الموضوع: طفولة بس مسخرة بس بريئة

بما انى اكبر اخواتى فمكنتش بلاقى حد اناكف فية كتير

كنت غاوى استخبى و أخض أى حد .. اكتر واحدة والدتى ربنا يعينها بقى

مرة كومت اللحاف فوق السرير وروحت مستخبى تحتة وبعدين هيا جت ترتب السرير واول ما شالت اللحاف لاقت اللى طلعلها ... شهقة طويلة .. وتوقعو الباقى بقى

مرة تانية اشتريت تعبان وطلعت قعدت جنبها على السرير وبعدين حطيتة وقومت جرى وقفت جنب باب الأوضة وهيا تقولى فى اية ؟؟؟ اشاور وراها وعمال ازووم كأنى مش قادر اتكلم وعامل مزعور بقى
لحد ما بصت وراها لاقيتها عينها برقت وشهقت جامد ومرة واحدة لاقيتها واقفة جنبى معرفش ازاى ههههه
ابويا كان قاعد متحركش اصلا وقعد يضحك

غير كدة بقى كنت غاوى كل ما هيا تعمل شاى أحطلها فية ملح مش عارف لية
وهيا يا عينى بقى بعد ما تخلص شغل البيت وتعمل الشاى وتيجى تقعد بقى تستريح وتبتدى تشرب الشاى ههههههه
بس ساعات كانت بتصعب عليا واعملها غيرة

ودايما كانت تخبى منى علب الشيكولاتة بس على مين

وكذلك اللحمة كانت بتتفنن انها تخبيها منى فى التلاجة بس برضو مكانتش بتفلت منى لحد ما عمتى اقترحت عليها مرة تشيلها برا التلاجة خالص

ومن زمان وانا كائن "ليلي" مبحبش انام بالليل خالص .. كنا نبقى مسافرين مثلا تانى يوم مرضاش انام ويخبو منى مفتاح العربية علشان مقعدش فيها .. كانت 124 ايام ما كانت فى عزها بقى
بس كنت بعرف افتحها مش فاكر ازاى بس كنت بفتح الأزاز الصغير اللى قدام لوحدة شكلة مثلث دة جنب الأزاز الكبير واقعد اعافر لحد ما اطول الأوكرة
على ما اذكر كانت بتفتح من جوا حتى لو المسوجر نازل
و الأوكرة كانت بتبقى قريبة من الازاز دة وكنت بطولها بالعافية وعيش بقى