد تنصف الهاند بريك و مثبت السرعة والفيتس
١٩ - في بقي فتحه مدوره دي تحط فيها الجنيهات الفضيه
٢٠ - الفينش بتاع الكونسول سئ
بدأت اسمع شويه أصوات منه
٢١- التكيف كويس dual zone بس ضعيف جدا مع الإيكو
وهناك عيب بقي خطير انك اما بتعمله off بيدخل هوا من بره اجباري من فتحات التكيف
٢٢- الفتيس دويل كلاتش ٧ سرعات بس خلي بالك هوا رياضي آه بس مدوسش عليه جامد لان اول غيارين وآخر غيارين علي كلاتش واحد يعني الفركه اللي في الاول وجريك علي سرعات عاليه هتلاقي ألعربيه داخله علي ٦ rpm ومش هتفصل غير لما تخف رجلك من علي الدواسه وإلا هيحصلك زي ما حصل معايا وrpm نزل علي الأحمر والمكنه فصلت حوالي 5 ثواني واشتغلت تاني
٢٣ - خلي بالك خلي بالك خلي بالك من اللي هقوله ده لان كل اللي فات حمادة ودا حمادة تاني العربيه مفيهاش أوتو هيل
يعني معاليك تبقي طالع كوبري والدنيا جميله وهوبا الطريق وقف والعربيه علي ال D تيجي معاليك تدوس تلاقيها بترجع لورا وهوب تبوس اللي وراك أو تتعلم من غلطك فتدوس جامد فهوب تبوس اللي قدامك حاول تكريكلها زي بتوع النص نقل
٢٤- ألعربيه سحبها حلوه جدا وعزلها ممتاز أنا مشيت بيها ٢٠٠
تجميعها رائع وثباتها اروع بس متقرص علي كل غيار علشان الفتيس هيا بتجمع حلو جدا مع دوسه متوسطه
٢٥- لا يوجد تكيف خلفي وتوزيع التكيف للخلف في الاول ضعيف
٢٧ - السياره وسعها من الخلف كويس وقعدتها في الخلف مريحة
28 - صحيح صوت التيربو هتسمعه وانت بتسوق ( وويينننن )
٢٩ - ستاره البانوراما غير مثبته من الجنب فَلَو فاتح ازازك والستارة مقفوله هتسمع صوت طرقعه فوق ودنك الشمال
٢٩- عفشتها حلوه بس مش ناعمه
٣٠- سنسور امامي وخلفي وكاميرا
السنسور الأمامي بيشتغل اوتوماتيك لو قربت من حاجه
من الاخر عربيه ممتازة مقارنه بسعرها والفئات المنافسه ليها
شكل مميز
كونسول جميل
اوبشن متنوعه
هتستمتع بركوبتها

أرجو أني أكون قدرت اقدم تقرير كويس عنها واعذروني لو جنيت علي العربيه لان بقالي فتره راكب ألماني وفِي فرق شاسع في الزرار نفسه

وان شاء الله هرفعلكم شويه صور للفئة اللي معايا

المشاركة الأصلية كتبت بواسطة man1974

تقرير محايد ورائع،
جزاك الله كل خير

شكرًا ليك