الموضوع: تقرير صيانه اسكوتر بنفسى

تكمله لعمل الصيانه للاسكوتر بنفسى
من اسبوع وانا ماشى بالاسكوتر دست على مسمار وخرم العجله الخلفيه
سمعت صوت وانا وماشى لما وقفت سمعت صوت الهواء - بصيت لقيت مسمار متنى داخل فالعجله- طلعته
ولغيت المشوار وروحت على البيت- مكنش فى حد فاتح اول يوم العيد الحمد لله كنت قريب من البيت

المهم دى اول تجربه ليا ان العجله تتخرم- فى طبعا فرق بين الموتوسيكل والعربيه- فالعربيه انا معايا استبن وكومبريسور انما الموتوسيكل مفيش

قررت اصلح الفرده بنفسى- نزل شارع رمسيس التوفيقيه اشتاريت كارت خوابير ب 9 جنيه الكارت فيه 5 خوابير
اشتاريت المخراز (العده اللى بيركب فيها الخابور ب17 جنيه)
طلعت بعد كدا على محل فى شارع الجمهوريه تحت ابو الجوخ بتاع العجل اشتاريت من عنده علبه لحام الكاوتش بيسموه "سيليسيون" عامل زى الكلله ب 10 جنيه

بس كدا وجبت من البيت بخاخه مليتها صابون مواعين وميه وعملت زى بتوع الكاوتش- نفخت العجله -حددت مكان الخرم- اديتها الخبور-قطعت الزياده - كشفت تانى لقيتها لسه بتنفس
اتارى المسمار عمل خرمين قريب من بعض فانا لحمت واحد والتانى لسه بيسرب

فقررت كدا كفايه - فكيت العجله وديتها تتلحم من جوه ودفعت 10 جنيه

معلومه- كان راكب بلف فالعجله بتاع الفاريكه- البلف دا كان عامل زاويه 90 درجه فكان سهل تنفخ العجله- لما غيرته الراجل ركبلى بلف عدل
البلف دا صعب جدا تركب فيه الخرطوم عشان تنفخها مزنزء جدا بينه وبين السره
فانصح بالبلف ال90 درجه عن العدل

اتعلمت بردو ان بتوع الكاوتش بيسرقونا فالخوابير لما بياخدوا منا ثمن الخابور 15 جنيه وانا جايبه ب2 جنيه

امس نزلت شارع 26 يوليو جبت شويه قطع غيار, جبت:
طقم بكر ب35 جنيه
طقم 3 قطع بلاستيك بيركبو مع البكر ب15 جنيه
سير ب75 جنيه
جبتهم من محل اسمه زوجمار- معاملتهم كويسه جدا
سالته على الزرجينه اللى بتركب على المروحه عشان تغير السير والبكر ملقتهاش عنده
سالته على الفيبر قالى مش موجود غير فالتوكيل فقط فالعبور

جيت ربع كيلو زيت فتيس (جير) ب10 جنيه

انا عامل زرجينه خشب عشان اعرف امسك المروحه عشان افك الصموله بتاعتها, لسه مجربتهاش لكن اعتقد هتنفع
ولو منفعتش هعمل واحده معدن -لسه هفكر فيها

كود سير الهامرز اف 10
835-20-30

توضيع للارقام دى
ال835 هو طول السير (المحيط)
20 دا عرض السير من الاعلى (الجانب العريض)
30 ودى الزاويه بتاعت السير

شكرا جزيلا على الموضوع الجميل والمفيد، وحرصك على افادة الغير.
أن كنت حابب اسألك عن تجربتك مع الاسكوتر بشكل عام، ياترى مريح؟ عملي؟ ولو الاستخدام يومي والتحرك به كتير؟ هل فى حدود للمشي اليومي؟ كام كيلو مثلا؟ انا بفكر جديا فى الموضوع؛ لأن المشاوير بالسيارة في الزحمة البشعة في القاهرة فعلا موضوغ مزعج بشدة. فهل الاسكوتر حل كويس؟ انا قي الشروق وشغلي في وسط البلد ههههه فلو في حاجة معينة ترشحها لي تيبقي ايه؟

وياريت باقي الإخوة اللي عندهم اجابات على الأسئلة دى يفيدونا بخبرتهم؛ لأني مبتدئ تماما. وشكرا مقدما.

شكرا ليك

المسافه من الشروق لوسط البلد كبيره- بتاع 50 كيلو رايح و50 كيلو راجع
100 كيلو فاليوم

الاسكوتر(150 ل250 سى سى) مصمم لداخل البلد والسرعات القليله ولمسافات قليله
فانا لا انصح بالاسكوتر للمشوار دا
فى اسكوترز اكبر (لحد 600 سى سى زى سوزوكر بيرجمان) لكن اغلى

طيب ايه البديل؟ الموتوسيكلات الكروزر زى الهوندا استيد او الشادو
بيكونوا 400 سى سى لحد 750 سى سى
الموتوسيكلات دى ثقيله ومريحه تستحمل المسافات الطويله والسرعات العاليه

نيجى للعيوب
1-صيانه الموتوسيكل بتكون اكتر من العربيات- يعنى حضرتك بتغير زيت العربيه كل 5000 كم كثلا وممكن تنساه 1000 كمان- على عكس الموتوسيكل بتغير الزيت كل 1000 كم مثلا فهتلاقى نفسك بتغير زيت 5 اضعاف العربيه (قصدى المرات وليست كميه الزيت)
2- الركنه مهمه جدا عشان الموتوسيكل بيتبهدل بسرعه من الركنه فالشارع- العيال بتلعب فيه- الكلاب والقطط بتنام عليه- معرض للتراب وعوامل الجو- معرض للسرقه
3- لبس الخوزه دا شرط وم اوبشن- الخوزه فالحر .....جهنم- محتاج الموتوسيكل علطول بيجرى عشان متحسش بالحر
4- الكاوتش بتاع الموتوسيكل اهم من كاوتش العربيه- لازم يكونو الاتنين 100 100 غير كدا انت فى خطر اكيد
5- فى رائ بما اننا فى مصر وبنطلع الدائرى كتير وبنشارك العربيات النقل والمقطورات فالعربيه اامن واريح من الموتوسيكل فالطرق دى

فى حالتك لا انصح بشراء الموتوسيكل وصدقنى العربيه هى الحل الامثل

حاجه كدا افتكرتها مش عارف هتفيد حضراتكم فى ايه لكن هقولها

بليل لما بنور النور- النور مش فالدركسيون هى راكب فالفيبر اللى ماسك فالشاسيه
فالملفات النور مش بينور فالاتجاه اللى رايحه- بكون داخل يمين والنور لسه منور عدل
ودا انا شايفه عيب فمكان الكشافات

اخيرا رخصت الاسكوتر
كانت رخصته منتهيه فطلعت شهاده بيانات ب150 جنيه
عمل عقد بيه فى الشهر العقارى ب300 جنيه
تامين اجبارى ل190 جنيه 3 سنين
فحص وتجديد 3 سنين ب70 جنيه

الاجمالى تقريبا 730 جنيه

يا باشا متشكر جدا على النصيحة الجميلة والأمينة والوافية..

أنا بقول يبقى اسكوتر جنب العربية أفضل من العربية لوحدها ..موضوع الموتوسيكل ده مش عارف قصة الغيارات دي سهلة ولا صعبة ..بس قلت اشوف الاسكوتر الأول

أنا من ساعة آخر مرة وأنا متابع بشغف، وسألت كتير ناس ومحلات، واستقريت تقريبا على بينيلي زافيرانو 250 سي سي..أنسب حاجة لإحتياجاتي في حدود المبلغ المتاح. إيه رأيك..؟