سلام عليكم

والله مانا عارف اقولكم اية .. بس اسوأ حاجة ممكن تحصل انك تفقد السيطرة على العربية

وانا مروح من ساعة تقريبا ماشى عادى خالص فى الطريق الزراعى ما بين طنطا و قويسنا باتجاة القاهرة ومكنتش بجرى ماشى تقريبا 120 .. بصراحة مش فاكر بالظبط يمكن اكتر شوية

و منمتش لسة من امبارح غير تلت ساعة بالظبط الصبح ..

كنت ماشى فى الحارة اللى فى النص وفى عربية فى الحارة الشمال وعربية قدامى لكن بعيد شوية

المهم اللى قدامى كان ابطا منى و كنت عايز اهدى لان فى عربية شمال ودة فى النص قدامى ... والحارة اليمين تقريبا كانت عبارة عن كوبرى سطحى ومقفولة بخرسانة زى اللى بتكون فى نصف الطريق ما بين الناحيتين .. الناحية اليمين مقفولة على شكل منحنى كدة السنتر بتاعة ناحية الطريق قافل الحارة اليمين خالص

المهم فرملت شوية مش قوى ومرة واحدة لاقيت العربية بتصرخ ورايحة باتجاة الخرسانة اللى على اليمين وعمالة تصرخ اكتر واكتر

على اخر لحظة لما خلاص كنت فى الخرسانة دى كسرت الدركسيون شمال تانى وفاديتها بالعافية وانا على يقين انى خبطت فى الخرسانة وما صدقت عديت منها والعربية وقفت بعدها مباشرة روحت مبطل العربية وانا برضو على يقين انها مش هتدور تانى من الخبطة

وعلى يقين أكبر و أكبر انى هنزل الاقى ربع العربية اللى قدام يمين دة متدمر تماما

وكانت المفاجأة بستر ربنا انة الحمد لله جسم العربية محصلهاش اى حاجة باسثناء انة الكاوتش اتقطع والجنط فى جزء منة اتدمر واتعوج خالص .. لكن جسم العربية بفضل الله لم يلمس الخرسانة

لكن اية اللى عمل كدة فى الجنط ؟ تقريبا والله أعلم انا طلعت على حرف الخرسانة دى بالكاوتش ومن ستر ربنا ان كان جنبها تراب عالى

طبعا دة شوفتة لما رجعت علشان ادور على الطاسة بتاع الكاوتش لان كل اللى فاكرة لحد الأن ان كبوت العربية كان لازق فى الخرسانة وعديت منها بستر ربنا ليس إلا

كل دة يا جماعة فى ثانية ولا اتنين

انا بحكى دة كلة علشان الناس تاخد بالها

مرة واحدة العربية رايحة بيك على كتل خرسانية وانت فاقد الكنترول عليها تماما وقاعد مكلبش فى الدركسيون

والعربية ماشية باتجاة خرسانة ومش عارف تعملها حاجة

والعربية محدفتش كتير اصلا دى حدفت حاجة بسيطة خالص لكن الخرسانة هيا اللى كانت قاطعة الطريق وقافلة الحارة اليمين تماما

و انا محدوف عليها زى الطوبة ...

يا ريت كل واحد يتخيل بقى الأحساس اية ساعتها

والله دايما كنت بفكر اللى بيعمل حادثة بيكون احساسة اية وهوا داخل يخبط بوشة كدة ومش عارف يلم العربية.. وادينى جربتها مرة بجد وربنا ستر والحمد لله

الحمد لله رب العالمين انا لحد الأن مش مقتنع ان العربية سليمة ولا مصدق انى محصليش حاجة

وقفت وبطلت العربية ونزلت بصيت عليها من اليمين لاقيت الكاوتش فقط اللى مقطوع والجنط متطبق شوية من ناحية واحدة والطاسة مش موجودة

عربية كانت ماشية ورايا وقفت والراجل جة قالى عايز حاجة ؟ قلتلة لأ شكرا ومشى وسابنى

مكنتش عارف اقولة اية الصراحة مكنتش ملموم على نفسى اطلاقا وهوا مش عارف كان مقلق يقف معايا ولا فى اية .. بس تقريبا كان ماشى ورايا وشاف اللى حصلى

المهم رجعت شوية علشان ادور على الطاسة ملاقيتهاش طبعا وقعدت اتفرج على الخرسانة اللى كنت هلبس فيها

وعلى اثار الكاوتش وهوا معلم فى الأرض زحف باتجاة الخرسانة ومن بعدها مكمل برضو باتجاة اليمين لحد الحتة اللى العربية وقفت فيها

وبعدين ابتديت احاول اغير الكاوتش

و اذا بالمفاجأة الجميلة بقى الصليبة مشقوقة من الناحية اللى على مقاس الكاوتش
كل ما اجى افك تلف على الفاضى

قعدت شوية خدت نفسى وبعدين دورت العربية والحمد لله مشيت تمام
ونزلت الكاوتش اللى مفرقع على التراب وفضلت ماشى على الأول حوالى عشر دقايق

وكل شوية كنت بقف ابص على الكاوتش والجنط

وفى مرة من المرات وقفت قدام فتحة من اللى فى الجزيرة
وحاولت اشاور لأى عربية اخد منها صليبة محدش رضى يقفلى غير واحد بتاع عربية نقل والصليبة بتاعتة كبيرة منفعتش وحاول يوقفلى حد معرفش

قلتلة خلاص شكرا اتكل انت على الله ... ومشى

وفى مرة من المرات اللى كنت بقف فيها ابص على الكاوتش وانا بركب لاقيت على الناحية التانية من الطريق كافتريا...

روحت خدت منها صليبة ورفعت العربية وغيرت العجلة

ولحد الأن والله مانا مصدق اللى حصلى ولا مصدق ان العربية سليمة

كل دة فى ثانية واحدة مش اكتر .... و الله اعلم اية سبب دة كلة ؟

يا ترى الكاوتش كان مريح؟ ولا هوا فرقع وانا ببتدى افرمل ؟ ولا مشكلة فى الفرامل ؟

انا والله مانا عارف ان كان الكاوتش فرقع الأول ولا خبطت فى الخرسانة الأول ولا انا اصلا مخبطتش فيها... لكن الكاوتش مقطوع و بعدها بحوالى عشرة سنتيمتر الجنط متطبق

غيرت الكاوتش طبعا وابتديت امشى فضلت مشغل الأنتظار وماشى 50:60 مزودتش عن 60 خالص كنت برفع رجلى اصلا علشان انقل بالعافية لان اعصابى ضربت خالص


ولحد دلوقتى بسأل نفس الكلام دة لو حصلى بالانوس كان زمان اية الوضع دلوقتى !!!


خدو بالكم يا جماعة ...
الدنيا بتتقلب فى ثانية ...
وربنا اللى عالم الموضوع هيرسى على اية ...

ربنا يسترها معانا جميعا