الموضوع: تجربتي المريرة مع اوبل استرا j

السلام عليكم و رحمة الله

كل سنة و انت طيبين

انا حابب بس احكي لكم تجربتي مع اوبل و توكيل اوبل علشان الناس اللي ناويه تشتري العربيه او معاها تعرف الدنيا فيها ايه

انا من اول الناس اللي اشترت العربيه في نص 2012...قعدت ادور ع النت عليها لحد لما اقنعت نفسي انها كويسه و اعتمادية و كده..و لاني من بورسعيد و مفيش اي مركز صيانة في محافظتي كنت عايز اشتري عربيه بتاعه سفر و مريحه و عنصر الامان فيها عالي

العربيه الان عامله 114 الف كيلو.....كل الصيانات الدورية في الضمان....مفيش مسمار اتحط فيها مش اصلي.....و مفيش ميكانيكي بره التوكيل حط ايده في الماكنه بتاعتها.....و العربيه اصلا استخدامها للسفر لاني معايا عربيه صغيره جوه البلد

القصه ما فيها اننا من اول يوم و بيتنصب علينا....عربيه مصنوعه في بولندا و بيبيعوها انها الماني....تروح للشركه تقولك ما نعرفش...تعمل شكوي في جهاز حماية المستهلك و هلم جرا

هل يا جماعه حد يصدق ان عربيه زيرو المفروض انها reliable يحصل فيها الاتي:

- ميه العربيه تنزل من مستواها علي طريق القاهرة بورسعيد و تقف كل شويه تزودلها ميه علشان تكمل....تروح فرع مدينه نصر يقول عايزه تغير كوع الثرموستات....و اصله مش موجود عندنا و النهارده الخميس...يعني ايه ؟؟؟ يعني تبات في القاهره و تروح تغيره يوم السبت في الفرع الرئيسي.....................(تم تغيير جوه الضمان في القاهره وتغيير غطا القربة لاحقا في فرع المنصورة بسبب نزول في مستوي الميه )

- طول ما ات ماشي العربيه بتكركر معاك...تروح المركز الرئيسي يقول لك فول ب 95 علشان الدنيا تبقي تمام....تعمل كده و لا الهوا....ترجع تاني يقولك اصله فيه مشكله في السوفت وير . هننزلك سوفت وير جديد..................( تم تغيير السوفت وير في الضمان بعد مشوار مرتين)

- تمشي في امان الله تلاقي العربية شغاله علي طول.....تروح اقرب فرع ليك اللي هوا شربين او المنصورة يقولك دع هاوسنج الثرموستات و مش عندنا....ترجع تاني علشان تغيره ( تم تغيير هاوسنج الثرموستات في الضمان)

- تبقي راكب عربيتك تلاقي جلد عصايا الفتيس بتقشر...تروح للمركز الرئيسي يقولك احنا مالنا...تقولهم سعرها كام يقولك 3000 جنيه ( قبل ما الدولار يغللي) تروح تقابل مدير مركز الصيانة و يكلملك اوبل علشان توافق انها تغير في الضمان لان العربيه كانت 40000 كيلو......يوافقوا يغيرهولك و تيجي لي بعد سنة و نص من الشكوي و الزن المستمر ( اه و الله سنه و نص) (تم تغيير عصايا الفتيس في الضمان )

- خرجت من الضمان و العربيه عامله 70 الف كيلو....و قبل ما تخرج كنت مبلغ شكوي ان فيه رجرجه مش طبيعه في العربيه .....و كان ده مكتوب عندهم....بعد ما خرجت من الضمان قالوللي ان الرجرجه دي من الموبينه و ازم تتغير.....قالوللي الموبينه دي في فرع اسكندرية....رحت فرع العامرية اللي في اسكندرية و بعد مناهده اتحملت 40% من التكلفه ..........( تم تغيير الموبينه علي 70 الف)

- بعده بشويه و انا لماشي لقيت ان لمبه الموتور منوره و ال esp بيفصل و العربيه ما بتسحبش......رحت التوكيل مرتين لانهم ماكانوش عارفين لها و قالولين ده حساس المنفولد بتاع العربية ( تم تغيير حساس المنفولد خارج الضمان)

- كنت ماشي في امان الله بعد ما خرجت من التوكيل بعد الصيانه و كان يوم خميس...يوم الجمعه الصبح لقيت العربيه فيه تكسير في العجل...ايوه تكسير...و بعدين لقيت العربيه وقفت...ادوس بنزين ما بتتحركش...ربنا الهمني اني اجرب مارشدير....جربت...لقيتها بتتحرك....قعدت مسايس العربيه واحد واحده لحد ما رحت لعفشجي....الباشا الميكانيكي اللي في التوكيل كسر مسمار الكاوتش في الطنبوره و ما شالوش....المسمار وقع في سره العجل و بهدل الطنبوره...طبعا كلمت التوكيل مسحت بكرامتهم الارض بعد ما اضطريت اني اروح بالطنبوره للمخرطة

- من شهر و نص و انا ماشي علي طريق سفر و في امان الله يوم جمعه .....ميه العربيه لقيتها بتتبخر من حوض العربيه ..وقفت بيها لقيت تسريب ميه من ماسوره الميه...رحت بيها لميكانيكي ركبللي خرطوم بلدي ( اه و الله علشان امشي بيها)...رحت للتوكيل يوم السبت غيروللي قربه العربيه و حساس القربة و ماسوره الميه ( تم تغيير القربة و حساس القربة و ماسورة الميه خارج الضمان و من جيبي طبعا)

- و انا بسخن العربيه الصبح لقيت صوت الموتور بيعلي و يوطي.....كلمت التوكيل قالوللي ممكن يكون من المانيفولد تاني.....العربيه بعد فتره و الي الان فاصله esp و لمبه الموتور منوره......رحت بيها للتوكيل قاللولي ده غطا التكيهات عايز يتغير....طيب ده ثمنه كام قالولي 7000 جنيه ...و فيه منه هوا هوا بتاع الكروز عامل 2100 ...بس هنجيبهولك لانه مش موجود و الي الان

بعت شكوي لاوبل في مصر......واحد من بهوات الشركة كلمني بشكل مستفز بيقوللي ان انا كنت بشتري قطع الغيار و اركبها بره و اني ما كانش عندي مشكله الا لما تتحل في نفس اليوم.....مش هقولكم انا كان نفسي اقولله ايه لكن انا الحمد لله مؤدب و مش بقول الكلام ده في الصيام ......الحمد لله انهم كلفوا خاطرهم و كلموني علشان يستفزوني......بيقوللي شكوي حضرتك ايه...قلتله شكوتي اني عايز اعرف هل ده طبيعي انه يحصل....قاللي ايوه يا فندم طبيعي جدا لان حضرتك بره الضمان و احنا عملنا اللي علينا معاك جوا الضمان....قلتله يعني مفيش GOOD WILL ....تمام ....طب و ليه حضراتكم ما كتبتوش في جدول الصيانه اننا هنغير الحاجات دي قبل ال 100 الف علشان ناخد بالنا....و ياتري العربية دي بعد ال 100 الف هنغير فيها ايه بالظبط......قلتله و بمناسبه الضمان ...طب ما الصيني عليه ضمان .... YOU CAN SELL RUBBISH ON WARRANTY قلتله كده بالظبط....قلتله ياريت تكتب عندك....العميل غير راضي لا عن الشركة و لا مستوي الخدمة.....و العميل هيبيع العربية و مش هيركب اوبل تاني ابدا

تقول الاسطورة.....ان اللي بيشتري عربيه زيرو و يصينها في ميعادها.....بيقعد اول خمس سنين يغير فيها زيت و فلتر و بس....لكن يا جماعه الخير....العربيه انا شاريه زيرو...كل شفللي بيها سفر يعني ما اتهانتش....مفيش مسمار اتحط فيها بره التوكيل ....و كل صياناتها جوه التوكيل حتي بعد ما طلعت من الضمان ده....يعني ظروف تشغيل مثالية و ماشي جنب الحيط.....

اللي انا كاتبه ده جزء من البهدلة اللي انا شفتها منها لحد 114 الف و مش عارف هشوف ايه تاني منها....بس انا نويت اني اطلق اوبل بالثلاثه و اركب اي حاجه تاني ان شاء الله صيني

محدش يشتري العربية دي ...نصيحة لله.

انا كنت ناوي اشتريها used كوزمو 2013..
انا كان معايا ستيب واي 2015 و كانت مريحاني بس عملت بيها حادثه ف صلحتها و بعتها..

الفكره ان واحد صاحبي معاه استرا انجوي 2016 و بيشكرلي فيها جدا و بيقول انها مريحاه و مشتكاش منها..

انا حاليا بعد بحث طويل قررت اني ابعد عنها نهائي لكثرة مشاكلها اللي الناس بتتكلم فيها و توكيل منصور طبعا..

الحيره بقي.. فانتازيا 2010 او 2011.. ولا بيجو 301 2016 او 2017..

ارجو الرد و الافاده.. و شكراا