الموضوع: زيت الفتيس atf sp-iii هو ال atf 320 ؟

للأسف... زيت ATF SP-III مش زي زيت موبل ATF 320...

زيت موبل 320 مطابق لمواصفة تانية اسمها ديكسرون III.. ودي مواصفة خاصة بجنرال موتورز .. وشركات تانية كتير بتستخدمها في عربياتها.. وغالبا هتلاقيها موجودة في العربيات القديمة شوية المعمولة في التسعينات وأوائل الـ2000

زيت الـSP-III (أو SP-3) في الأصل من تطوير متسوبيشي ومستخدم في كل العربيات اللي بتستخدم تكنولوجيا متسوبيشي زي هيونداي وكيا وبروتون...



تقدر بكل بساطة تجيب زيت متسوبيشي Diamond SP-III.. وده مطابق تماما لزيت موبِس.. وفيه زيوت تانية مطابقة بردو..

بس أهم حاجة تلاقي مكتوب عليها SP-III

أتوقع زيت متسوبيشي أرخص ومتوفر بسهولة في السوق.

بردو اسأل على زيت مانول SP-III... موجود في التوكيل بتاعهم...

المشاركة الأصلية كتبت بواسطة omdaz_5538

طيب انا لقيت aisin وصورته اهي تحت



مكتوب عليه sp-iii

مبدئيا... الزيت ده يمشي.. بس ماهواش مناسب 100%

بصراحة أنا مش مستريحله.. مع إن شركة Aisin من أفضل شركات العالم اللي بتعمل الجيربوكسات وزيوتها!!!

بس أنا ما أفضلش الزيوت الـuniversal دي.. مش هيشتغل معاك بنفس كفاءة الزيت المتخصص اللي مكتوب عليه SP-III بس.
بمعنى إن الزيت ده هيشتغل معاك بكفاءة 90% بالكتير من كفاءة الزيت الأصلي.. مع إن المواصفات المكتوبة عليه بتقول إنه زيت طويل العمر.. يعني يعيش معاك 100 ألف كيلومتر مستريح...

أتوقع إن الزيت ده أغلى من الزيت الأصلي (أو المتخصص)...

دور كويس الأول.. لو ما لقيتش زيت مكتوب عليه SP-III لوحدها .. يبقى اشتري الزيت ده.

...

المشاركة الأصلية كتبت بواسطة omdaz_5538

الاصلي تمنه 600 جنيه ومش موجود لاسف
دا انا جبته ب350 بس لسه محتطهوش شركة ايسن معروفة في مجال الجير بوكس طبعا ودا اللي خلاني افكر فيه...
بس انت خوفتني منه ...
طيب 90% اللي حضرتك قولت عليها هتفرق معايا في ايه ؟
هل في تأخير النقلات ولا الستهلاك ولا عمر الزيت اطول ولا ممكن يبقى ايه ؟

علشان أكون صريح معاك.. الحقيقة مش قادر أحدد إيه اللي ممكن يحصل بالضبط.. لإن معلوماتي ناقصها حاجات كتير علشان أكلمك وأنا واثق من كلامي 100%.

لكن اللي أعرفه إن الجيربوكس حساس جدا لنوع الزيت المستخدم لإنه مصمم لاستخدام زيوت بخواص معينة.. منها اللزوجة وتحمل الحرارة وقابلية الانضغاط....

اللي أعرفه كمان إن زيوت الفتيس الأوتوماتيك ممكن نقسمها لفئتين أساسيتين..

زيوت الجيل القديم.. ودي غالبا بتبقى عمرها قصير (20-60 ألف كيلومتر حسب نوع الزيت) وغالبا الزيت بيحتاج تبريد خارجي والفتيس نفسه بيكون فيه مقاس للزيت زي مقاس زيت الموتور..

أشهر الزيوت من الجيل ده:
- زيوت جنرال موتورز: ديكسرون 1 ، 2 ، 3
- زيوت تويوتا تايب 1 و 2 و 3 و 4 = آيسن JWS 3309
- زيوت ميتسوبيشي (وهيونداي وكيا) SP 1 و 2 و 3
- زيوت نيسان ماتيك D و J و K


زيوت الجيل الجديد بدأت تنزل من سنة 2008 تقريبا... ودي زيوت عمرها طويل (100-200 ألف كيلومتر)... والجيربوكس نفسه بيبقى مقفول تماما ومفيهوش مقاس للزيت...

أشهر زيوت الجيل ده:
- ديكسرون 6
- تويوتا تايب WS = زيت آيسن JWS 3324
- ميتسوبيشي (وهيونداي وكيا) SP-4
- نيسان ماتيك S و ماتيك W


على حسب ما أنا فاهم.. زيوت الجيل الجديد مش متوافقة مع الزيوت القديمة... فكون إني ألاقي زيت متوافق مع دول ودول بيعمل لي علامة استفهام كبيرة... ولو المسألة كده يبقى ليه نتعب نفسنا من الأساس"؟؟؟

المعلومة اللي لسه عارفها بردو (بس محتاج أتأكد منها).. إنك لو عايز تحط زيت universal زي اللي حضرتك اشتريته يبقى لازم تعمل فلش للجيربوكس ومحول العزم بحيث تشيل آثار الزيت القديم بالكامل وتحط الزيت الجديد.. والموضوع ده مكلف ومش سهل.

ما زلت أفضل الزيت بتاع العربية... واسأل على زيت ميتسوبيشي.. أرخص ومتوفر بسهولة.

...