سيفيك 2007 1.8 - سيفيك 2017 1.6

السلام عليكم
انأ بدأت السواقة منذ سنتين و نص و ماعنديش خبرة خالص فى السيارات

انا اشتريت وقتها سيفيك 2007 1.8 مستعملة و هيا اللى اتعلمت عليها بس مشكلتها انى لما اشتريتها وقتها كانت ماشية فوق ال 220 الف كيلو و اصحابى بينصحونى دلوقتى انى اقلبها عشان ما اصرفش عليها كتير فى المستقبل ،على سبيل المثال فيها تسريب فى زيت الستيرنج و محتاج 4 مساعدين ، غير ان القرص المعدنى اللى الفرامل بتمسك عليه اخر مرة و انا بخرطه قالولى انه جاب اخره و مش هاينفع يتخرط تانى المرة الجاية

و روحت عملت TestDrive على السيفيك 2017 1.6 ،، بس اول حاجة لاحظتها ان السيارة مش تفتح فى السرعة لو كبست من وضع الثبات للحركة و بحسها مكتومة جدأ ،،، هيا بتفتح بعد كدة لما بتاخد سرعتها فى النقلات و لما كمان بكبس فى الاول صوتها المحرك عالى جدا و بتحس كأنك بتحمل عليها و اللى شغال فى المعرض قالى ده صوت الجير مش المحرك
بعكس سيارتى القديمة اللى هيا من 2007 بتفتح فى السرعة بطريقة ملحوظة من وضع الثبات للحركة ن يعنى لو واقف فى اشارة و انا اول سيارة ،، فعلا بطلع قبل كل السيارات التانية بمنتهى السلاسة و هما بيبقوا لسة ورايا بكتير و مش بسمع صوت جامد زى اللى سمعته فى السيارة 1.6

و انا لما عملت TestDrive مع اتنين صحابى و قلتلهم على الملاحظة دى ، واحد منهم قالى عشان ده فرق الماكينة من 1.6 و 1.8
و صاحبى التانى قالى هيا هاتفتح معاك بعد كدة لما تشتريها و تستعملها فترة عشان دى لسة جديدة فا مش هاتفتح معاك دلوقتى خالص ، مع ان السيارة اللى عملت على التست كانت ماشية حوالى 2000 كيلو
فانا مش عارف مين الصح

و كمان سيارتى اللى من 2007 لو افترضنا انها لسة طالعة من المصنع دلوقتى بحالة الزيرو بس بنفس الموديل القديم و تكنولوجيا الماكينة القديمة و حبيت اقارنها بالسيفيك 2017 بس اللى محركها اقل لأنه 1.6 بس مصنوع بتكنولوجيا جديدة ، فمين بيكون افضل ؟

ال 2007 بتخرج 140 حصان
ال 2017 بتخرج 123 حصان بس

اول حاجة سيارات ال test drive بيكون لية معاملة تانية يعنى التوكيل بيكون لاعب فى السوفت وير مش بيخلى العربية تجرى منك فى الطلعة انت بس بتجرب السيارة كراحة وعفشة وعزل وقيادة , لانهم مش هيدوك عربية تجرى بيها

ثانيا المحركين واحد من الموديلات من 2007-2017 كل اللى اتغير الفتيس فى 2017 بقى cvt ودة هيديك اصلا نعومة واستهلاك بنزين وعدد لفات ماتور منخفضة على سرعات عالية بعكس الاوتو العادى اللى بينزل فى السيفيك

انت معاك ماتور 1800 سى سى ودة قوتة 138 حصان فطبيعى يكون اقوى من ماتور قوتة 123 حصان لكن لو كان معاك السيفيك بماتور 1600 اللى بردة قوتة 123 حصان كانت النتيجة هتلاقى الفروقات قريبة جدا

لو عايز بقى تجرب الفرق هات السيفيك ال rs واركبها دية محركها 1500 سى سى قوتة 180 حصان هتعرف بقى الفرق مابين الاتنين