الموضوع: نفضة مع الغيار الثاني في نيسان صني 2011 اوتوماتيك

السلام عليكم يا اهل الخير
انا معايا نيسان صني 2011 اوتوماتيك N16 ماشية 80000 ك ومن شهرين بدأت احس بنتشة خفيفة من الاول للثاني ومن الثالث للثاني. بحس بنفضة بسيطة في العربية كدا مع الغيارات دي وخصوصا لما العربية بتكون باردة او مركونة كام ساعة كدا. مؤخراً ذادت حددة النفضة ففكرت انه ممكن يكون من زيت الفتيس. انا كنت غيرت زيت فتيس في الكيلو 44000 وحطيت وقتها زيت امارات مصر. قلت يمكن يكون الزيت عمره خلص فغيرته الاسبوع اللي فات بزيت Aisin بتاع التيوتا بعد ما عرفت انه بينفع مع النيسان.
الحقيقة غيرت الزيت والمشكلة موجودة. روحت للميكانيكي وقاللي ده ممكن يكون علشان ماغيرتش الفلتر وممكن يكون عطل في علبة البلوف وفيه سيلينويد مسدود او حاجة. المهم ان قاللي الموضوع بسيط وممكن تمشي بيها عادي وتغير زيت وفلتر بعد 10000 ك واحط زيت موبيل 320 والدنيا هاتظبط معايا.
مش عارف اسمع الكلام ده ولا هاندم؟ انا مابحبش اهمل في العربية واسيبها فيها عيب. بس في نفس الوقت خايف اخسر ثمن الزيت لو غيرتة دلوقتي علي الفاضي. ومش عارف اعمل ايه علشان اتاكد من سبب المشكلة وحلها. لو حد حصلت معاه قبل كدا او عنده معلومة ياريت يفيدني
مع الشكر يا رجالة

اتأكد مقاس الزيت مظبوط

اللى اعرفه ان اليابانى و من ضمنه نيسان .. بيكون القياس على ال P ( موش ال R )

الطريقه
1- بتمشى بالعربيه مشى طبيعى بدون حرق على الغيارات لمده 5 او 10 دقائق فقط .. موش اكثر من كده ( تسخين الموتور موش كفايه .. لازم تمشى على زيت الفتيس كما اوضحت )
2- و العربيه دايره .. تبدأ من ال P و تجيب النقلات كلها و تقف على كل نقله عده ثوانى .. و بعدين ترجع بالعكس حتى P
3- تقيس الزيت بعد كده .. المفروض يكون على علامه max او Hot .. يعنى على اعلى علامه فى مقياس زيت الفتيس


فى العاده الفرق بين القياس ال P و ال R بيكون فى حدود نصف لتر ( ده الفرق اللى عندى فى متسوبيشى ) .. و الفرق ده لو ناقص ممكن يعمل خبطه او غلطه عند النقل فى المشى البطيئ حسب تجربتى

انا عرفت موضوع تغير الفلتر ده بعدها للاسف. معنديش اي مشكلة خالص اني اغير زيت وفلتر بس اتاكد الاول ان هو ده الحل علشان ماغرمش 1000 ج علي الفاضي. عموما انا رايح التوكيل يوم الاحد. هما قالولي هناك ان احتمالات العطل ده كتيرة قوي واخرهم الزيت والقلتر. يعني ممكن تكون البوابة عايزة ظبط كمبيوتر او بوجيهات او فيش كهرباء بتاعت فتيس. ادعولي الموضوع يتلم علشان انا بخاف قوي من فتحة بق الفتيس :)

المشاركة الأصلية كتبت بواسطة ahmed.zahra

حضرتك كان لازم الفلتر يتغير أو يتنظف و ما تقلقش ان شاء الله مفيش مشكلة. و انصحك لو الظروف تسمح انك تشتري فلتر و تغير الزيت و حط موبيل 320

[RIGHT][COLOR=#5D5D5D][FONT=&quot]

تقرير سريع كدا ومختصر عن رحلتي في التوكيل امبارح وانهاردة للكشف عن سبب النتشة
امبارح في مودرن اوتو الدقي قضيت يوم كامل علشان يعرفوا السبب. في الاول قالولي ان مفيش حاجة متسجلة علي الجهاز. طلبت اني اسيب العربية تبرد فترة لأن النتشة مش بتبان غير وهي باردة. وفي اخر اليوم قالولي ان حساس الفتيس الخارجي عمل error علي الجهاز وانه محتاج يتغير بس مش موجود غير في فرع ابو رواش. الحساس ثمنة ١٨٠٠ج ومصنعية تركيبة ٢٠٠ج.
المهم رحت انهاردة فرع ابو رواش وقالولي لازم نكشف الاول عن العطل ويتأكدا منه الاول ماينفعش يركبوا الحساس علي طول من غير كشف. وبعد الكشف علي العربية وهي باردة ماظهرش حاجة علي الجهاز. كشفوا علي فيش الفتيس كلها والقواعد كمان وبرضة مفيش. سألت علي حتة فلتر زيت الفتيس قالولي ان مفيش فلتر فتيس اساسا وانها بتكون مجرد مصفه ومغنطيس.
الخلاصة اني مشيت من عندهم ان العربية سليمة ومفيهاش حاجة واني امشي عليها كدا عادي مفيش قلق.
وانا الحقيقة هاعمل كدا واشتري دماغي الا لو كان حد من الاعضاء عنده فكره عن السبب او حصلت معاه قبل كدا ولقالها
شكرا جزيلا لمشاركتكم

اكشف على مستوى زيت الفتيس بالطريقه اللى وضحتها لك فى ردى فوق

الكشف يكون على غيار ال p ( موش r ) .. و يكون بعد المشى على العربيه 5 او 10 دقائق بالكتير سواقه عاديه بدون حرق .. المفروض الزيت يكون على العلامه العليا


و ممكن كمان تنظف فيش الفتيس .. بس كهربائى لازم لازم يكون شاطر و دقيق

يا باشا كشفت علي مستوي الزيت في التوكيل امبارح وقالولي تمام. كان نفسي يبقي هو السبب وكان هايبقي الموضوع بسيط وملموم وقتها.