كنت شاركت من ثلاث سنين عن مميزات وعيوب الصنى الشكل الجديد وذكرت ان الاتزان جيد وانى ناوى اغير مقاس الكاوتش من 185*65*15 الى 195*60*15 لتحسين الاتزان

اولا اتزان السياره بيتاثر بضغط الكاوتش ووجود رياح- لو فى عامل من دول عندك اتزان العربيه بيكون ردىء بعد ال120 كم فالساعه

انا لاحظت ان الاتزان عندى بيسوء- فابتاديت بالسهل وانى اظبط ضغط الكاوتش وجربت العربيه- لقيت الاتزان اتحسن لكن مش للدرجه- وبما انى بسوق داخل المدينه ومفيش رياح فبالتالى برجح ان حاله الكاوتش هى السبب

قبل ماغير الكاوتش, عملت ظبط زوايا فالمنيل الروضه عند واحد اسمه جرجس (المهندس صفوت جرجس) بالقرب من سينما جلاكسى- ظبط الزوايا وبعد دا لاقيته بيوصل الكومبيوتر بتاعه بالعربيه- فسالته انت بتعمل ايه
قالى عشان العربيه دى دركسيون كهرباء فلازم يعاير او يعرف الكوبيوتر بتاع الدركسيون فنقطه الصفر الجديده بتاعته (دى معلومه جديده عليا)

روحت لبتاع الكاوتش وتفقت معاه على فرده 195*55*15 ماركه GT اندونيسى (كنت عايز اوطى العربيه واعرض الكاوتش)- واحنا بنركب اول فرده على الجنط الحديد لاخظنه ان الفرده عريضه جدا عن الجنط وخفنا نكمل تركيبها لحسن تتقطع

فغيرت رائ وغيرت المقاس ل195*60 ماركه Good Year تركى انتاج 2016- 4 فرد

اول ميزه اللى حستها علطول بعد التغيير هى الاحساس بالمطبات اتحس (وهى دى الميزه الوحيده) ويمكن صوت الكاوتش قل عن الاول
طبعا دا احساس طبيعى عشان فرده لسه جديده

نيجى لاهم سبب انا مغير الكاوتش عشانه "الاتزان"

الاتزان داخل المدينه لحد سرعه 100 فى تحسن- تحسن مقبول- مش فرق فظيع يعنى

جربت العربيه فالسفر وكانت المفاجئه
على طريق العين السخنه العربيه كانت ردئه جدا- الهواء كان بيمرجح العربيه
مقدرتش اذود عن 120

مقاس الكاوتش دا حلو جدا داخل المدينه والمطبات والدائرى لكن على طرق السفر المفتوحه ردئ
دى تجربتى مع المقاس ال195*60

انا مش عارف هل دا عيب مقاس ولا نوع الفرده ولا ممكن يكون فى عيب تانى فالعفشه مثلا - مع العلم المقاس الفابريكه ال185*65 مكنش بيعمل كدا معايا
ثانيا هل فى حد من ملاك الصنى ركب ال195*60؟ او اى مقاس تانى وايه اخباره معاه؟